Pagina:Van Maerlant, Rijmbijbel (Hs 10B21, 1332).pdf/193

f89r

Daer na sciere ghevel kolom a
Dat si quamen daer iaghuel
Woende ende herbergeden daer
Raguel seide daer naer
¹⁵⁵²⁵Te sinen wive dese dinc
Sie hoe wel dese ionghelinc
Gheliict mine neve tobias
Die ingel antworde das
Hets recht hets tobias sone
¹⁵⁵³⁰Raghuel was om tgone
Blide ende maecte werscap groot
Tobias die sprac al bloet
No in drinke no in ete
En si dat i alreerst wete
¹⁵⁵³⁵Dattu mi wilt doen mine bede
Entu mi wilt hier ter stede
Sarren dire dochter geven
Raghuel die es bleven
Intwifele ende in vare groot
¹⁵⁵⁴⁰Die ingel sprac al bloot
Wes onvervaert ende geffe desen
Soe sal siin te rechte wesen
Nieman mochtse ye hebben el
Doe antworde gaguel
¹⁵⁵⁴⁵Ic weet wel dattu bode
Ember comen best van gode
Ende god heeft ontvangen mede
Mine trane ende mine bede
Dat miin dochter doch sal wesen
¹⁵⁵⁵⁰Na moyses wet die wi lesen
An hare gheslachte comen
Raguel die heeft genomen
Sire dochter rechter hant
Ende gafse tobiase tehant
¹⁵⁵⁵⁵Hi seide di selve god
Daer onse vorders af hebben gebod
Die si met u beiden
Ende doe u te samen goet liif leiden
Ende vuulle u oec mede
¹⁵⁵⁶⁰Met sire behendichede
Si maecten thuwelic ende saten
Ende benedieden gode ende aten
Navonts leedemen tobias
Indie camere daer sarra was
¹⁵⁵⁶⁵Daer na tehant die iongelinc
Vanden vissche dien hi vinc
∙I∙ deel der levere die hi sciere kolom b
Also leide upten viere
Rafael nam den viant
¹⁵⁵⁷⁰Int hoghe egypten hine bant
Indie woistine die groot was
Toter maget sprac tobias
Sarra minne laet on sere
Gode bidden onsen here
¹⁵⁵⁷⁵Dese iii nacht dus selle wi
Gode genoecht wesen bedi
Ter vierder nacht selle wi na desen
In ons selves huwelic wesen
Want onse vorders siin heilighe liede
¹⁵⁵⁸⁰En ware niet goet dat gesciede
Dat wi vergaderden als heidine diet
Die van gode weten niet
DDaer bleven si beide in haer gebede
Ende baden gode ende seiden mede
¹⁵⁵⁸⁵Ontfarme onser dur diin gewelt
God daer hem onse gheslachte an helt
Dat wi onse gesonde behouden
Ende wi tesamen verouden
Omtrent midnacht dedi niet el
¹⁵⁵⁹⁰Die goede man raguel
Dan hi ∙i∙ graf maken dede
Te gravene inder heimelichede
Tobiase ende sender ∙i∙ ioncwiif
Ware te nemene om siin liif
¹⁵⁵⁹⁵Die quam weder ende seide tehant
Dat soese beide gesont vant
Ende dat si tegader sliepen
Si dancten gode daer si up riepen
Ende vulden weder saen dat graf
¹⁵⁶⁰⁰Eer onse here den dach gaf
∙I∙ werscap maecti daer ter ure
Onder maghe ende ghebure
Oec beswoer hi also wel
Sinen swaeslinc^[1] raguel
¹⁵⁶⁰⁵Dat hi met hem ii weken ware
Oec so gaf hi hem aldare
Half siin goet hi hadden lief
Oec so maecti ∙i∙ brief
Dat na siin liif ende also geel
¹⁵⁶¹⁰Siin soude siin dat ander deel
Toten ingel sprac tobias
Dat hi waende dat ∙i∙ man was

1. swaeslinc: schoonzoon