f49v
Der coninghe boec die gaet hier an
kolom a
Die ieremias die heilighe man
8375Versamerde ende selve screef
Daer die ieeste van samson bleef
So tellet dese ieeste mi
Dat tien tiden ∙i∙ heli
Rechtre was in israel
8380Ende pape was hi also wel
Indien tiden horter na
Was ∙i∙ man hiet elkana
In ramata[1] woendi in die port
Diemen in dewangelie hort
8385Aramathia oec nomen
Hi was van levi oec comen
Levi wan caat[2] ende hi daer naer
Wan isuar[3] waentmen dats waer
Aarons oem ende moyses
8390Dus mogedi wel merken des
Dat hi van aaron niet en quam
Daer die wet die papen af nam
Die neghentiende van levi
Was elkana gelovets mi
8395Hi hadde ∙i∙ wiif hiet anna
An hare so wan dese elkana
∙I∙ kint dat hiet samuel
Omme dat si tonsen here wel
Hare bede hadden gedaen
8400Hevet die name ontfaen
Ende doe tkint gespaent was
Dancte anna gode aldas
Ende dede tkint in sylo dragen
Heli die pape was van dagen
8405Ende hem diende samuel
Die iongelinc scone ende wel
Van hem spreect iosefus onwaer
Dat doe hi hadde xii iaer
Dat hi profeteerde doe
8410Samuel dat was wel vroe
Eli die hadde quade kinder
Die lagen biden wiiven ginder
Die ten tabernacle quamen
Ende daer si die offerande of namen
8415Die vader en scaltse niet sere
Bedi so sende onse here
kolom b
Tote heli sinen ingel den bode
Die hem dus an sprac van gode
Ende seide dart gheslachte diins vader
8420Aarons dat soude algader
In miin huus dienen ende lesen
Nu moet bliven en mach niet wesen
Mar die mi dient dien sal ic eren
Ende die mi onwaert dien sal ic deren
8425Dier dine so salmen vele verslaen
Dine ii sonen sonder waen
Sellen bede sterven in ∙i∙ daghe
Aldus wort hem vorseit die plaghe
Ende wet dat hiit sere ontgalt
8430Dat hi sine kinder niene scalt
H{eli was out ende sach niet wel
Hi ende dat kint samuel
Lagen bede seghetmen mi
Ons heren tabernacle bi
8435In ∙i∙ camere oec daer an
Mettien riep die ionghe man
Onse here daer al openbare
Mar hi waende dat heli ware
Hem haeste hi ende liep
8440Te eli ende vragede twi hi riep
Ende hi seide hi en riep niet
Ende hi wonderde wats gesciet
Ende hi sprac ganc liggen neder
Doe riepen onse here echt daer weder
8445Noch ∙ii∙ warf samuel liep
Te heli ende vragede twi hi riep
So dat heli pensde openbare
Dattie stemme ons heren ware
Ende seide ganc liggen neder
8450Ende oftmen die echt roept weder
So antwort her hort diin knecht
Doe riep onse here echt
Hi seide alst hem hely hiet
Ende hi seide hem al tverdriet
8455Dat hi heli ende sine kinden
Wel cortelike soude sinden
Smargiins vragede ely den kinde
Wat wondre god hem ane sinde
Ende tkint seit hem altemale
8460Hely sprac gods es die tale
Dat hi wille dat moet wesen
- ↑ ramata: Ramataïm-Sofim, stad in het gebergte van Efraïm. In het OT Rama of Ramataïm-Sofim, en in het NT Arimatea genoemd. De ligging van deze stad, waar Samuël woonde, is niet precies bekend.
- ↑ caat: Kehat (Vulg./Hist.Schol. Caath), zoon van Levi en vader van Amram, de vader van Mozes. Bijbel: Ex 6:16, Hist.Schol. Lib.I Reg. Cap.II.
- ↑ isuar: Jishar (Vulg. Isaar, Isuar Hist.Schol. Isaar), zoon van Kehat. In Ex 6:17 wordt hij genoemd na Amram, een andere zoon van Kehat en vader van Aäron en Mozes. Bijbel: Ex 6:17, Hist.Schol. Lib.Ex. Cap.XII
