Hier in stonden colummen fine
kolom a
11520Daer in lettren van latine
Ebreusch ende grixe mede
Die maecte tvolc daer ter stede
Dat si hilden ons heren wet
∙I∙ inganc was daer geset
11525∙xv∙ cubitus hoech ende wiit
Die open was talre tiit
Want daer was gene dure an
Daer toe gingen wiif ende man
Die daer haer offerande brochten
11530Niet vorder si oec comen mochten
En was dat siit bi orlove daden
Men clammer up met xv graden
Int hangende vanden berge was
Noch ∙i∙ kerhof als ict las
11535Alomme was dat scone ende rene
Ghepaveert met marberstene
Met ∙i∙ mure geloken dus
Die hoech was xxv cubitus
An dinderste side ten tempel waert
11540Ende buten dat hebt niet onwaert
Was xl cubitus hoech bi gethale
Dat dede dat sigen[1] altemale
Vanden berghe daer hi an stoet
Hi en was mar hoech ∙i∙ voet
11545Vanden temple dat si u cont
Ten westende die boven stont
Was die mur gheheel tien tiden
Mar andie andre iii siden
Haddi porten harenthare
11550Alst moenkelic[2] cloester ware
Daer in stonden colummen diere
Van gedane menigertiere
Cameren ware dier ende fiin
In ghemaect alle cedriin
11555xxx cubitus nu ter tiit
Andie suutside dat portale wiit
Waren porten ghemaaect viere
Ende also vele in dere maniere
Ware oec andie nortside
11560Met goude beslegen wide
Ingle gewrocht wel utermaten
Indie porten wachters saten
Die den onsuveren benamen
Dat sire niet binnen en quamen
11565∙I∙ porte stont ant oestinde
kolom b
So scone wanic dat nieman kinde
Speciosa[3] hiet soe bi namen
Haer duren waren alle tesamen
Van copre van corinten ghemaect
11570Scone ende diere ende wel gheraect
In die ii hoeke an die oestside
Waren ∙ii∙ portekiin niet wide
Daer dure plagen vrouwen tegane
Met offerande als ic wel wane
11575In die plaetse van den kerchove
Bider porten van groten love
Vercochtmen vogle ende beesten
Om te offerne na der ieesten
Ende wisselbanke stonden daer
11580Dat seldi horen wel hier naer
Datse onse here alle omme warp
Doe hi wreet was ende scarp
Biden porte stonden daer
Blocke ghemaect wet vorwaer
11585Daer die liede vanden dorpen
Als sire quamen ghelt in worpen
Ende huse waren ghemaect dermede
Daermen tvolc in doen dede
Oec sonder stoele horic gewagen
11590Daer die wise in sittens plagen
Dit kerkhof is bekant
Ende inder ewangelie tempel genant
Beneden desen kerchove
Was noch ∙i∙ van mindren love
11595Daer die vrouwen in biddes plagen
Daer gene smette in lagen
Beneden dien was dat vierde
Dat salmon alreminst visierde
Daer in beeden donsuverliede
11600Entie heidine alst ghesciede
Niet vorder mosten si gaen
Daer most si bidden ende staen
Dit was ans berchs voet
Deromme ginc ∙i∙ mur goet
11605Alomme den berch wi lesen dus
Die hoech was cccc cubitus
Nochtan ghelangede hi niet den voet
Boeven daer die tempel stoet
Alsmen int inderste kerchof quam
11610Boven al up als ic vernam
- ↑ sigen: hellen
- ↑ moenkelic cloester: monniken klooster
- ↑ speciosa: Speciosa of Schone Poort (Vulg./Hist.Schol. Speciosa), een van de poorten van het tempelcomplex te Jeruzalem, die toegang gaf tot de voorhof der vrouwen. De naam berust op de uitzonderlijk fraaie deuren van de poort, die gemaakt waren van Korintisch koper. In het Oude Testament komt de naam niet voor. Bijbel: Hist.Schol. Lib.III Reg. Cap.XV, vgl. Hnd. 3:2
