Pagina:Van Maerlant, Rijmbijbel (Hs 10B21, 1332).pdf/103

f44r

Diet al verbernede groet ende clene kolom a
Metien ontvoer hi metter vaert
Gedeon die wart vervaert
⁷⁴²⁵Ende riep wat sal miin gescien
Dat ic den ingel hebbe gesien
Onse here seide vervaerdi niet
Snachts geboet hi hem ende hiet
Dat hi brake den outaer
⁷⁴³⁰Die siin vader maecte daer
In balaams eer des afgods
Gedeon ontsachem sgebods
Ende deet nachts dat hem god geboet
Dages wartment geware al bloet
⁷⁴³⁵Entie liede vander stede
Seiden ioasse dat hi dede
Sinen sone bringen vort
Latene sterven dor dese wort
Hi sprac wildme berechten al
⁷⁴⁴⁰Ea hi^[1] god wreke hem baal
Dus lietent bliven gene man
Ende amalech ende madian
Destruerden israel
Ende lagen int dal van israel^[2]
7445Die heilige geest quam in gedeon
Hi ontboet tvolc van zabulon
Van manasse ende van neptalim
Ende van aser quamt tehim
xxxii dusent in dien dagen
⁷⁴⁵⁰Selven quam hi up ∙i∙ wagen
Ende eeschede van onsen here
∙I∙ tekin dor siins selves ere
Een vlies leide hi uptie aerde
Ende bad gode dor sine waerde
⁷⁴⁵⁵Dat die dau quame in dat vlies
Entie aerde niet hadde dies kolom b
Dit dede god dor sine bede
Ten naesten dage so dede hi mede
Dies daus daer uut vol ene scelle^[3]
7460Echt so bad die degen snelle
Des anders dage dat die vacht
Droge bleve bider gods cracht
Entie erde bedauwen soude
So mocht si vechten als die boude
⁷⁴⁶⁵Dit dede god dor hem openbare
Dat hi seges seker ware
Dat vlies dat sachte es ende wit
Dats die lichame onbesmit
Vander reynre maget marien
⁷⁴⁷⁰Die alle tongen benedien
Die dau die vallet heimelike
Uptie erde van hemelrike
Als dede in dat vlies
Dats ihesus siit seker dies
⁷⁴⁷⁵Die heimelike in hare quam
Ende gaf hare ende niet en nam
Meer suverheden dan soe hadde eer
Ende heilichse embermeer
Gedeon porrede metter scare
⁷⁴⁸⁰Mar god seide al openbare
Du heves te vele volcx met ti
Si en sellen niet seggen dat bi mi
Dese dinc aldus gesciede
Roep openbaer voer die liede
⁷⁴⁸⁵Wie so int herte es vervaert
Hi kere ende ga weder thuus waert
Om dit wort ontkeerder dan
xxii dusent man
Doe blevet ∙x∙M∙ mede
⁷⁴⁹⁰Echt seide god daer ter stede
Noch es te vele volcx metti
Leetse te watre hoer na mi
Die twater lapen als die hont
Oft metter hant werpen inden mont
⁷⁴⁹⁵Hout die metti di die siin coene
Dit was gedaen van gedeone
Ende hem blever ccc man
God seide hout di hier an
Met desen sal ic in diin strec
⁷⁵⁰⁰Madian geven ende amalec
Dit volc nam hi ende spise ten sinen

1. ea hi ??: Historia Scholastica heeft hier: ‘Si Deus est Baal, vindicet se.’ zou wijzen op: ‘Es hi god wreke hem baal’
2. israel: In de verbinding dal van israhel, velt van israhel: vlakte van Jizreël, bekend door een aantal veldslagen waaronder die van Gideon tegen de Midjanieten.
3. scelle: schaal