Pagina:Van Maerlant, Rijmbijbel (Hs 10B21, 1332).pdf/123

f54r

Den andren steen den darden mede kolom a
Warp hi indie selve stede
Ende golias viel uptie aerde
⁹¹⁹⁰David ginc tes rosen swaerde
Ende sloeger hem mede af thoeft
Theidin volc vlo des gheloeft
Doe die starke gygant was doot
Doe ghesciede bliscap groot
⁹¹⁹⁵Tote acharon siin si geiaget
Dies den ioden wel behaget
Dese slingre bediet marie
Die edel maget entie vrie
Entie steen die daer uut sloech
⁹²⁰⁰Bediet hem die noyt en loech
Ende golias bediet den viant
Die eerst den raet van sonden vant
Hadden niet die steen gerocht^[1]
Wi waren eygiin ende vercocht
⁹²⁰⁵Onder hem bleven embermere
Marien moghe wiis danken sere
Die ons den steen gedroech
Dies menige salige ziele loech
Alse david uten stride keerde
⁹²¹⁰Daerne meinch omme eerde
Doe vragede die coninc dare
Wanne^[2] david geboren ware
Hi en kennets niet want die viant
Die haddene in siin bedwanc
⁹²¹⁵Hi dwancken so in sinen sin
Dat hi gedochte vele temin
David antworde vor die gone
Dat hi ware ysays sone
Daer vermindene^[3] ionathas
⁹²²⁰Die sconinc sauls sone was
Davite so dat elc daer dede kolom b
Den andren hulde ende vrede
Mar doe si uten wighe keerden
Quamen die vrouwen die saule eerden
⁹²²⁵Uten steden die voer hem sprongen
Ende dansten ende songen
Saul velder ∙M∙ ter neder
Die mageden antworden weder
Ende david x dusent man
⁹²³⁰Alse saul dat marken began
Datmen davite gaf die ere
Wart hine hatende harde sere
Ende ontsach hem des sekerlike
Bi hem te verliesen siin conincrike
⁹²³⁵Hier omme wart hi gevreest
Eens quam in hem die quade geest
Ende david die sloech die harpe
Saul nam ∙i∙ glavie^[4] scarpe
Ende waende davite doden also
⁹²⁴⁰Mar david tehant ontvlo
Doch dat hi hem versoende also
Entie coninc maectene vro
Ende over M ridders here
Ende seide wes stout ende vecht sere
⁹²⁴⁵Ic sal di merol mire dochter geven
Saul pensde hi sal siin leven
Verlopen daer omme in ∙i∙ striit
Nochtan gaf hi in corter tiit
Die dochter ∙i∙ andren man
⁹²⁵⁰Ende hi loech davite daer an
Mar die ioncste die michol hiet
Beloefdi hem om anders niet
Dan hi sloege ∙c∙ filisteen
Ende bracht hem liitekiin^[5] over een
⁹²⁵⁵Doe ginc david met sire scare
In nacharon ende sloech aldare
∙cc∙ man daer vander stede
Ende sneet hem af haer manlichede
Teliiteken dat volc was heidiin
⁹²⁶⁰Want die ioden besneden siin
Doe gaf hi hem die dochter daer
Mar emmer haethine vorwaer
So dat hine ionathase hiet slaen
Diet davite wel dede verstaen
⁹²⁶⁵Oec sprac hi den vader an
Here seithi ∙i∙ onnosel^[6] man

1. gerocht: van geraken: raken, treffen
2. wanne: hier in de betekenis van wanneer, op het ogenblik dat.
3. vermindene: van verminnen: liefhebben verliefd worden op vriendschap opvatten voor
4. glavie: Lans, speer.
5. liitekiin: Zichtbaar bewijs, kenteken.
6. onnosel: onschuldig