Naar inhoud springen

Pagina:Van Maerlant, Rijmbijbel (Hs 10B21, 1332).pdf/40

Uit Wikisource
Deze pagina is proefgelezen

f12v

Ende seiden vliet ten berghe vort kolom a
Loth dede datmen hem hiet
Ende seiden siet achterwaert niet
1875Ende liep oec daer in ene stede
Siin wiif was vankelre[1] sede
Doe deet god reinen vanden trone
Sulfur ende groot vier te lone[2]
Hem te wraken van hare sonden
1880Dwiif horde tluut tien stonden
Ende bleef doot staende allene
In die ghelike van ∙i∙ stene
Ende aldie stat verbrande sciere
Bede mit sulfre ende mit viere
1885Nu eist water ende weets nemme[3]
Ende heet die swarte dode zee
Wantmer niet levens in vint
Vissche no vogle niet een twint
Daer ne mach geen scip in varen
1890No niet vloten oec te waren[4]
Dat sonder liif es gaet tegronde
Ghevalt oec in enige stonde
Datmer in bernen dede lecht
Dat souder wel in vloten echt
1895Ginct ute so sout sinken
Daer staen bomen horic gedinken
Die apple dragen scone ende groote
Ende alsi riip siin thare note[5]
So vintmen daer asschen in
1900Ende anders meer no min
Loth was eerst in segor[6] gestreken
Doe hi van sodoma was gheweken
Van danen ginc hi in ∙i∙ hole
Wonen ochti ware in dole[7]
1905Onder ∙i∙ berch in ∙i∙ stede
Ende sine ∙ii∙ dochtre daer mede kolom b
Sine ∙ii∙ dochtre hadden verstaen
Dattie werelt soude tegaen
Ende ghedoemt werden mit viere
1910Si waenden dat in dere maniere
Die werelt ware vergaen algader
Ende si ∙ii∙ ende hare vader
Leveden ende als volcx nemme[8]
Ende dat allenkelike si twe
1915Die werelt vervullen souden
Bedi namen si den ouden
Haren vader die dochtren sine
Ende maecten dronken met wine
Ende daden so met haren liste
1920Dat hiis selve niene wiste
Hem bi hem slapen ende ontfingen
Dat si bede mit kindre gingen
Moab hiet der oudster sone
Die selve moab[9] was die gone
1925Daer die moabiten af quamen
Noch heten si na hem bi namen
Amon[10] hiet der ioncster kint
Van hem quamen dats bekint
Die amoniten die ic sal nomen
1930Hier na als icker an sal comen
Also als ic hier voren seide
Abraham ende sarra si beide
Wonnen ∙i∙ kint daer hem god of
Tevoren hadde ghedaen belof
1935Besneden wast na abrahame
Ende oec gegeven sine name
Doe het hadde der daghe achte
Noch plegets abrahams gheslachte
Ioden ende ander volc oec mede
1940Te besnidene na hare zede
Ysaac hiet hi bi namen
Om dat si lǒegen tesamen
Als hem god behiet dat kint
Ysaac es met ∙i∙ twint
1945Dan lachen in ebreuscher tale
Van ysmaele[11] latic altemale
Abrahams sone daer of quam
Groot gheslachte als ict vernam
Mar dat algader heidiin was
1950Van ysaacke als ic oec las
Quam maria die moeder ons here

  1. ↑ vankelre: van wankel: onstandvastig, wankelmoedig
  2. ↑ te lone: belonen, vergelden
  3. ↑ weets nemme: weet niemand
  4. ↑ oec te waren: ook ter waarheid
  5. ↑ note: hier gebruikt voor vrucht, boomvrucht
  6. ↑ segor: Soar (Vulg./Hist.Schol. Segor), stad in het zuiden van de Jordaanvlakte. Bijbel: Gn 19:22, Hist.Schol. Lib.Gen. Cap.LIV
  7. ↑ dole: Onzekerheid aangaande de te volgen weg. Aan het dwalen gaan, rondlopen zonder bepaald doel
  8. ↑ nemme: niemand anders meer
  9. ↑ moab: Moab (Vulg./Hist.Schol. Moab), zoon van Lot bij diens oudste dochter, stamvader van de Moabieten. Bijbel: Gn 19:37, Hist.Schol. Lib.Gen. Cap.LIV
  10. ↑ amon: 1. Ben-Ammi (Vulg./Hist.Schol. Ammon), zoon van Lot en zijn jongste dochter. Hij was stamvader van de Ammonieten. Zie ook: amonite
    Bijbel: Gn 19:38, Hist.Schol. Lib.Gen. Cap.LIV
  11. ↑ ysmaele: Ismaël (Vulg.Ismahel Hist.Schol. Ismael), zoon van Abraham en Hagar. Hij werd 137 jaar oud en was stamvader van een aantal Noord-Arabische stammen. Bijbel: Gn 16:15, Hist.Schol. Lib.Gen. Cap.XLIX
Afkomstig van Wikisource NL, de Vrije Bron. "https://nl.wikisource.org/w/index.php?title=Pagina:Van_Maerlant,_Rijmbijbel_(Hs_10B21,_1332).pdf/40&oldid=208537"