Pagina:Van Maerlant, Rijmbijbel (Hs 10B21, 1332).pdf/166

f75v

Also alst heliseus seide kolom a
So datmen die hoeftstat beleide
Entie coninc waende ontfaren
Met vii∙M ^[1]tere scaren
¹³⁰⁷⁵Mar hi wart weder in gedaen
Doe nam hi sinen sone saen
Die na hem crone soude dragen
Daert alle die coninc toe sagen
Ende offerden gode tere offeranden
¹³⁰⁸⁰Upten mur quamen die viande
Updatten god losse uter noot
Doe sloechi sinen sone doot
Doe ontfarmers so den heren
Dat si te lande voeren met eren
¹³⁰⁸⁵Iosafat voer in iherusalem
Iehu quam doe iegen hem
Ende scalten dat hi helpe dede
∙I∙ man die afgode anebede
Daer na bleef abdias doot
¹³⁰⁹⁰Die ∙C∙ profeten uter noot
Hilt ende voede doe iesabel
Den goeden liede was so fel
Siin wiif riep heliseuse an
Here nu es doot miin man
¹³⁰⁹⁵Ende bleef sculdich here ghelt
Vanden propheten die hi helt
Nu comt dies die scult es
Om mine kinder ontfermet u des
Hem te dienne omme die scout
¹³¹⁰⁰Heliseus hads onghedout^[2]
Ende sprac wat heeftstu in diin huus dan
∙i∙ wel lettel olien gods man
Ganc henen seithi dire straten
Lene te diren geburen wel vaten
¹³¹⁰⁵Ende beloken doren met dine kinden
Ghiet vol die vaten dus dede soe sinden
Omme die vate ende dede also
Die worden vol olien dies was soe vro
Ende doe seide die man
¹³¹¹⁰Vercoep dine olie ende ghelt dan
Hem die die perse an drivet
Ende dattu boven der scult blivet
Daer saltu selve leven bi
Entie dine dus radic di
Heliseus soude daer na
Dor ∙i∙ stat liden hiet sima^[3]
Daer woende ∙i∙ wiif was vroet kolom b
Ende talreerst dat soe verstoet
Datter was ∙i∙ heilich man
¹³¹²⁰Deedsone met hare eten dan
So dat hi dicke^[4] quam ter stat
Doe riet soe haren man dat
Dat hi maecte ∙i∙ camere daer
Heliseus quam dicke naer
¹³¹²⁵Met sinen goeden knape gyesi
Ende bi hem so verstont hi
Dattie vrouwe nie kint gewan
Ende dathi out ware di man
Heliseus beloefde haer een
¹³¹³⁰Alset saen daer na sceen
Want soe eens kints genas
Ende als kint gewassen was
Sout in ∙i∙ oeste^[5] gaen
Te sinen vader het wert siec saen
¹³¹³⁵Het bleef doot daer in corter wilen
Die moeder namt sonder ghilen^[6]
Ende leit daer up tbedde heliseus
Ende ginc danen ende bracht thuus
So dat soe te heliseuse quam
¹³¹⁴⁰Bi sinen voeten soene nam
Ende clagede de doot vanden kinde
Dat hare god te miraclen sinde
Heliseus sprac tote gyesi
Nem minen stoc hietic di
¹³¹⁴⁵Ende ganc wech in corter stont
Lech dien up tkints mont
Doe gyesi was wech gegaen
Swoer die vrouwe sonder waen
Soe sciede van hem niet hoet ware
¹³¹⁵⁰Doe stont hi up ende ginc met hare
Gyesi gemoeten na desen
Ende seide tkint ware niet genesen
Mar heliseus quam daer ter stede
Ende voegede hem an tkints lede^[7]
13155Ginder bad hi van den hemele gode
So dat vleesch verwarmede tode^[8]
Ende tkint verrees van dode te live
Ende gaft levende den wive
In galgala ginc hi als wiit horen
¹³¹⁶⁰Want hi danen was geboren
Doe hi geboren was ter wile
Tgoudine calf dats gene ghile

1. vii∙M: zeven honderd in de Vulgaat.
2. onghedout: ongeduld
3. sima: moet suna zijn: Sunem (Vulg. Sunam, Sunem Hist.Schol. Sunam), stad in de vlakte van Jizreël. Bijbel: 2 K 4:8, Hist.Schol. Lib.IV Reg. Cap.VI
4. dicke: dikwijls, vaak, veelvuldig
5. oeste: oogst
6. ghilen: spotten (met), verlangen (naar)
7. lede: lichaamsdeel, hier op te vatten als lichaam
8. tode: het dode