Pagina:Van Maerlant, Rijmbijbel (Hs 10B21, 1332).pdf/162

f73v

¹²⁷¹⁵∙I∙ sone haddi hiet ioram kolom a
Tenen wive hidoe daer nam
Achabs dochter van israel
Die hi wan an iesabel
Ende men hietse achalie
¹²⁷²⁰Die god selve vermaledie
Want van hare quam groot quaet
Alse hier voren gescreven staet
Dor dat huwelic ende om dat
So voer die coninc iosafat
¹²⁷²⁵Toten coninc van israel
Ende voer met hem also wel
Orlogen up ramoth^[1] ∙i∙ stede
Mettien achab doe comen dede
Profeten wel ∙c∙ warven viere
¹²⁷³⁰Voer hem van valscher maniere
Ende vragede hem hoet soude vergaen
Oft hi ramoth wilde bestaen^[2]
Doe rieden si allegader dat
Mar die coninc iosafat
¹²⁷³⁵Vraghede es hie geen gods profete
Dat wi doen bi sinen gheete^[3]
Iaet sprac achab hier es micheas
Dies vrient ic noch noit was
Want hi vorseide hem al quaet
¹²⁷⁴⁰Iosafat heet datmer om gaet
Ende doe hi vor den coninc stoet
Sprac hi teersten achab goet
Doe sprac achab ic maendi sere
Voersech mi wat bi onsen here
¹²⁷⁴⁵Doe sprac micheas verstant wel
Ic sach dat volc van israel
Alse herdelose scaep min no mere
Doe seide te mi daer onse here
Hem heden dat here ghebreect
¹²⁷⁵⁰Achab verstaet dat hi spreect
Dat hi siin sterven nam in dat
Ende seide ten coninc iosafat
Ia en weetstu wat dese doet
Hi en profeteerde mi noit goet
¹²⁷⁵⁵Doe seide te hem micheas mere
Ic sach sitten onsen here
Entie ingle goet ende quade
Ende bihem daer staen te rade
Die goede te sire rechter side
¹²⁷⁶⁰Entie quade ter luchterhant omblide
God seide wie sal bedriegen kolom b
Achab den coninc ende liegen
Dat hi sterven in ramoth vare
Doe sprac ∙i∙ vander luchter scare
¹²⁷⁶⁵Ic sal sine profeten doen liegen
God sprac du salten bedriegen
Ende verwinnen sprac micheas
Doe sloegen zedechias^[4]
∙I∙ valsch profete ende bedi
¹²⁷⁷⁰Heeft die heilighe geest gelaten di
Ende toe gesproken dats waer
Micheas die antworde daer
Dat saltu weten daer du salt vlien
Entu diins liegens salt ontsien
¹²⁷⁷⁵Zedechias die versach
Dattie coninc in twifle lach
Ende doe troesthine daer met desen
Hadde dit ∙i∙ waer profete wesen
Mine hant ware worden lam
¹²⁷⁸⁰Alse oec gesciede ieroboam
Hi sendde iegen helias mede
Die seide dat hi daer ter stede
Sterven soude daer sterf naboth
Doe gaf die coninc ∙i∙ ghebot
¹²⁷⁸⁵Datmen michease soude vaen
Tote dat dorloghe ware gedaen
Die coninc achab ende met hem
Iosafat van iherusalem
Voeren te ramot galaat
¹²⁷⁹⁰Die coninginne verciert sat
Mar die coninc van surien
Hiet dien met sire partien
Dat si nieman sochten el
Dan den coninc van israel
¹²⁷⁹⁵Ende doe si iosafatte sagen
Begonden si up hem iagen
Ende waenden dat achab ware
Doch dat siis worden geware
Ende ∙i∙ vanden heren scoet
¹²⁸⁰⁰∙I∙ scicht^[5] ende scoet achab doet
Indien wagen daer hi sat
Die wagen wert binnen nat
Van sinen bloede ende daer na
So voerdemen in samaria
¹²⁸⁰⁵Daer groefmen als ict hore
Bider zale van sinen yvore

1. Ramoth-Gilead: een stad op de hoogten van Gilead ten oosten van de Jordaan.
2. bestaen: m.b.t. een land, stad of gebouw: aanvallen, belegeren.
3. gheete: van heeten hier in de betekenis van gebieden, zeggen
4. zedechias: Sidkia (Vulg. Sedechias Hist.Schol. Sedecias), vals profeet ten tijde van Achab. Bijbel: 1 K 22:24, Hist.Schol. Lib.III Reg. Cap.XXXIX
5. scicht: pijl