Pagina:Van Maerlant, Rijmbijbel (Hs 10B21, 1332).pdf/165

f75r

Du bids seiti bede svare kolom a
¹²⁹⁸⁰Mar siestu als ic up vare
So es die bede ghehort
Wel cortelike na dese wort
Dat si gingen hare verde
Quam van viere wagene ende perde
¹²⁹⁸⁵Diese doe beide versceden dede
Helias die voer upter stede
Ende voer wech te hemele waert
Heliseus die voer upwaert
Ende riep wel lude vader miin
¹²⁹⁹⁰Helias nam den mantel siin
Ende warpene heliseuse neder
Ter iordane keerdi weder
Ende sloech twater metten clede
Mar niet en scietsi hem gherede
¹²⁹⁹⁵Doe seidi waer es die es god helias
Doe sloechi dwater als ict las
Doe sciet die flume^[1] in corter stont
Ende hi ginc over upten gront
Doe gint^[2] der profeten kinder
¹³⁰⁰⁰Sagen die noch waren ginder
Seidsi dattie geest helias
Up heliseuese gherust was
Ende liepen hem allegader iegen
Ende anebedene ende negen
¹³⁰⁰⁵Van heliase hebben beheten^[3]
Ons die heilighe profeten
Dat hi noch ende enoc mede
Tote iherusalem in die stede
Antkerst sellen weder staen
¹³⁰¹⁰Mar hi salse daer bede doot slaen
Heliseus die quam do
Ghewandelt in iherico
Daer hi dat water genas
Dat te voren so bitter was
¹³⁰¹⁵Ende met zoute maecte goet
Alsmen noch twiwater doet
Van danen ginc hi in betel
Daer maectemen met hem spel
Kinder ∙xl∙ ende ii nochtan
¹³⁰²⁰Ende seiden clem up caleman
Doe vloecte hise in gods namen
Mettien worde ii beren quamen
Uten woude diese verbeten
Die xlii kinder wildiit weten
¹³⁰²⁵Die ioden die dus hilden spot kolom b
Dat naect ende cale hinc god
Dat hi clam up tcruce te waren
Dat xlii kinder oec waren
Betekent dat xlii iaer
¹³⁰³⁰Na die passie gods dats waer
Tytus ende siin vader vaspasianus
Utem wilden roemschen huus
Quamen die ii beren tewaren
Ende scorden die iodsche scaren
¹³⁰³⁵Heliseus die ginc daer na
Wonen in Samaria
Achabs sone die coninc ioram
Daer ic te voren die tale af nam
Ontfinc die crone dats waer
¹³⁰⁴⁰In iosafats vii iaer^[4]
Ende xii iaer was hi here
Die afgode dedi wech sere
Die siin vader brochte int lant
Mar donghelove ieroboam vant
¹³⁰⁴⁵Van den calve daer bleef hi an
Ende micheas die scalt den man
Dien sloechi doot om tverwiten
Die coninc vanden moabiten
Gaf ∙c∙ lammer telken iare
¹³⁰⁵⁰Ende ∙c∙ hamele^[5] tere scare
Te tsentse dien van israel
Doe achab starf verstaet wel
Wildiit vortmeer laten liden
Ioram quam up hem striden
¹³⁰⁵⁵Met hem was coninc iosafat
Die noch levede ende noch bat
Die coninc van ydumea
In ∙i∙ woistine waer si daer na
Algader van dorste doot
¹³⁰⁶⁰Doe was omboden dor die noot
Heliseus die seide god sal
U waters genoech geven al
Ende daer toe in uwe hande
Die moabiten u grote viande
¹³⁰⁶⁵Die porten siin in u gewout
Ende selt verbernen boem ende hout
Ghi selt verstoppen die fonteinen
Entie ackere met stenen ontreynen
Datmer geen coren winnen sal
¹³⁰⁷⁰Entie dinc ghesciede al

1. flume: rivier
2. gint: gene
3. beheten: voorspellen, beloven, toezeggen
4. vii iaer: achttien jaar volgens de Vulgaat en de Historia Scholastica.
5. ∙C∙ hamelen: in de Vulgaat en de Historia Scholastica heeft men het over honderd duizend lammeren en honderd duizend rammen