Pagina:Van Maerlant, Rijmbijbel (Hs 10B21, 1332).pdf/143

f64r

Oec in sinen tiden mede kolom a
¹⁰⁹⁸⁰Nu hort salmons mogenthede
Salmon sat mogentlike
Ins vader troen ende in siin rike
Daer na bad adonias siin broeder
Bersabe salomons moeder
¹⁰⁹⁸⁵Dat soe den coninc bidden soude
Datmen hem geven woude
Te wive abysach sunamiten
Die getrouwede was davite
Ende met hem alse vrouwe sat
¹⁰⁹⁹⁰Salmon hadde onwert dat
Ende seide moeder dese bede
Wat salse bid hem drike mede
Hies ouder dan ic adonias
Ioab ic ben seker das
¹⁰⁹⁹⁵Dat abyathar hem es hout
Abisach heeft oec ghewout
Als ocht soe coninginne ware
Hi heeft minen vader ommare^[1]
Ende heeft iegen ere ghebeden
¹¹⁰⁰⁰Dat moet hi besterven heden
Ende hiet den starken banayas
Doot slaen den broeder adonias
Abyatarre seidi tehant
Vare henen wonen in diin lant
¹¹⁰⁰⁵Ende nembermeer com te mi
Du waers doot dat segic di
En hadstu gedoget niet
Met minen vader menich verdriet
Bi deser zake was verdreven
¹¹⁰¹⁰Abyatar in siin leven
Die van ely was geboren
Die pape en rechtre was tevoren
Also alse samuel versprac kolom b
Mogedi lesen datmen verstac^[2]
11015Helis geslachte dat nembermere
Daer na ne quam te gere eere
Sadoch was die werdichede
Gegeven in abyatars stede
Doe ioab vernam die sake
¹¹⁰²⁰Dat salmon dede wrake
Vlo hi in die tabernacle met vare
Ende greep den hoec vanden outare^[3]
Die coninc sendder banayas
Mar ioab vermat^[4] hem das
¹¹⁰⁰²⁵Dat hi daer ember sterven soude
Nadien datmen doden woude
Salmon deden daer verslaen
Ende gaf de voghedie saen
Van den here banaias
¹¹⁰³⁰Die iaobs te voren was
Die coninc riep semey vort te hem
Ende seide wes in iherusalem
Gaesteuwe ut sonder waen
Ic doe di ontliven saen
¹¹⁰³⁵Semey wachtes hem iii iaer
Doch dat hire uut ginc daer naer
Ende salmon warts geware das
Hi hiet den stouten banayas
Daat hine ontlive hi hadt gesproken
¹¹⁰⁴⁰Dus heeft hi den vader gewroken
Salmon daer ic af scrive
Nam faraons dochter te wive
Des coninx van egypten lant
Daer hi als ict bescreven vant
¹¹⁰⁴⁵∙I∙ kint an wan men leest vor waer
Eer soe hadde ix iaer
Die bruut voerdi in davids stede
Het was eer hi huus maken dede
Om ∙iii∙ dingen pensdi sere
¹¹⁰⁵⁰∙I∙ tempel te maken onsen here
Ende hem selven ∙i∙ zale
Ende iherusalem altemale
Met iiii mure omme te gane
In den eersten mur te stane
¹¹⁰⁵⁵Dien tempel ende haer papen mede
Die dienen souden ter heiligher stede
Inden andren mur so souden
Die propheten haer wonen houden

1. ommare: In de verbinding ‘enen onmare hebben’ Iem. verachten, iem. minachten.
2. verstac: van versteken: verjagen, verdrijven
3. den hoec vanden outare: Vulgaat: de hoornen des altaars
4. vermat: van vermeten: zich verstouten te zeggen (in rechte) beweren aanspraak maken op zich beroepen op.