Pagina:Van Maerlant, Rijmbijbel (Hs 10B21, 1332).pdf/23

f4r

Dats an messien^[1] ende an vliegen kolom a
An die middelste heefstu gewout
Dattu tebet^[2] merken sout
Dattu here altoes waers bleven
³⁶⁰Der beesten hadstu niet begeven
Tgebot dat di god verboet
Dus vielstu neder ingroter noet
God benediede den man
Ende seide dese wort daer an
³⁶⁵Wast ende wart menichvout
Dit wort datmen bescrevenen hout
Gaet iegen die buggren^[3] die spreken
Valscheliic in haren treken^[4]
Dat hi nauwelic te gene stonde
³⁷⁰Ne mach wesen sonder sonde
Diet waent hem wart swaer perdoen^[5]
God hiet niemen sonden doen
Hi sach dat hi hadde vulmaect
Al wast goet ende wel gheraect
³⁷⁵Volmaect was nu hemel ende erde
Ende hare cierheit^[6] metter werde^[7]
Des levens dages volmaect mede
Alt werc daer hem god an dede
Ende ruste upden sevenden dach
³⁸⁰Niet dat hem die pine verwach^[8]
Mar dat hi siin maken liet
In selken ne merkets oec niet
Hi en maect noch alle daghe
Vele dingx datis gene saghe^[9]
385Mar hine maect niet hier naer
Sine materie was aldaer
Ghemaoct ocht^[10] hare ghelike
An adame was sekerlike
Die marte^[11] van alden liden^[12]
390Die willic an siin vleesch bediden^[13]
Van sine vleesche so eist al
Dat es ende was ende dat comen sal
Ende menschelike vorme heeft ontfaen
Vander zielen suldi verstaen
³⁹⁵Mar wie so vleesch nam
An adame den eersten man
God gaf hem ziele gehlic adame
Die sevende dach heeft die name
Daer god up ruste saterdach
⁴⁰⁰Ende in ebreusch als ict sach
Daer ne die ioden heten sabaet
Dats ruste gods daert al an staet kolom b
Ende benediedene dats waer
Sint vierdmenne^[14] menich iaer
Dus als ghi hebt vernomen
So eist ons van moysesse comen
Dat god maecte hemel ende erde
Ende al dat horde thare werde
Al benedidehiit ende seinde^[15]
410Dit was eert oit^[16] reynde^[17]
Want ∙i∙ fonteyne^[18] van groten prise^[19]
Quam uten erdschen paradise
Die gaf natheit inghene tiit
Alomme ende omme die werelt wiit
⁴¹⁵Die fonteyne bediet marien
Die drouch ihesum den vrien
Diet al met dogeden^[20] maecte nat
Hier na sal ic verclaren dat
Wat rivieren daer ute quamen
⁴²⁰Ende hoe dat si hieten bi namen
Hort van adame dat besceet^[21]
God maecten als hier voren steet
Vander erden vanden lime^[22]
Naden vleesche eist dat ic mine
⁴²⁵Die siele maecte hi van niete
Wet wel dat hi achter liete
Die waerheit die niet ghelovede dies
Die lettre seit dat hi inblies
Hem den levendeliken gheest
⁴³⁰Dat bediet recht altemeest
Dat hi die ziele sende mit vat^[23]
Plato dolede in dere stat
Die edel clerc^[24] van groter name
Hi seide dat smenschen lichame
⁴³⁵Die ingel maecte ende god den gheest
Dat bediet recht alremeest
Dattie ziele ware oec mede
Ghemaect vander godlichede
Ware dat waer sone mochte dan
⁴⁴⁰Ne gene sonde doen de man
Nietmeer dan onse here
Noch te sterven nembermere
Die man was gemaect vander moude^[25]
Dat merct wel in manliker oude
⁴⁴⁵Volcomen van crachte in alre ioeget
Volmaect van leden in alre doeget
Wilde hi tgebod gods niet begeven^[26]

1. messien: mesthoop
2. bet: beter
3. buggren: ketters
4. treken: Trek, list, kunstgreep, intrige ook laag, streek, gemeene streek, misdrijf.
5. perdoen: vergeving, vergiffenis van zonden
6. cierheit: Schoonheid, pracht, praal, heerlijkheid
7. werde: Waarde, prijs.
8. verwach: zich hoeden voor, zich in acht nemen
9. saghe: verhaal, fabel, praatje
10. ocht: of
11. marte: dienstmeisje
12. liden: mensen onderdanen inwoners/bewoners opvarenden manschappen huishouden volk
13. bediden: hier gebruikt als uitleggen vertellen
14. vierdmenne: viert men het
15. seinde: zegende
16. oit: ooit
17. reynen: regenen
18. fonteyne: bron
19. prise: waarde
20. dogeden: deugden
21. besceden: Geschieden, gebeuren, plaats grijpen.
22. lime: van leme of leem hier gewijzigd in lime omwille van de rijm
23. vat: het lichaam van den mensch, vooral als bewaarplaats der ziel.
24. clerc: lage geestelijke geleerde student klerk hier geleerde
25. moude: Fijne, droge, losse aarde ook stof, stuifzand, zand
26. begeven: ontkennen, loochenen