f42v
Die hadden gesien twonder groot
kolom a
Dat god dur hem heeft hedaen
Na hem eist anders vergaen
Andre liede quamen daer naer
7150Die die miracle hadden onmaer
Die god dede voer hare daghen
Om datsi se niet en sagen
Si daden iegen gods gebod
Ende anebeden astaroth[1]
7155Ende baal oec namen si te wive
Der heidine kinder die keitive
Dies balch hem god van desen dingen
Ende lietse teygindome dwingen
Van surien die coninck chusan[2]
7160Die sere dwanc vii iare die man
Doe riepen si anden gode genaden
Ende hi gaf hem tharen staden
Calefs broeder othoniel
Diese verloeste harde wel
7165Want god halp mede den man
Dat hi verwan den coninc chusan
Dus hadden si ruste ∙xl∙ iaer
Ende othoniel starf daer naer
In othniels tiden so was
7170Cadmus coninc siit seker das
In teben dat in grieken staet scone
Ende in creten droech crone
Na othoniels dode wet wel
Mesdaden die van israel
7175Ende gheselerse[3] in quat heerscap
Eglon die coninc van moab
Entie van amon ende van amalech
Die haddense in haer strec
Over die iordane sii nsi comen
7180Ende hebber vele tliif genomen
Haer afgode setten si daer na
Upten berch van galgala
Eglon maecte ∙i∙ sale goet
Te sinen doene daer ierico stoet
7185Dat volc was xviii iaer
In sine bedwanghe harde swaer
Doe riepen si an gode genaden
Die hem ∙i∙ twest[4] heeft beraden
Ayoth van beniamins geslachte
7190Die even vele hadde crachte
In elke hant nu merket wel
Doe senden die van israel
kolom b
Bi hem den coninc eglon giften
Ayot maecte horic dichten
7195∙I∙ cort sweert dat hi decken mochte
Onder hem waer dat hiit brochte
Hi gordet up die rechter side
Der giften was die coninc blide
Die ayoth voer hem heeft geset
7200Eglon die coninc was sere vet
Ayoths gesellen gingen dane
Ende hi gebrochtse inden gane
Mar hi dede hem saen ten kere
Ende hi seide coninc here
7205Ic sprake u garne in stilre hale
Doe rumden zie altemale die zale
Eglon stont up altehant
Daer nam ayoth die rechter hant
Ende trac ut siin swert aldare
7210Ende stac eglon dur siin smare
Daer liet hiit steken ende viel doot
Ayoth die dore vaste sloot
Ende liep achter uut ende ontran
Eglons knapen ende sine man
7215Braken in alst hem verdroot
Ende vonden hare here doot
Ayot die quam onder die sine
Ende blies met ∙i∙ busine
Die van israel volgeden hem ane
7220Ende belagen die iordane]
Ten gewade daer mense leet
Int lant van moab ghereet
Daer sloegen si tien tiden
Die viande die waenden liden
7225xii dusent man ute moab
Aldus nederde haer heerschap
Doe ruste haer lant lxx iaer
Ende ayot die starf daer naer
Na ayots tiden des gelovet
7230Was proserpina gerovet
Van ortus den coninc van molosen[5]
Daer si lesen souden rosen
Hi hadde ∙i∙ hont hiet tribarnus
Die groot was ende wachte thuus
7235
Pirotmus hi dede pine
Om te rovene prosperine
Als datten tribarnus beet
- ↑ astaroth: Astarot (Vulg./Hist.Schol. Astharoth), eig. de naam van de kanaänitische stad Astarot (lett.: stad van Astarte) in Basan hier de benaming voor de West-Semitische vruchtbaarheidsgodin Astarte zelf. Bijbel: Ri 2:13 en 3:8, Hist.Schol. Lib.Jud. Cap.V
- ↑ chusan: Kusan-Risataïm (Vulg. Chusanrasathaïm Hist.Schol. Chusan Rasathaïm), koning van Edom. Hij werd verslagen door de richter Otniël. Bijbel: Ri 3:8, Hist.Schol. Lib.Jud. Cap.IV
- ↑ gheselerse: van gesellen: Zich aansluiten bij, zich voegen bij, zich mengen onder ook omgaan met, zich gemeenzaam maken met iemand.
- ↑ twest: Strijd, oorlog gevecht ook vechtpartij.
- ↑ molosen: Molossië (Hist.Schol. Molossorum (gen.pl.)), eig. koninkrijk in Epirus, hier benaming voor de onderwereld. Bijbel: Hist.Schol. Lib.Jud. Cap.VI (Inc.)
