Pagina:Van Maerlant, Rijmbijbel (Hs 10B21, 1332).pdf/112

f48v

Want dat lant was al onberecht kolom a
Micha maecte sinen knecht
Sinen sone pape van hem
Tien tiden was in betlehem
⁸²⁰⁵∙I∙ iongelinc van levis geslachte
Die sine avonture wel wachte
Waer dat hi hem generen^[1] mochte
So dat hi michase versochte
Sinen maech die hi hilt met him
⁸²¹⁰Vanden geslachte van effraim
Doe michas hadde sine dinc verstaen
Vercoes hine tenen pape saen
Want hi van levi was geboren
Ende hi besette hem te voren
⁸²¹⁵Cleder ende rente mede
Tien tiden hadden ne gene stede
Dans gheslachte mar si sochten
Waer si hem generen mochten
Si senden spiers altehant
⁸²²⁰Om te vindene enich lant
Te michase quamen die boden
Ende daer sagen si die afgoden
Ende hoet daer gescepen es
Daer na gingen si in laces^[2]
8225Doe si sagen lant ende stede
Ende tvolc sonder sorgen mede
Ende dat si niet en conden striden
Keerden si weder in corten tiden
Ende seident hare broeders toe
⁸²³⁰Ga wi hets best datment doe
Wi sellen winnen altehant
Sonder pine ∙i∙ edel lant
Daer gingen wech dccc man
Te michase quamen si daer an
⁸²³⁵Daer si sine afgode doe namen
Ende datter horde ii tesamen
Michas ne conit verweren niet
Die pape volgede na dat diet
Dien daden si met hem lieden gaen
⁸²⁴⁰Ende seiden het es best gedaen
Pape te siin van ∙i∙ geslachte
Dan in eens mans huus van clere achte
Michase dregeden si van den live
Si gingen met kindre ende met wive
⁸²⁴⁵Met beesten ende met haren goede
Ende vonden laces sonder hoede
Tvolc sloegen si alte doot kolom b
Ende braken die stede groot
Biden berghe libanus^[3]
8250Maecten si dat seitmen dus
∙I∙ stat die dan geheten es
Te voren hiet soe laces
Daer hilden si den afgod michas
Also langhe alser tabernacle was
⁸²⁵⁵In sylo was die afgod daer
∙I∙ hiet ionathas^[4] dats waer
Die van moyses was comen
Maecten si pape tharen onvromen^[5]
Ende sine kinder na sinen doot
⁸²⁶⁰Totter wilen dat god weder boot
Ende hise allen hiet verslaen
Ocht verdriven ofte vaen
Tenen tiden oec also wel
Doe dat lant van israel
⁸²⁶⁵Sonder here was onberecht
Ghesciede dese ystorie echt
∙I∙ man geboren van levi
Die woende ∙i∙ berghe bi
Lach int lant van effraym
⁸²⁷⁰Hi hadde ∙i∙ wiif met him
Ende was van betlehem geboren
Die van hem sciet om ∙i∙ toren^[6]
Ende voer weder tharen vader
Die man voer na doe wert algader
⁸²⁷⁵Versoent ende si souden keren
Tote haren lande met eren
In gabaa^[7] quam soe met hiin
Dat int lant es van beniamin
Uptie strate hi bliven soude
⁸²⁸⁰Wantten nieman herberghen woude
So dat aldaer quam te him
∙I∙ out man van effraym
Die sonder mage was int lant
Ende ontfincse daer tehant
⁸²⁸⁵Navonts doe die gene aten
Quam dat bose volc upter straten
Ende seiden gef ons den vremden man
Onsen wille mede te doene dan
Dat was sonde iegen nature^[8]
8290Doe leeden si daer uter dure^[9]
Des gasts wiif daer si mede daden
Haren wille sonder ghenaden

1. generen: Zijn leven onderhouden, in zijn onderhoud voorzien, de kost winnen of verdienen
2. laces: Laish, het latere Dan.
3. libanus: Libanon (Vulg. Libanus), gebergte dat vrijwel de gehele staat Libanon beslaat, tussen de Middellandse Zeekust en de rivier Litani. Zie ook: libaen Bijbel: 3 K 9:19
4. Jonathan is een figuur die voorkomt in het verhaal van het afgodsbeeld van Micah in het bijbelboek Richteren
5. onvromen: Ramp, onheil, ellende. In de verbinding te enes onvromen: tot iemands schade, ongeluk, in iemands nadeel.
6. toren: woede, verdriet, onmin
7. Gibeah, een plaats in het land van Benjamin
8. nature: De wet/wetten van de natuur, de natuurlijke orde, de gewone gang van zaken in de natuur.
9. dure: deur