f46v
7870Hoement verloes ende hoement stichte
kolom a
Dese iii rechters waren in vreden
Omdat si niet goets en deden
So es te min van hem gescreven
Tvolc was oec goet in haer leven
7875Na abdon so was ∙xl∙ iaer
Israel in bande swaer
Ende alle eygiin der filisteen
Om hare afgode niewer[1] om mee
In dien tiden als ict las
7880Was comen in ytalien eneas
Metten troien alsi vloen
Alsi troien sagen verdoen
Hi brochte met hem sinen sone
Aschamus so hiet die gone
7885Ende creusa sohiet siin moeder
Hector so was haer broeder
In ytalien alse wiit lesen
So hadden coninc gewesen
Daer voren ianus sathurnus[2]
7890Picus[3] faunus[4] latinus
Omtrent anderhalf hondert iaer
Hadden si heren gewesen daer
In dien tiden so was ∙i∙ man
Gheboren van den gheslachte van dan
7895Manuel[5] so was siin name
Siin wiif was scone ende bequame
Ende sonder kint lasic mede
Daer dede soe omme menige bede
Doe quam dingel hare te voren
7900Ende seide haer soude siin geboren
∙I∙ sone ende soe haer hilde rene
Siin leven soude siin niet clene
Mar die ingel sprac aldus
Hi sal oec hieten nazarus
7905Dats heilich ende verlosende mede
So was des nazarus zede
In doude wet dat hi siin haer
Niet en scoer wet vor waer
No en dranc genen wiin
7910Dusdaen sprac hi sal hi siin
Ende hi sal verlossen israel
Dwiif seit haren man manuel
Ende seide hoe scone hi ware
Die haer brochte zulke mare
7915Hi was wantouwel ende droeve sere
Mar twiif sprac bidde wi onsen here
kolom b
Dat hine ons sende ander warf
Ende segge ons dat ons bedarf
Doe seide dingel ten manne
7920Alse ten wive min no mee
Die man haelde vleesch ende broot
Hi waende dat hi hadde etens noot
Die ingel sprac in ete niet
Mar offert gode diet al gebiet
7925Up ∙i∙ steen leidi di spise
Ende bornet na die iotsche wise
Dingel ginc upwaert sciere
In die vlamme van den viere
Die man waende sterven van dien
7930Dat hi den ingel heeft gesien
Mar twiiif troesten inden vare
Soe genas een kint dernare
Dat samsoen gheeten wart
Het wies sere metter vaert
Doe ghevel dat hi daer na
Gevaren quam in tamnata
Inder filisteen lande
Daer sach hi ∙i∙ maget tehande
Di hi verminde ende hi seide
7940Ten vader enter moeder beide
Dat sise hem te wive gaven
Het was hem leet te doene derave
Ende quam daer om die sekerringhe
Doe samsoen ginc om die dinghe
7945Eens lewen hi geware wart
Bider stat inden wiingaert
Die heilige geest vervulde hem tehant
Hi en hadde niet in die hant
Den liebaert scorde hi daer hi quam
- ↑ niewer: nergens niet
- ↑ sathhurnus: Saturnus (Hist.Schol. Saturnus), legendarische vergoddelijkte koning van Latium. Bijbel: Hist.Schol. Lib.Jud. Cap.XV (Inc.)
- ↑ picus: Picus (Hist.Schol. Picus), zoon van Saturnus, koning van Italië in de zgn. Gouden Tijd. Bijbel: Hist.Schol. Lib.Jud. Cap.XV (Inc.)
- ↑ faunus: Faunus (Hist.Schol. Faunus), kleinzoon van Saturnus, legendarische koning van Latium. Bijbel: Hist.Schol. Lib.Jud. Cap.XV (Inc.)
- ↑ manuel: Manoach (Vulg./Hist.Schol. Manue), vader van Simson, afstammeling van Dan. Bijbel: Ri 13:2, Hist.Schol. Lib.Jud. Cap.XVI
