f71v
Ende half volget amri naer
kolom a
In asas xxxste iaer
So wert amri wet wel
12350Her over al tvolc van israel
Amri maecte samaria
Dat de hoeftstede bleef daer na
Van den rike als wiit lesen
Tevoren hadt tarsen gewesen
12355Hi was argher als ict las
Dan enich diere te voren was
Hi starf ende was begraven scone
Achab siin sone die droech crone
In asas xxxviii iaer
12360Ende was coninc wet vor waer
Achab was coninc wet dat wel
xxii iaer in israel
Hi en liet hem niet genoegen mede
An ieroboams quaethede
12365Mar hi brachte in israel
Die heidine afgode also wel
Hi nam iesabel te wive
∙I∙ die quatste keytive
Des coninx dochter van saiet
12370Oec maecte hi iegen wet
Baalle beedhuse ende outaer
In samarien dats waer
Doe sende god sine prophete
An hem bi sinen gheete
12375Helias die hem vorseide wel
Biden gode van israel
Dat het niet eer reynen soude
Eer hiis bade ende woude
Doe wilden achab doot slaen
12380Mar helias ontvlo hem saen
Tote ∙i∙ beke hiet corit[1]
Van hem so lese wi oec dit
Dat hem die beke[2] te sire noot
Vleech toe brochte ende broot
12385Ende hi dranc van gere beke
Mar soe drogede haesteleke
Want die droechte so groot was
Doe seide god tote helias
Ganc in sarepta bi saiet
12390Daer hebic ∙i∙ wedewe geset
Ende geheten dat soe die voede
Doere helias quam die goede
Quam hem ter porten tegemoete
kolom b
Die wedewe gaende up hare voete
12395Hout soude soe lesen hier ter stat
Mettien helias drinken bat
Ende ∙i∙ morseel[3] broets oec mede
Die wedewe antworde daer ter stede
Here in hebbe dats gode bekant
12400Nemmeer meels dan vol ∙i∙ hant
Ende ∙i∙ lettel olien oec mede
Nu halic hout hier buter stede
Om te backen ∙i∙ coekelkiin clene
Mi ende minen kinde gemene
12405Alst gheeten is gae wi sterven
Ende beide van hongre bederven
Helias sprac weest onvervaert
Maect mi ∙i∙ coekelkiin ter vaert
Ende dinen kinde ende oec di
12410Onse here seit gelovets mi
Dine ghebreect olie no mele
Here god sent reyns so vele
Die wedewe gelovede hem das
Daer naer met hare herbergede helias
12415So dats wiifs kint bleef doot
Doe maecte soe die clage groot
Want soe haer kint hadde verloren
Mar helias badder voren
Ende god verwecket daer telive
12420Helias gaf dat kint den wive
Soe sprac nu houdic mi daer an
Ende wet wel dattu best gods man
Ebreusche boeke gewagen das
Dat dit was die profete ionas
Nader droecheit deser iii iaer
Hiet god heliase aldaer
Tote achab den coninc gaen
Want hi wilt doen reynen saen
Samria hadde hongher so groot
12430Datter menich in bleef doot
Achabs drossate die was
∙I∙ goet man hiet abidias
Die hadde heymelic bestolen[4]
∙C∙ profeten in ∙ii∙ holen
12435Ende gaf hem borne[5] ende broet
Om dat iesabel sloech doet
Gods profeten daer sose bevinc
Om die doget van deser dinc
- ↑ corit: Kerit (Vulg./Hist.Schol. Carith), beek die uitmondt in de Jordaan. Bijbel: 1 K 17:3, Hist.Schol. Lib.III Reg. Cap.XXXIV
- ↑ die beke: zowel in de Bijbel als in de Historia Scholastica zijn het raven die s’morgens en sávonds brood en vlees brengen.
- ↑ morseel: een kleine beet, een beetje, waaruit een stukje een brokje
- ↑ bestolen: van bestelen: Achterhouden, verbergen.
- ↑ borne: hier in de betekenis van bronwater, drinkwater.
