Pagina:Van Maerlant, Rijmbijbel (Hs 10B21, 1332).pdf/139

f62r

Dat si des daghes wonnen tvelt kolom a
Die iii waren van meester gewelt
Van den andren gelovets mi
Was die eersten abisay
Ioabs broeder seruien^[1] kint
Davids neve alsmen vint
Die met sine scachte verwan
¹⁰⁶³⁰Ende doode wel ∙ccc∙ man
Nochtan en mochti niet indien
Gheliken den eersten van den drien
Banaia^[2] die was na desen
Die ∙ii∙ prince als wi lesen
¹⁰⁶³⁵Van moab mit eren verslouch
Ende ∙i∙ gygant groot genoech
Die lachter onsen heren sprac
∙I∙ andren hi oec dur stac
Die hadde in die hant ∙i∙ scacht
¹⁰⁶⁴⁰Ende doden met groter cracht
Ende banayas ∙i∙ roese^[3] mede
Doch bestonthine met groter stouthede
Ende wert nachts met hem gemene
Ende versloegen daer allene
¹⁰⁶⁴⁵Oec sloech hi ∙i∙ liebaert^[4] doot
∙I∙ snee was gevallen groot
Entie liebaert was gevallen
In ene cysterne ^[5] hore wi callen
Dat gat was metten snee bedect
¹⁰⁶⁵⁰Banayas was sinen wech gerrect
Ende horde gremmen den liebaert
Doe bestont^[6] hine metter vaert
Ende sloegen met ∙i∙ stocke doot
Dat was hem ∙i∙ eere groot
¹⁰⁶⁵⁵Die derde was sobocay^[7]
Die slouch den gygant sefi
Dese iii hadden manheit^[8] groot
Noit man kinde haer genoet
Die filistiene hadden belegen
¹⁰⁶⁶⁰Alle die gange^[9] vanden wegen
Die gingen te betlehem
Doe was in iherusalem
Waters berste^[10] in gere tiit
Doe sprac die coninc david
¹⁰⁶⁶⁵Ende prufde die edele fonteine
Die so scone was ende so reine
Van betlehem die vor die port stoet
Hi begeretse in sinen moet
Doe ginc dese sobocay kolom b
¹⁰⁶⁷⁰Banayas ende abisay
Mids dor die viande met stride
Ende halden water in dien tide
Ende voeren weder vechtender hand
Noit was selke daet bekant
¹⁰⁶⁷⁵Ende gaven davite die fonteine
Hi en wilder groot no cleyne
Hi seide wat sal ic keitive
Den anxt drinken van uwen live
Hi stortese gode te offeranden
¹⁰⁶⁸⁰Ende dankeths hem met beiden handen
Dat die iii genesen waren
Van alder heidine scaren
Marie die maget reyne
Es dwater van deser fonteyne
¹⁰⁶⁸⁵Dat david so sere begheerde
Eer some quam up deerde
Begaerde haer coemst menich man
Die ic genomen niet en can
Die iii die twater haelden mede
¹⁰⁶⁹⁰Bedieden die drievoudichede
Ende god in iii persone
Bi wies cracht dattie scone
Maria ter werelt quam
Dat david dat water nam
¹⁰⁶⁹⁵Ende hiis niet dranc min no mere
Mar hi offert onsen here
Bediet dat die moeder ons heren
Haer van manne soude keren
Ende gode gheoffert wesen
¹⁰⁷⁰⁰Dit meent die ieeste die wi lesen
Dese vi daer wi af tellen
Waren die starcste ghesellen
Van des conincs davids here
Doch was hi van der meester were
¹⁰⁷⁰⁵Selve die coninc davit
Ende starcste in alden striit
Die goedertierenste onder die liede
Ende onder sine meyseniede
Entie sachte diemen wiste
¹⁰⁷¹⁰Mar onder sine vianden in twiste
Entie vreselixt in gevechte
Ende als hi sat int gherechte
Was nieman simpelre no wreder
No die ondaer wrac gereder

1. seruien: Seruja (Hist.Schol./Vulg. Sarvia), halfzuster van David. Bijbel: 2 S 2:13, Hist.Schol. Lib.I Reg. Cap.XXV
2. Banaias: Benaja (Vulg./Hist.Schol. Banaias), zoon van Jojada, één van de helden van David. Bijbel: 2 S 20:20-23, Hist.Schol. Lib.II Reg. Cap.XXII Benaja
3. roese: reus
4. liebaert: leeuw. Eigenlijk luipaard maar in het Mnl. en meer bepaald in Vlaanderen gebruikt voor leeuw.
5. cysterne: waterput
6. bestont: van bestaen, hier in de betekenis van aanvallen
7. sobocay: Sibbekai (Vulg./Hist.Schol. Sobochai), een van Davids helden. Bijbel: 2 S 21:18, Hist.Schol. Lib.II Reg. Cap.XXI
8. hadden manheit groot: moet eigenlijk zijn: ‘daden manheit groot’ deden grote heledendaden. Wel correct in oudere handschriften.
9. hadden manheit groot: moet eigenlijk zijn: ‘daden manheit groot’ deden grote heledendaden. Wel correct in oudere handschriften.
10. berste: gebrek