Pagina:Van Maerlant, Rijmbijbel (Hs 10B21, 1332).pdf/126

f55v

So dat oec was vervaert kolom a
Dat si souden ten coninc waert
Hi swoer sloegen niet in ∙i∙ stride
God ocht mit evele in corten tiden
⁹⁴⁵⁵Hets waerlic vermidic^[1] siins mere
Hi seide god wel lieve here
En laet mi niet dat gescien
Dat ic miin hant doe an dien
Die te coninc es gewiit
⁹⁴⁶⁰Ende met sacramente ghebenediit
Alle stildhise met deser dinc
Ende doe saul uten hole ginc
Volgedem david ende riep sere
Ende seide coninc wel lieve here
⁹⁴⁶⁵Ende saul die sach achter weder
Ende david neech ter erden neder
Ende seide twi houtsen haren raet
Die van di mi seggen quaet
Sie goet liiteken an diin cleet
⁹⁴⁷⁰Ende merc hoe ic die vermeet
Mettien saul wenen began
Ende sprac du best die rechter man
God salt di lonen ende bi desen
Weetic dat du salt coninc wesen
⁹⁴⁷⁵Swere dattu na mi met crachte
Niet verslaes mine geslachte
David swoert al openbare
Saul kerde met sire scare
Tien tiden starf samuel
⁹⁴⁸⁰Entie gene van israael
Beweenden sine doot
Si groevene clene ende groot
In sine port tote ramata
Ende david die vlo daer na
⁹⁴⁸⁵In die woistine van pharan^[2]
Daer woende nabal^[3] ∙i∙ rike man
Die van calef^[4] geboren was
David dede hem bidden das
Want si dicke nabals herden
⁹⁴⁹⁰Van menigen verliese bewerden
Daer si in diewoistine lagen
Dat si in den goeden dagen
Hem sende yet ter spise waert
Nabal scalt ende hadt onwaert
⁹⁴⁹⁵Ende seide men machse wassen sien
Die knechte die haren here ontvlien
So datmen david den lachter kolom b
Seide diemen hem sprac van achter
Doe swoer david hi sout al doot
⁹⁵⁰⁰Slaen clene ende groot
Ende ginc met hem cccc ech
Daer nabals wiif quam in den wech
Met prosente hem teghemoete
Die vrouwe was wiis van worden soete
⁹⁵⁰⁵Ende daer toe scone ende bequame
Abygail was hare name
Wiis so was die vrouwe dan
Ende sie bad over den dullen man
Die scone vrouwe bediet marie
⁹⁵¹⁰Die van menigher partie
Ons verbidt^[5] ende oec ontbint^[6]
Iegen haer verbolgen kint
Ende geeft haer doget in prosente
Daer wi biden parlemente
⁹⁵¹⁵Alle sellen ontgaen ende genesen
Van hare eist dat wi hier lesen
Mar doe nabaal dat vernam
Dat david hadde gesiin gram
Haddi die sorge so groot
⁹⁵²⁰Dat hi bleef binnen ∙x∙ dagen doot
Ende david nam die vrouwe
Om hare doget om hare trouwe
Want saul hem siin wiif onthilt
Ende gafse ∙i∙ andren met gewilt
⁹⁵²⁵Echt vreeschede saul dat
In wat steden davit sat
Hi nam met hem iii∙M man
Want hi wildene striden an
Ende logierde bider montanien
⁹⁵³⁰Nachts ginc david in de companien^[7]
Hem en was oec nieman bi
Dan siin neve abysay^[8]
Ins coninc tente so quam stille
Abysay sach sinen wille
⁹⁵³⁵Tvolc sliep nu hort siin spreken
Nu laet mi den coninc dor steken
So si wi dan uut alre noot
Mar david die wederboet
Om tsacrament dat hi ontfinc
⁹⁵⁴⁰Mar hi hiet hem dese dinc
Nem dat vat daer twater in es
Enten scacht^[9] ic bidde di des

1. vermidic: van vermiden: sparen, in leven laten.
2. pharan: Paran (Vulg. Pharan Hist.Schol. Pharam (acc.)), woestijnstreek in Israël tussen Midjan en Egypte. Bijbel: Nu 10:11, Hist.Schol. Lib.Num. Cap.XIII
3. Nabal (Vulg./Hist.Schol. Nabal), man van Abigaïl. Hij weigerde David voedsel te verstrekken, toen deze daarom vroeg. Zijn vrouw Abigaïl maakte deze onbeleefdheid goed. bijbel: 1 S 25:3, Hist.Schol. Lib.I Reg. Cap.XXIV
4. Calef wordt verder nergens vermeld, misschien wordt hier de verspieder bedoeld die met Jozua uit het beloofde land terugkwam met positieve verhalen.
5. verbidden: Met een persoon als object: (iem.) door gebeden of voorspraak bevrijden
6. ontbinden: hier in de betekenis van: Bevrijden (van), ontslaan (van), soms meer bep. bevrijden van zonden: absolveren.
7. companien: Veld, vlakte, het vlakke veld
8. Abysay was een zoon van de Zeruiah (of Zerula), zuster van David.
9. scacht: speer