Pagina:Van Maerlant, Rijmbijbel (Hs 10B21, 1332).pdf/164

f74v

Ende hi sende sine boden kolom a
Om antworde an die afgoden
God sende heliase in haer gemoet
¹²⁸⁹⁰Die seide wat eist dat ghi doet
Es in israel geen god
Ghi soect belsebucs ghebod
Hier omme en sal ochosias
Niet genesen siit seker das
¹²⁸⁹⁵Si keerden ende seiden ten coninc dan
Hi vragede hoedaen^[1] was die man
Si seiden ru ende gegort
Met ∙i∙ gordele als hiit hort
Seidi het was elias dan
¹²⁹⁰⁰Doe sendde hi om ∙i∙ man
Ghewapent met ∙L∙ gesellen
Hi quam te hem dus horen wi tellen
Ende seide gods man die coninc hiet
Dat ghi tehem comt ghereet
¹²⁹⁰⁵Helias sprac ben ic gods man
Tfier vanden hemele come dan
Ende verbernedi ende dine scare
Dit gesciede tehant dare
Noch ∙i∙ sende ochosias
¹²⁹¹⁰Die van zelker meninge was
Ende die dat selve tote hem sprac
Ende smaecte dat selve onghemac
Den derden sender ochosias
Dat waenmen dat abdias^[2] was
¹²⁹¹⁵Ende met hem ∙L∙ tere scaere
Die quame voer heliase al quare
Die knielde ende bad genade helien
Vorhem ende vor sine partien
Die ingel sprac ganc daerwaert
¹²⁹²⁰Met hem ende wes onvervaert
Ten coning ginc hi met gheninde^[3]
Ende seide dat hi daer bode sinde
An belsebuc al openbare
Als ocht geen god in israel ware
¹²⁹²⁵Dies saltu sterven sprac helias
Doe starf die coninc ochosias
ii iaer regneerdi als ict vernam
Na hem wert coninc siin broeder ioram
Want geen kint bleef van hem
¹²⁹³⁰Die coninc van iherusalem
Die hiet ioram alo wel
En hadde sconinc van israel
Suster te wive achalien kolom b
Dies ghi horet te voren lien
In dien tiden horic talen
Wilde god heliase up halen
Ende hi ginc doe in galgala
Ende heliseus volgede na
Bliif hier sprac hi du does wel
¹²⁹⁴⁰Hi sprac god setmi in betel
Doe swoer hi dat hiis niet dade
Die heilige geest seidem in rade
Dat siin meester soude te waren
Indien tiden tehemele varen
¹²⁹⁴⁵Ende teerst dat si quamen ginder
Quamen der profeten kinder
Tote eliseuse in betel
Ende seiden heimelike wistu wel
Datmen diin here oec heden
¹²⁹⁵⁰Dragen sal ter hogher steden
Swiget seithi ic weet vor waer
Doe hieten helias bliven daer
Mar heliseus wilde niet so
Doe quamen si in ierico
¹²⁹⁵⁵Daer seidemen die favele mare
Mar helias hieten bliven dare
Mar hi en hilter hem niet ane
Doe quamen si beide ter iordane
Ende ∙i∙ der profeten kinder
¹²⁹⁶⁰Sagen comen van verre ginder
Sinen mantel voude helias
Twater sloechi als ict las
Ende het sciet hem in corter stont
Over gingen si upten gront
¹²⁹⁶⁵Helias sprac ten papen toe
Bid dattu wilt dat ic di doe
Eer ic van die werde verheven
Heliseus bad ∙i∙ rike geven
Ic bidde dat diin geest si
¹²⁹⁷⁰Twivoudich here vort in mi
Helias hadde dus horen wi lien
Den heiligen geest der profetien
Ende oec ter miraclen mede
Dit was die twivoudichede
¹²⁹⁷⁵Ochtmen macht verstaen dus
ii dode verwecte eliseus
Ende elias mar eenen
Dit mach twivoudichede menen

1. hoedaen: hoedanig
2. abdias: Obadja (Vulg. Abdias Hist.Schol. Abdiam (acc.)). Hij was hofmeester van koning Achab en, aldus Maerlant en Comestor, later profeet. Wsch. is er in de bijbel echter sprake van twee verschillende personen, t.w. de hofmaarschalk van koning Achab (1 K 18:4-5) en de profeet aan wie het bijbelboek Obadja wordt toegeschreven. Zie Bijb.Enc. s.v. obadja, bet. 5 resp. 7. Bijbel: Hist.Schol. Lib.III Reg. Cap.XXXV
3. gheninde: vrijmodig, onbeschaamd, met zelfvertrouwen