Pagina:Van Maerlant, Rijmbijbel (Hs 10B21, 1332).pdf/116

f50v

Die liede sere van asot kolom a
⁸⁵⁵⁵So dat hem die darme hingen
Beneden die hem ute gingen
Ende muse quamen uter erden
Die hare darme verteerden
Mettien si tesamen daden
⁸⁵⁶⁰Prencen vive van ∙v∙ steden
Om te nemen an hem raet
Die papen seiden ghi doet quaet
Want wildi doen als farao dede
Sent die arke weder thare stede
⁸⁵⁶⁵Ende oec sonder gifte niet
Legter bi oft ghiit gebiet
Van goude ∙v∙ vingherline
Ende ∙v∙ muse van goude fine
Te boeten over onse ∙v∙ steden
⁸⁵⁷⁰Daer toe seget iosefus mede
Dat si ∙v∙ gebeelden van goude
Daer bis setten dor haer houde^[1]
Ende settense up ∙i∙ niewen wagen
∙ii∙ coen die nie hadden gedragen
⁸⁵⁷⁵Ioc ende calvere sogende mede
Bonden si daer an ter stede
Ende haer calvere lieten si thuus
Doe seiden die papen hort na uus
Gaen die coen recht ende wel
⁸⁵⁸⁰Iegen dat lant van israel
So dede ons darke dat verdriet
Ende gaen si uten weghe yet
So quamt ons van andren zaken
Doe dedemen als die papen spraken
⁸⁵⁸⁵Die coen gingen hare sraten
Sere briscende utermaten
Den rechten wech te betsames^[2]
Ende wet wel dat ∙i∙ porte es
Also als ict hebbe gehort
⁸⁵⁹⁰Die den papen toe behort
Die vander steden sneden coren
Ende die wagen daer wi af horen
Bleef staen als hi ter stede quam
Teerst dat tvolc darke vernam
⁸⁵⁹⁵So settensise up ∙i∙ stene
Den wagen hievwen^[3] si allene^[4]
Ende bernden daer voer onsen here
Beide die coien dor sine ere
Die van betsames si daden
⁸⁶⁰⁰Offerande daer voren met scaden kolom b
Daer bleven lxx heren groot
Van betsames vor die arke doot
Ende M andre om dat si bloot
Darke sagen dat god verboot
⁸⁶⁰⁵Die van betsames waren vervaert
Ende senden te cariathiarim^[5] waer
Dat si di arke halen souden
Si haeldense met groter vrouden
Ende voerdense teens mans huus
⁸⁶¹⁰Aminadab^[6] hiet hi teltmen uus
Ende eleazaruse sinen sone
Maecten si pape up tgone
Dat hise bewachten soude daer
Daer was siearke xx iaer
⁸⁶¹⁵Ende vii maende ende nemmee
Was so int lant van filistee
Ende dat volc van israel
Hilt hem doe an gode wel
Samuel sach dat tvolc keerde
⁸⁶²⁰An gode enten elcman^[7] eerde
Hi seide weren in massat varen
Ic sal vor u bidden te waren
Ende die si daer te gader quamen
Die filistiene diet vernamen
⁸⁶²⁵Dat volc was al onbewaert
Traken si alle te massat waert
Doe vreeschstent die van israel
Ende seiden here samuel
Bid god dat hi ons niet si gram
⁸⁶³⁰Samuel nam ∙i∙ sugende lam
Ende offerde vor hem onsen here
Ende aneriepen harde sere
Doe hi angode riep
Dat here daer te gader liep
⁸⁶³⁵Ende god dest donnren in die lucht
Die arde^[8] benede doe hadsi vrucht
Die filistiene die arde ondede
Doe vlo elc te sire stede
Entie israelsche scaren
⁸⁶⁴⁰Iagedense uten lande te waren
Ende sloeger harde vele doot
Samuel leide ∙i∙ steen groot
Daer haer lande comen over een
Dat bleef hetende die helpe steen
⁸⁶⁴⁵Also lange alse levede samuel

1. houde: hier in de betekenis van hulde
2. betsames: Bet-Semes (Vulg./Hist.Schol. Bethsames), stad ten westen van Jeruzalem. Bijbel: Joz 15:10, Hist.Schol. Lib.I Reg. Cap.VIII.
3. hieuwen: van houwen: in stukken hakken
4. allene : moet eigenelijk ‘al clene’ zijn kopiëerfout
5. cariathiarim: Kirjat-Jearim (Vulg./Hist.Schol. Cariathiarim), stad in Juda. Bijbel: 1 S 7:1, Hist.Schol. Lib.I Reg. Cap.VIII
6. aminadab: Amminadab (Vulg. Aminadab), zoon van Aram. Hij was voorvader van David. Bijbel: Mt 1:4
7. elcman: iedereen
8. arde: op een sterke of krachtige wijze, vandaar ook in hoge mate, zeer.