f3v
Dus proevent[1] meesters al in rechte
kolom a
Des viiften dages maecte onse here
Water ende lucht met groter ere
Der lucht gaf hi dat vliegen conde
Dat swemmen conde ginc te gronde
Vische ende vogele maecte hi daer
270Vanden watre dat es waer
God maecte alle dinc die roert
Cleyne ende groet dat water voert
Ende wat so gaet ende vlieget
Bedi[2] mesdoet hi ende lieget
275Die seit dat hi yet maken conde
Die quade gheest sonder die sonde
Doe seinthiit[3] al ende benedide
Omdat hi wilde dat wel dide
Ten sesten dage vercierde god
280Die erde na siin ghebod
Dat soe beesten brochte vort
Hi wiste wel merct ende hort
Dat die mensche vallen soude
Mar dor sine doget hi woude
285Den mensche beesten geven
Om te verlichten dat sware leven
Beesten merct dat wordekiin saen[4]
Heetsi om dat si ons bestaen
Nu vragemme of die goedertiere
290God maecte fie felle diere
Entie ghevermiinde vor adaems sonden
Die redene hebic aldus vonden
Dat alle diere sonder waen
Ghemaect waren onderdaen
295Den mensche te sine embermere
Had hi ghehort na onsen here
Want nader misdaet alst wel sciint
Worden sie fel ende gevermiint
Ende staende na sinen scade
300Oec mede om sine misdade
Seggen ons die heilige lude
Dattie bomen entie crude
Die nu wassen vruchteloes
Moetent ontgelden altoes
305Vander misdaet van adame
Sonne ende mane van groter scame
Sterre ende oec die diere stene
En behilden mer allene
Van hare cracht dat viifte deel
310Te voren hadsiet al geheel
kolom b
Doe seide god make wi den man
Nu merct ende verstaet hier an
Tote wien seidi make wie
Der personen so sin drie
315Die drievoudichede sprect gemene
Dits den mensche ∙i∙ ere niet clene
Datten god maecte mit vroeden rade
Al maecte hiit mit sire genade
Alle die andre creaturen
320Hi en sprac niet thare naturen
Alse god toten mensche dede
Na der siele te gods ghebeelde
Nochtan was hi ghemaect mede
Dat was den menschen ∙i∙ grote weelde
325Na den lichame wildiit horen
Dies so heeft hi vele te voren
Want hi es vander meester werde
Den beesten so staet thoeft ter erde
Enden mensche tehemele waert
330Indrien zaken al gheopenbaert
God des menschen werdichede
Dat hi niet allene oec dede
Ghemaect was van ardscher welde
Dander was als ic oec telde
335Doe hi maecte die menschede
Datter god sinen raet toe dede
Ende seide make wi den man
Die derde werdicheit daer an
Dats dat hi ghemaect was here
340Van allen dieren mit groter ere
Dat sine voeden na den sonden
Ende deden tallen stonden
Ende helpen siin arbeit dragen
Voer die misdaet horic gewagen
345Gaf god den mensche enten dieren
Vruchte tetene van manieren
Want die erde brochte met dat goet
Mensche merke ochtu best vroet
Dat tu heefs verloren inden meesten
350Dine bliscap an scone beesten
An draken ende an liebaerden[5]
An tygren ende an lupaerden
Dit was grote werdichede
Hier af hevestu al mede
355Ghewelt[6] verloren om diin liegen
