Pagina:Van Maerlant, Rijmbijbel (Hs 10B21, 1332).pdf/191

f88r

Wiltune minnen ende ontsien kolom a
¹⁵³⁵⁰Doe seidi noch meer van dien
Oec seggic di sone mede
Dat ic te rages in die stede
Die staet int lant van meden
Hebbe gheleent bi sekerheden
¹⁵³⁵⁵Gabele van selvere ∙x∙ marc
Om dattie vorwarde si starc
Hebic ∙i∙ cyrografe van hem
Bedi lieve sone so nem
Den brief ende soec ∙i∙ bode
¹⁵³⁶⁰Die ghetrouwe es in gode
Entie om sinen loen metti
Ga ende gef den brief van mi
Gabele ende ontfanc diin goet
Die sone gaet uut ende doet
¹⁵³⁶⁵Gherne dattie vader hiet
Als hi uut comt vint hi ghereet
∙I∙ ionghelinc voer hem staende
Up ghescort^[1] tobias waende
Dat ∙i∙ gangre^[2] hadde gewesen
¹⁵³⁷⁰Ende groetene saen na desen
Het was die ingel rafael
Die hem weder antworde wel
Ende berechte hem dat hi alle die steden
Alle kinde int lant van meden
¹⁵³⁷⁵Ende gabele kinde hi oec wale
Thobias na dese tale
Maecte dit den vader cont
Ende leidene ter selver stont
Aldaer daer siin vader lach
¹⁵³⁸⁰Die oude die noch niet en sach
Rafael groetenen ende hi
Seide bliscap si met di
Tobias antworde te desen
Wat ioien^[3] sal met mi wesen
¹⁵³⁸⁵Ic sitte in die dempsterhede
Ende sie niet dlicht gods mede
Rafael antworde die goede
Wes starc ende vast indinen moede
Het sal varinghe^[4] hier na wesen
¹⁵³⁹⁰Dattu bi goden salt genesen
Mettien die oude man besochte^[5]
Ocht hi siin kint leiden mochte
Tote gabele in rages
Rafael antworde des
¹⁵³⁹⁵Ic ledene daer dat si u cont kolom b
Ende bringen weder gesont
Tobias sprac segt mi ioghelinc
Ende berecht mi van ∙i∙ dinc
Wanne du best so doestu wel
¹⁵⁴⁰⁰Ic ben van dien van israel
Sprac rafael die dingel was
Mine name es azarias
Des goets ananias^[6] sone
Na die wort so seide die gone
¹⁵⁴⁰⁵Alwaer si al ontbonden siin
Uten ebreuschen in latin
Want si bedieden dat hi ware
∙I∙ van alder groter scare
Die gode scouwen ende oec mere
¹⁵⁴¹⁰Helpere van des gods ere
Tobias sprac du best gheboren
Van groten lieden als wiit horen
Doe redemen hem daer sonder vortse^[7]
Wat so hem inden wech bedorste
¹⁵⁴¹⁵Ende si porden in corter stont
Ende hem volgede na ∙i∙ hont
Die moeder die weende anne
Ende sprac aldaer tharen manne
Den palster^[8] van onser oude
¹⁵⁴²⁰Heefstu wech gesent te houde
Ic wilde winie hadden bekent
Tghelt daeromme dune heefs gesent
Onse armoede was ongevoech
Dat wi vor riicheit ende genoech
¹⁵⁴²⁵Wel rekene mogen dat gone
Dat wi sagen onsen sone
Tobias seide wene niet ∙i∙ twint
Ons sal weder onse kint

1. ghescort: Met van onderen opgebonden kleren zodat deze de grond niet raken eig.: (m.b.t. kleren) opgenomen, opgebonden.
2. gangre: reiziger
3. ioien: vreugde
4. varinghe: spoedig, weldra
5. besochte: van besoeken, hier in de zin van vragen
6. ananias: Ananja (Vulg./Hist.Schol. Anariae (gen.)). De engel Rafaël stelt zich aan Tobias voor als Azarja ('de hulp van Jahwe'), zoon van Ananja ('de genadigde van Jahwe'). Bijbel: Tob 5:18
7. vorste: In de verbinding sonder verste: zonder uitstel, onmiddellijk, onverwijld
8. palster: m.b.t. een persoon: steun, hulp, toeverlaat