Pagina:Van Maerlant, Rijmbijbel (Hs 10B21, 1332).pdf/169

f77r

Doe beraus hem ende hi ginc naer kolom a
Heliseus was aldaer
Thuus ende met hem ∙i∙ deel der oude
¹³³⁵⁰Doe vorseidi dattie coninc woude
Ende hiet datment hem bename
Totien dattie coninc quame
So datmen die boden vernam
Doe sprac hi als die coninc quam
¹³³⁵⁵Ende hi vorseide sonder gile^[1]
Dat margiin ter selver wile
Die tiit soude siin goet
Doe sprac ∙i∙ die daer bi stoet
Dat het niet mach gescien
¹³³⁶⁰Heliseus sprac du salt sien
Ende nembermeer ombites^[2] diin mont
Doe waren daer ter selver stont
Laserse die vor die porte lagen
Ende van hongre sere clagen
¹³³⁶⁵Die toten tenten ghelopen quamen
Ende niemene altoes vernamen
Want god hadde veriaget there
Dat gevloen was sonder were
Die laserse aten daer genoech
¹³³⁷⁰Ende namen daer roef genoech
Ende heliseus wort wert ware
Ende diene weder seide dare
Die was in die porse^[3] groot
Vor die porte gerreden doot
Als benadap wiste die mare
Datten god veriagede dare
Ende datter noyt toe en quam
Wart hi van rouwen siec ende gram
Heliseus quam te damas
¹³³⁸⁰Benadap die sere siec was
Sende sinen bode na desen
Te vragene om siin genesen
Teerst troesten heliseus wel
Daer na nam hi asael
¹³³⁸⁵Over side ende hem seide al bloot
Dat die coninc ware doot
Ende dat hi soude wesen here
Oec weende heliseus sere
Om die plaghe die asael
¹³³⁹⁰Soude doen dien van israel
Oec so seidit hem te voren
Benadap als wiit horen
Starf ende asael wart here kolom b
Alse heliseus vorseide oec ere
¹³³⁹⁵Nu moet die tale van hem bliven
Want ic moet ∙i∙ deel bescriven
Van iosafats sone ioram
Hoe hi sinen inde nam
Int vifte iaer alse ioram
¹³⁴⁰⁰Achabs sone die crone nam
Was coninc ioram na iosafat
Tote iherusalem in die stat
Die crone so droech viii iaer
An afgode hilt hi hem dats waer
¹³⁴⁰⁵Bi siins wiifs rade achalien
Die van edom met hare partien
Entie hem waren onderdaen
Die siin hem nu af gegaen
Ioram tellet die ware lesse
¹³⁴¹⁰Sloech doot sire broeder sesse
Ende dwanc die van iherusalem
Afgode te anebedene met hem
Doe quam tehem ∙i∙ hiet elias
Niet diere wech gevoert was
¹³⁴¹⁵Ende vorseidem plage ende verlies
Mar hi en achte niet dies
So dat hi qual^[4] ende bleef doot
Dat hem tgedarmte ute scoot
Ende men groevene in davids stat
¹³⁴²⁰Niet coninclike na al dat
So lese ic dattie goede ochosias
Na den vader coninc was
Selc leven leidi algader
Alse ioram dede siin vader
¹³⁴²⁵Siin moeder leret hem achalie
Oec voer hi met sire partie
Met sinen oem van israel
Orlogen iegen asael
Daer wert die coninc ioram gewont
¹³⁴³⁰Ende hi liet ter selver stont
Ihehuwe there van israel
Ende voer ligen in israel^[5]
Ende met voer oec ochosias
Die coninc van iherusalem was
Heliseus die sende ginder
Een der profeten kinder
Tote ihehu in dat here
Dat hine coninc sacrere

1. gile: zonder gekheid, in ernst
2. ombiten: (ontbiten): in een ontkennende zin: geen hap eten
3. porse: (perse) gedrang (van mensen), opeendringende menigte
4. qual: van quelen, lijden van ziekte of gebrek
5. israel: hier in de betekenis van Jizreël