4
deputeerde by den Heere Generael tot Iglau gehadt die hen oock inder selver manieren hebben op ghegeuen, want al ist soo datse sterck beschanst waren, ende den Ouersten Swembeck met 1500. soldaten by hen hadden, soo merckten zy nochtans wel datse verleyt ende bedroghen waeren, ende datse niet en souden wt rechten, al steldense hen ter were, alsoo geheel Meyeren oft Morauien de Bemen seer scholden oft vervloeckten, om datse alsulcken handel hadden begonst, groote bloetstortinghe veroorsaect, ende andere landen oock daer toe gebracht hadden.
De voorgaende weke heeftmen alhier op den ouden Rinck, die soo langhe ghestaene Justitie ter neder gheworpen, ende een hooghe Galghe op twee Pilaren ter selver plaetsen op gherecht, t’selue sal oock inde andere Praegsche Steden geschieden, men houdet daer vore, dat daer door de Beemsche hooge Justitie sal wesen ghecasseert, ende dat tot eeuwiger ghedachtenisse de hooghe Justitie inde stadt sal gehouden worden.
Dese daghen is den Heer Secretaris Michna na Weenen ghereyst, de oude Beemsche Lant-Heeren hebben hem veel Requesten oft Supplicatien aen haere Keyserlijcke Majesteyt mede ghegeven, die om pardoen ende genade bidden, ende hen ontschuldighen.
