Pagina:Van Maerlant, Rijmbijbel (Hs 10B21, 1332).pdf/30

f7v

Adame van ∙ii∙ domesdagen^[1] kolom a
Ene van watre ende ∙i∙ van viere
Doe visierde^[2] hi in dere maniere
Hoe musike behouden bleve
⁹⁸⁰Dat hi in ∙ii∙ colummen^[3] screve
Sine const in ene erdine^[4]
Ende oec in ∙i∙ marbrine^[5]
Ocht vier quame dat die erde
Hare daer na wel openbaerde
⁹⁸⁵Ocht water quame dat die marbrine
Gheel bleve nader groter pine
Cella wan tubalchaim
Eerst was ghifisiert^[6] bi him
Smeden ende die behendichede
⁹⁹⁰An sinen hamer leefmen mede
Dat iubal vant den rechten deduut^[7]
Van musiken an hare luut^[8]
Tubalchaims suster neoma^[9]
Die visierde oec daer na
⁹⁹⁵Harde menighertiere weven
Dus eist van desen bescreven
Lamech alse scriift iosefus
Was sere vroet ende sprac aldus
Hort mine wort beide lamechs wiif
¹⁰⁰⁰Ic hebbe ghewonnen siin liif
Met mire ghewout ∙i∙ man
Ende ic hebbe doet daer an
∙I∙ ionghelinc in mine nidichede
Van cayms mordadichede
¹⁰⁰⁵Quam seven voudich wrake
Ende van lamechs quader zake
Quam wrake lxxvii vout
Dat vorseide die kerle^[10] out
Als ocht ghesciet ware ende hiit sage
¹⁰¹⁰Bi ghevalle in den selven dage
Ende hadde verloren die ogen
Nochtan scoet hi wel mit bogen
∙I∙ knape leedene dar hi ginc
Ende als hi horde enighe dinc
¹⁰¹⁵Die scoet hi wel al ongesien
Cayme horde hi mettien
Daer hi ruschede^[11] int wout
Ende scoten doot mit gewout
Ende alst hem seide die ionghelinc
¹⁰²⁰Sloech hine om die selve dinc
Dien met sinen boghe doot
Hier af so quam wrake groot kolom b
Die lxxvii die van hem quamen
Die verdronken alle tesamen
¹⁰²⁵An die lovie oec dar naer
Ende sine wive waren hem svaer
Al doren tore al siin leven
Dus es die wrake up hem verheven
Adam wan dus telt die wet
¹⁰³⁰∙I∙ sone die hiet seth
Ende seth wan dus eist ghesciet
∙I∙ sone die enoch hiet
Die was teerste leesmen mede
Die te gode maecte ghebede
¹⁰³⁵Ende an riep ons heren name
Oec so leesmen van adame
Dat hi hadde xx sonen
Ende xxx dochteren sonder degone
Abelle die caym versloegh
¹⁰⁴⁰Dat hi becochte swaer ghenoech
Sets sone hiet enoc die wan
Enen sone die hiet taman
Ende die wan daer na also wel
∙I∙ sone hiet malaschel
¹⁰⁴⁵Malascel die wan iaret
Ende daer na dus eist geset
So wan die iareth enoch
Enen sone die levet loch^[12]
Enoch wan matusale doe
¹⁰⁵⁰Die wan lamach lamach noe
Gheliker wiis dat van cayme
Also ghi leest in dese rime
Die sevende was fel ende quat
Also was die sevende die staet
¹⁰⁵⁵In sets gheslachte enoc die beste
Daer omme voerdene in sine veste^[13]
God int erdsche paradiis
Ende sal leven maecmen ons wiis
Met ioren tote antkerst tiden
¹⁰⁶⁰Ende iegen hem so sal hi striden
Hi dien god sal vermaledien
Sal men doot slaen ende elien^[14]
Noe was van adam die tiende
Die vele werdicheit verdiende
¹⁰⁶⁵Die ewe inde^[15] in hem
Daer ic wel seker ane ben
Dat si stont tve dusent iaer

1. domesdag: Oordeelsdag, bepaaldelijk in den zin van het laatste oordeel, de dag des oordeels, de jongste dag.
2. visieren: hier in de zin van bedenken
3. colummen: zuilen, kolommen
4. erdine: Aarden, van aarde (leem, klei) gemaakt.
5. marbrine: marmer
6. ghifisiert: bedacht, uitgedacht, uitgevonden (van visieren, fisieren)
7. deduut: genot, vermaak, genoegen, plezier
8. luut: geluid
9. neoma: naamah de zus van tubalkaïn
10. kerle: man
11. ruschen: ruisen maar ook gedruis maken
12. loch: ?? nog na te kijken
13. veste: vesting, bolwerk
14. elien: ?? nog na te kijken
15. inde: einde