Pagina:Van Maerlant, Rijmbijbel (Hs 10B21, 1332).pdf/195

f90r

Waren oec tobias maghe kolom a
Entie gebure dats gene saghe
¹⁵⁶⁹⁵Quamen ende waren met hem vro
Ende loveden gode aldo
Tobias telde sinen vader
Die hoefscheit^[1] algader
Die hem gedaen hadde alle weghe
¹⁵⁷⁰⁰Die ingel in genen weghe
Dien hi nochtoe hilt vor man
Mettien namen die vader dan
Over side^[2] entie goede sone
Dancten hem om tgone
¹⁵⁷⁰⁵Oec seiden si lieve vrient azarias
In hoefsceden bidden wi di das
Dattu neems in goeden moede
Die heelft geel van desen goede
Dat inden wech es brocht
¹⁵⁷¹⁰Dus hebben si den ingel besocht
Rafael sprac heimelike
Benediit gode van hemelrike
Vor alle die liif hebben ontfaen
Beliet siins hets wel gedaen
¹⁵⁷¹⁵Want hi hevet gedaen met ons mede
Sine grote ontfarmichede
Datmen dect^[3] des coninx raet
Ende sinen sin dats niet quaet
Ende datmen gods werc openbare
¹⁵⁷²⁰Ende datmen predike die eerlike mare
Ic wil nemmee tesen male
Bedecken^[4] verhoelne^[5] tale
Bedinge^[6] die es harde goet
In vastene alsmen aelmossene doet
¹⁵⁷²⁵Als du waers in diin gebede
Enti liets diin oren mede
Entu desckes die dode bi dage
Ende nachts groefs dats gene saghe
So was dan daer af bode
¹⁵⁷³⁰Die dine bede droech vor gode
Want du gode bequaems^[7] in desen
So mostu geproeft wesen
Nu sende mi god dat hi woude
Dat hi di genesen soude
¹⁵⁷³⁵Ende veriagede den helschen keitiif
Van sarren diins soens wiif
Ic ben gods ingel rafael
∙I∙ vanden vii merct wel
Die altoes vor gode staen kolom b
¹⁵⁷⁴⁰Doe si dat horden sonder waen
Worden si bevende ende bevaen
Ende vielen dansichte neder saen
Dingel sprac met u si vrede
Ende siit niet in vare mede
¹⁵⁷⁴⁵Als ic was met u docht u dat
Dat ic niet met u dranc ende at
Mar minen dranc ende mine spise
En siet geen man in gere wise
Nu eist tiit dat ik kere weder
¹⁵⁷⁵⁰Tehem die mi sende hier neder
Mettien en sagen sine nemme
Daer lagen si neder si twe
Ende benediden gode onsen here
Ende dancten hem sire miracle sere
Tobias daer toe ter stont
Stoet up ende ondede den mont
Ende seide here van hemelrike
Du best groot nu ende ewelike
Du ghesels ende behouds mede
¹⁵⁷⁶⁰Du geefs na rouwe vrolichede
Nieman mach dire hant ontvlien
Doe troeste hi vort mettien
Alle die gevangne te samen
Dat si bi hem exemple namen
¹⁵⁷⁶⁵Entie stat van iherusalem
Die noch stoet dat si na hem
Exemple name ende haer bekere
An gode onsen rechten here
Ende dat si souden siin gerecht
¹⁵⁷⁷⁰Ende an gode geloven echt
So soude god uptie stede
Keren sine ontfarmichede
Oec so vintmen van hem
Dattie van iherusalem
¹⁵⁷⁷⁵Profeteerden daer ter steden
Ende seiden di sellen anebeden
Alle die landen diemen mach nomen
Vele van verren sal tote di comen
Ende bringen offerande ende anebeden
¹⁵⁷⁸⁰Gode aldaer inder steden
Dats kerstiin volc verre ende wide
Noch ii steden besochtti ten stride
Ende vele meer vorseidi mede
Dan ic dichte hier ter stede

1. hoefscheit: fijne vormen, beschaafde manieren, welopgevoedheid, welgemanierdheid, beleefdheid, heuschheid, wellevendheid, beschaafdheid van manieren en zeden
2. overside: terzijde, apart
3. decken: geheim houden, verbloemen
4. bedecken: geheim houden, verbloemen
5. verhoelne: (verholen) verborgen geheim gehouden heimelijk mysterieus
6. bedinge: gebed
7. bequaems: van becomen: met een persoon in de datief: behagen, bevallen, aanstaan, geschikt lijken