f44v
Ende ghinc henen met businen
kolom a
Ten wighe waert met sine cracht
God seide hem in der selver nacht
7505Ganc in die tente van madian
Du ende diin sone faran[1]
Ende hore wat die viande spreken
Tharte dat di nu dinct breken
Van vrese sal verbouden dan
7510Gedeon horde ∙i∙ man
In die tente sinen gesellen
Daer hi stont ∙i∙ droem tellen
Hi seide mi dochte dat ic sach
∙I∙ gerstiin koekelkiin daer ic lach
7515Indasschen ent nieman eten mochte
Ende onse tente ondersochte
Ende quam ter tabernaclen toe
Dat vel daer ter erden doe
Dandre spelde daer siit horen
7520Gharste dats ∙i∙ onwert[2] coren
Ende onwert volc es van israel
Gedeons gheslachte also wel
So es in israel onwaert[3]
Dit bediet gedeons swaert
7525God hevet volc van madian
In sine hant gegeven dan
Dit horde gedeon ende neech gode
Ende was te sinen wederbode[4]
Ghawi seithi ons heeft gegeven
7530God alle die in tenten leven
In drien scaerde hi se tehant
Ende gaf hem in die rechter hant
Businen ende el ne geen swaert
Die luchterhant was bewaert
7535Met laghelen[5] ende daer in lecht
Hort hier wonderlic gevecht
Gedeon sprac alle coninc so heet mi
Te midnachte so gingen si
Te iii steden int getelt
7540Die lage braecsi met gewelt
Doe bleef hem in die hant dlecht
Doe bliesen si lude echt
Si riepen ons heren swaert
Ende gedeon die wart vervaert
7545Tvolc stont up met genende[6]
Nieman was die andren kende
Ende menich sloechet andren doot
Doe vlo daer enen scare groot
kolom b
Mar doe gemoete him
7550Van manasse ende van neprahim
Ende van asor die waren gekeert
Daer wart madian onteert
Oec gemoetse effrayms geslachte
Ende sloegense onsachte
7555Ende ∙ii∙ coninghe daer si quamen
Oreb[7] en zeb[8] hiet si bi namen
Dat dit te gedeone quam
Daer brochtsi thoeft ende waren gram
Ende seiden twi hadstu onwaert
7560Ons tontbeidene te wighe waert
So scone antworde hi hem allen
Da si den moet lieten vallen
Gedeon leet die iordane
Ende volgede met ccc ane
7565Doch dat si quamen te sacot[9]
Aldaer so bad hi broet dor god
Anders mochti niet volgen na
Zebe[10] ende salmana[11]
Die voren waren met hare scaren
7570Ende siin volc was moede te waren
Mar si bespottene als liede fel
Also dede tvolc van sanuel[12]
Mar salmane ende sebe
Metten haren dese tve
7575Lagen tesamen in een dal
Ende waenden siin ontgangen al
Met hem xv dusent man
Dus hadden si verloren dan
∙C∙ ende xx dusent mede
7580Gedeon quam daer ter stede
Ende al dat here wart ontdaen
Ende die ∙ii∙ coninghe gevaen
Teerst dat hi te sarot quam
Lxxii man hi daer nam
7585Der bester ende deetse slaen met dornen
Omme dat sine daden vertornen[13]
Den hoeft tor van sanuel
Veldi ende sloech tvolc also wel
Teerst dat hi quam in siin lant
7590Vragede hi den coningen altehant
Hoe waren die man gedaen
Die ghi in thabor daer verslaen
Sie seiden recht na diin ansciin
- ↑ faran: Pura Richteren 7:10
- ↑ onwert: Gering, van weinig waarde, nietig.
- ↑ onwaert: Gering, van weinig waarde, nietig.
- ↑ wederbode: Persoon of zaak die een tegengestelde boodschap brengt of inhoudt, het tegendeel voorstaat, het and/ere verdedigt.
- ↑ laghelen: Kruik, fles.
- ↑ genende: van genen: geeuwen, gapen
- ↑ oreb: Oreb, (Vulg./Hist.Schol. Oreb), vorst van Midjan. Bijbel: Ri 7:25, Hist.Schol. Lib.Jud. Cap.VIII
- ↑ seb: Zeëb (Vulg./Hist.Schol. Zeb), een van de koningen van Midjan, onthoofd op bevel van Gideon. Bijbel: Ri 8:3, Hist.Schol. Lib.Jud. Cap.VIII
- ↑ sacot: verbastering van Sukkot (Vulg. Socoth Hist.Schol. Soccoth), plaats in de Jordaanvlakte, niet ver van de Jabbok. Bijbel: Ri 8:5, Hist.Schol. Lib.Jud. Cap.VIII
- ↑ zebe: Zebach (Vulg./Hist.Schol. Zebee), door Gideon verslagen koning van Midjan. Bijbel: Ri 8:5, Hist.Schol. Lib.Jud. Cap.VIII
- ↑ salmana: Salmunna (Vulg./Hist.Schol. Salmana), koning van de Midjanieten. Hij werd verslagen door Gideon. Bijbel: Ri 8:5, Hist.Schol. Lib.Jud. Cap.VIII
- ↑ sanuel: Penuël (Vulg. Fanuhel Hist.Schol. Phanuel), plaats in Transjordanië. Gideon verwoestte de plaats omdat de inwoners niet wilden helpen de Midjanieten te achtervolgen. Bijbel: Ri 8:8, Hist.Schol. Lib.Jud. Cap.VIII
- ↑ vertornen: boos worden.
