Pagina:Van Maerlant, Rijmbijbel (Hs 10B21, 1332).pdf/159

f72r

Wart sider profete abydias kolom a
¹²⁴⁴⁰Iegen hem quam helias
Ende seide ganc ende sech dinen here
Hier es helias node dediit sere
Die bodschap want soe hem wach
Ende doe achab helias sach
¹²⁴⁴⁵Seidi bestu niet helias fel
Du destrueers al israel
Neen sprac helias du does al
Du die anebeeds baal
Nochtan vergaderde gemene
¹²⁴⁵⁰Al israel groot ende clene
Upten bech te carmele
Ende baals profeten vele
dccc ende also wel
Die voede siin wiif iesabel
¹²⁴⁵⁵Al tvolc entie profeten mede
Vergaderden aldaer ter stede
Helias sprac hiers groot no clene
Van gods profeten dan ic allene
Baals profeten siin hier vele
¹²⁴⁶⁰Roepen nerenst^[1] ende in spele
An haren god ic anden minen
Wien so eerst sal helpe scinen
Dat sine bede si gehoert
Sine bede sal gaen voert
¹²⁴⁶⁵Leggen haer offerande upten outaer
Entie van hemelen sent vier daer
Salmen over god roepen an
Baals profeten loefdent al dan
Mar haer roepen ende haer bede
¹²⁴⁷⁰So secic u dat niet en dede
Helias maecte siin offerande
Ende als hi bat quam altehande
Tvier vanden hemele upten outaer
Dattie offerande verteerde daer
¹²⁴⁷⁵Doe riep al dat volc an gode
Helias deet met sinen gebode
Baals profeten alle vaen
Ende dedese daer alle verslaen
Doe ginc hi upten berch carmele
¹²⁴⁸⁰Ende bad god om reynen vele
So dat hem thoeft hinc tusscen knien
Achab den coninc hiet hi vlien
Tote israel in die stat
Eerne die reyn maecte nat
¹²⁴⁸⁵Achab die vlo in israel kolom b
∙I∙ wint quam ende water snel
Ende god die halp helias
Dat hie snelre dan achab was
Doe iesabel vernam die mare
¹²⁴⁹⁰Hoet met haren profeten ware
Sende soe heliase boden
Ende swoer bi haren goden
Dat soe hem soude doen mede
Dat hi haren profeten dede
Helias wart vervaert om dat
Te bersabe in die stat
Daer lieti sinen garsoen ionas
Dien hi te voren van dode genas
Allene ginc hi metter vaert
¹²⁵⁰⁰Indie woistine ∙i∙ dach vaert
Die doot bad hi om tverdriet
Hi sprac ic en bin beter niet
Dan mine vorders hebben gewesen
In slape wert his saen na desen
¹²⁵⁰⁵Dingel wectene ende bracht hem mede
Water ende broot daer ter stede
Hi seide stant up ende et
Hi at ende daer sliep hi bet
Die ingel wecten anderwarf
¹²⁵¹⁰Ende seide et ic waent di bedarf
Du heves langen weg te gane
Helias at ende hi ginc dane
Entie spise gaf hem die cracht
Dat his vaste ∙xl∙ nacht
¹²⁵¹⁵Ende ∙xl∙ dage oec ginc hi
Tote oreb die heet synay
Aldaer moyses wilen ere
Inden dorne sach ons here
Daer woende in ∙i∙ agedochte
¹²⁵²⁰God vragede hem wat hire sochte
Here seit hi mi haet iesabel
Dine outaere ende also wel
Breecmen dine profeten gemene
Ende ic ben bleven allene
¹²⁵²⁵Doch staensi alle na miin leven
Ende hebben mi daer toe verdreven
Doe seide god du salt wech riden
Ende god sal selve vor di liden
Doe onse here voer hem leet
¹²⁵³⁰Nam elias saen siin cleet

1. nerenst: ernstig