Pagina:Van Maerlant, Rijmbijbel (Hs 10B21, 1332).pdf/136

f60v

Hi riep nu ga wech bloedig man kolom a
¹⁰³⁶⁰Nu slaen di diene sonde dan
Die du ansaule heefs gedaen
Abysai wilden doot slaen
David seide laet dit bliven
Miins selves kint wil mi ontliven
¹⁰³⁶⁵Wat wonder eist van desen man
God senddene hare^[1] dan
Om dat hi mi soude vloeken
Nu moete god miins lachters roeken^[2]
Een vroet man die thusi^[3] hiet
¹⁰³⁷⁰Daer hem david mede beriet
Dicke als hiis hadde te doene
Die quam ende reet tote absaloene
Mar het was bi davids rade dan
David sprac als ∙i∙ wiis man
¹⁰³⁷⁵Ganc wes mit absalon sonder baraet^[4]
Ende score acytofels^[5] raet
Acytofel was dats bekant
Absaloms raet davids viant
Te iherusalen indie stede
¹⁰³⁸⁰Ende groeten over coninc mede
Absalon antworde saen
Wan werstu met dinen vrient gegaen
Thusi seide ic bens met hem
Dien aldie van iherusalem
¹⁰³⁸⁵Ende god ten coninc heeft vercoren
Als ic dinen vader te voren
Diende willic di dienen mede
Absalon ginc daer ter stede
An daavids amie liggen saen
¹⁰³⁹⁰Datmen te bet moge verstaen
Dat hi den vader ware fel
Aldus riet hem acytofel
Die davite haete in allen doene
Doe seidi tote absaloene
¹⁰³⁹⁵Ic neme best xii dusent man
Ende volghe dinen vader an
Hies moede ic salne lichte ontliven
Dus sal al tvolc andi bliven
Absalon sprac roep thusi
¹⁰⁴⁰⁰Ic wille hi ten rade si
Thusi sprac dits de raet miin
Diin vader entie met hem siin
Siin starc ende van groter were
Sloegen si yeman up diin here
¹⁰⁴⁰⁵Tvolc mochte al verroeren^[6] daer ni kolom b
Mar hore dits de raet van mi
Men sal al israel ombieden
War so yeman es van sinen lieden
Ende hem alle de sinen bestaen^[7]
10410Dus en machiis niet ontgaen
Daer wart thusis raet gepriset
Mar thusi heeft dat gewiset
Diet davite daden te verstane
Doe vlo david over die iordane
¹⁰⁴¹⁵Eer die dageraet wert clare
Doe acytofel wart geware
Datmen sinen raet niet dede
Wisti wel die waerheit mede
Dat david soude sekerlike
¹⁰⁴²⁰Weder comen in siin rike
Ende gheweldich werden slands
Dies vervaerdi hem te hands
Absalon gaderde siin here
Upten vader met groter were
¹⁰⁴²⁵Ende voer over die iordane
Conincstavel maecti daer ane
Amasa in ioabs stede
Over al siin here mede
Abigayl was siin moeder
¹⁰⁴³⁰David was selve haer broeder
Dat volc dat woende over die iordane
Dat trac meest davite ane
Ende daden hem ere mettien
Scaerde david siin here in drien
¹⁰⁴³⁵Alse die sone up hem quam
Die ene scare ioab nam
Dander abysay siin broeder
Sernia was hare beider moeder
Die derde scare was beset
¹⁰⁴⁴⁰Mit enen hiet hethi van geth^[8]
Dies wilde david met hem varen
Si seiden du en salt te waren
Men rekent diin liif allene
Voer ∙x∙ dusent man gemene
¹⁰⁴⁴⁵Om ons sellen si niet vele geven
Si staen alle na diin leven
Ende doe tvolc porten began
Omtrent vii dusent man
Seide david daer si ute traken
¹⁰⁴⁵⁰Hoet mi boven alle zaken

1. hare: hier, hierheen
2. roeken: geven om, zich bekommeren om.
3. thusi: (cusi) Chusai (Vulg. Husai Hist.Schol. Chusai), raadsman van David. Bijbel: 2 S 15:32, Hist.Schol. Lib.II Reg. Cap.XVI
4. baraet: In de verbinding sonder (enich, loos) baraet: zonder arglist, zonder uitvluchten, in alle oprechtheid.
5. acytofel: Achitofel (Vulg. Ahitofel, Achitophel Hist.Schol. Achitophel) de Giloniet. Hij was raadsman van David en spande met Absalom tegen hem samen. Bijbel: 2 S 15:12, Hist.Schol. Lib.II Reg. Cap.XVI
6. verroeren: in beweging brengen in opschudding brengen
7. bestaen: aanvallen belegeren overvallen
8. hethi van geth: Ithai de Gethiet 2.Sam. 18:2