Pagina:Van Maerlant, Rijmbijbel (Hs 10B21, 1332).pdf/161

f73r

Ende verwesen^[1] alle mede kolom a
Benadap vlo in die stede
¹²⁶²⁵In ∙i∙ cleine camerkiin
Mar die seriante siin
Kenden den coninc van israel
Dat hi niet was harde fel
Ende gingen iegen hem uter port
¹²⁶³⁰Ontwapent ende met zacken gegort
Si seiden ten coninc achab
Dit seit diin knape benadap
In bidde nemmeer dan miin leven
Achab heeft hem dat vergeven
¹²⁶³⁵Ghevriende worden die viande
Benadap hi voer te lande
Micheas siin gheselle riet
Alse hem die heilige gheest riet
Slach mi mar die gene en woude
¹²⁶⁴⁰Doe seidi dat hi dan soude
Den liebaert om dat selve slaen
Alsi soude van hem gaen
Want hi tgebod ons heren liet
Ende aldus so eist daer gesciet
¹²⁶⁴⁵∙I∙ andren sachi daer bi
Toten genen sprac hi slach mi
Die sloechem ∙i∙ wonde groot
Dat hem dbloet in dogen vloot
Doe warp hi mul in siin ansichte
¹²⁶⁵⁰Datmen niet kende lichte
Ten coninc seidi doe ter tiit
Doe wi waren in den striit
Bracht mi ∙i∙ man ∙i∙ persemier^[2]
Ende seide wacht mi desen hier
¹²⁶⁵⁵Ontslupt hi du salt siin
Over siin hoeft miin eigiin
Ocht ghelden met dinen goede
Die man ontliep mi uter hoede
Die coninc sprac hoe dat comt
¹²⁶⁶⁰Du heefs di selven gedomt
Micheas saen sine ogen dwoec
Achab kendene ende volcs genoech
Teerst dat hi gedwoegen was
Dit seide god sprac micheas
¹²⁶⁶⁵Om dattu makes dine vrient
Den man die der doot heeft verdient
Sal diin leven voer hem staen
Doe balch die coninc saen
Ende vincne ende daer na kolom b
¹²⁶⁷⁰So keerdi in samaria
Indien tiden leesmen wel
Was ∙i∙ man van israel
Hiet naboth^[3] ende hadde ∙i∙ wingaert
Dien achab langhe hadde begaert
¹²⁶⁷⁵So dat hine te cope sochte
Ende doe hiis hebben niet en mochte
Dedine doot slaen in israel
Dit beriet al iesabel
Die coninginne achabs wiif
¹²⁶⁸⁰Dede nemen naboth dliif
Ende daer hi in den wiingaert was
Quam iegen hem gaende helias
Ende seide du heves den man doot
Ende houts tgoet dats quaetheit groot
¹²⁶⁸⁵Gheliker wiis recht als die honde
Nabots bloet lecten muten monde
So sellen sidat dine lecken mede
Die coninc sprac aldaer ter stede
Waer omme heefstu mi dus leet
¹²⁶⁹⁰Helias sprac god weet
Dattu hous des duvels gebode
Entu dit quade does voer gode
Dies sal god corten dat vandi comt
Ende diin huus sal siin verdomt
¹²⁶⁹⁵Alse ieroboams was ende baasa
Ende iesabel spreect god hier na
Die honde si sellen iesabel
Eten int velt vam israel
Achab scorde siin cleet van vare
¹²⁷⁰⁰Ende dede an ∙i∙ scerpe^[4] hare^[5]
Ende hi sliep oec in ∙i∙ zak
Hem selven dedi ∙i∙ ongemac
Doe sprac te heliase onse here
Achab oetmoedichde hem sere
¹²⁷⁰⁵Sine salicne niet plagen
Aldus hier in sinen dagen
Mar sinen kinder hier naer
Aldus so leeden iii iaer
Datmen mit vreden leefde wel
¹²⁷¹⁰Tusschen surien ende israel
Asa ghi laest te voren dat
Hadde ∙i∙ sone hiet iosafat
Die coninc was van iuda
Gheweldich vanden vader asa

1. verwesen: Te niet gaan, vergaan, wegkwijnen.
2. persemier: woekeraar
3. Naboth was een man die een wijngaard bezat waarop koning Achab zijn oog had laten vallen. Omdat Naboth weigerde zijn land af te staan werd hij vermoord. 1 Koningen 21:1-16
4. scerpe: (scarp) hier in de betekenis van: ruw, grof, onaangenaam voor de huid.
5. hare: boetekleed