Pagina:Van Maerlant, Rijmbijbel (Hs 10B21, 1332).pdf/171

f78r

So groefmen in samaria kolom a
Ioatas wert coninc daer na
Iehu droec xxxviii^[1] iaer
Die crone van israel dats waer
¹³⁵³⁵Aldus eist vergaen met hem
Nu hort van dien van iherusalem
Achalie horde die niemare
Dat haer man verslegen ware
Ochosias dede soe ontliven
¹³⁵⁴⁰Om dat soe vrouwe soude bliven
Alle die coninc kinder
Mar ∙i∙ sone ontscoter ginder
Iasaba^[2] die dochter ioram
I ochosias suster als ict vernam
¹³⁵⁴⁵Mar niet van ∙i∙ moeder
Mar die coninc was haer broeder
Haer man was bisscop ioiadas
Ende dat kint hiet ioas
Inden tempel onthilt siit daer
¹³⁵⁵⁰Wel heimelic viii der iaer
Ioiadas gaderde int vii iaer
Die princen vanden lande daer
Ende togede hem des coninx sone
Hulde swoeren hem alle die gone
¹³⁵⁵⁵Iegen die valsche achalie
Ende met groter symonie^[3]
Sacreerde de bisscop ioiadas
Tenen coninc den iongen ioas
Achalie vernam die mare
¹³⁵⁶⁰Ende quam gelopen aldare
Haer cleder soe van rouwen sleet
Ende ioiadas die bisscop heet
Datmen hare thoeft af sla
Buter porte hoe dat ga
¹³⁵⁶⁵Vro was al tvolc vanden lande
Dat si quite waren der scande
Van ∙i∙ quaets wiifs bedwange
Daer na voeren si eer iet lange
Ende braken den tempel baal
¹³⁵⁷⁰Enten outaer entie beelden al
Die achalie maecte ioram
Baals papen daer toe men nam
Versloegen si vorden outaer
Ioas was out vii iaer
¹³⁵⁷⁵Alsmenne sacreerde wet wel
In ihehus xiii iaer van israel
Ende in ioiada xl iaer
Was hi here wet vor waer kolom b
Wet oec wel dat hi goet was
¹³⁵⁸⁰Also lange alse levede ioiadas
Oec hiet die coninc ioas
Om dat twerc te vallen was
Anden tempel gods van ouden
Den papen dat siit doen maken souden
¹³⁵⁸⁵Som bract oec achalie al
Ende maecter af tempel baal
Doe maectement metter offeranden
Dat volc gaf dat ginc durden landen
Ende mettien dat si wilden geven
¹³⁵⁹⁰Die gode baden om haer leven
Alsmen te wige soude gaen
Int xxxiii iaer sonder waen
Ende mochtment al gecosten niet
Mettien ioiadas maken hiet
¹³⁵⁹⁵∙I∙ bloc dien die boeke som
Heten gazofilatium^[4]
Ende metten gelde datmer vant
Maectemen twerc vort tehant
Doe starf die bisscop ioiadas
¹³⁶⁰⁰Daer ic eeskine^[5] af las
Sider dat moyses bleef doot
Dat niemans oude was so groot
Hi leefde ∙C∙ ende xxx iaer
In davids stat groefmen dats waer
¹³⁶⁰⁵Om dat hi crone met crachte
Weder brochte in davids gheslachte
Na sinen doot so wart besmet
Die coninc ioas ende liet die wet
Ende menich man als ic las
¹³⁶¹⁰Ioiadas sone zacharias
Castidene vander misdaet
Mar was dat vule quaet
En dochte om die ere niet
Die hem die vader beriet
¹³⁶¹⁵Hi steende zacharias ginder
Ende met hem al sine kinder
Sonder ∙i∙ die sider was
Na hem geheten zacharias^[6]
Tusschen den coprinen outaer
¹³⁶²⁰Enten tempel dats waer
Dit was dinderste^[7] kerhof^[8]
Ioas nam selve loen hier of
Asael die coninc van surien
Quam up met sire partien

1. xxxviii iaer: volgens 2 Kon.10:36 28 jaar in plaats van 38 jaar.
2. iasaba: Jehoseba (Vulg. Iosaba Hist.Schol. Josaba), dochter van koning Joram van Juda. Zij redde de jonge Joas van de moordlustige koningin-moeder Atalja. Bijbel: 2 K 11:2, Hist.Schol. Lib.IV Reg. Cap.XVI
3. symonie: fout van de copiïst in ander hanschrift luidt dit: ‘Ende met groter singerie. Sacrerde die bisscop ioiadas. Tenen coninc den ionghen ioas. Rijmb. p. 327, r. 15-22, West-Vlaanderen, 1285 singerie betekent pracht en praal.
4. gazofilatium: Plaats waar kostbaarheden bewaard worden schatkist, -kamer.
5. eeskine: -kin is een verklein woord, eeskin niet gevonden in mnw of vmnw. Eenkin of eenskine: allengs, lanzamerhand,
6. zacharias: Zekarja, zoon van Zekarja. Deze persoon wordt noch in de Vulgaat noch in de Hist.Schol. vermeld.
7. dinderste: het binnenste
8. kerhof: zou kerkhof moeten zijn