Pagina:Van Maerlant, Rijmbijbel (Hs 10B21, 1332).pdf/44

f14v

Dien van argos diet hadden eer kolom a
Ende droech crone vorwaert meer
In misch in ene goede port
²²²⁰Nu hort dystorie vort
Doe ysaacs kinder seggic u
Iacob ende esau
Quamen tharen manliken dagen
Keerde hem esau an dat iagen
²²²⁵Iacob wirt herde ende ackerman
Ende ysaac leide sinen sin daer an
Dat hi den oudsten hefst gecoes
Ende die moeder den ioncsten altoes
Tenen tide hadde die wise
²²³⁰acob ghemaect ∙i∙ edele spise
Esau quam van den velden moede
Ende sprac gef mi tetene goede
Van desen goeden pulmenre^[1] root
Want mi moyt^[2] die moetheit^[3] groot
²²³⁵Iacop sprac vercoep mi dan
Want du best die ouder man
Diin vordeel daer af ende diin recht
Dit dede esau siin broeder echt
Ende swoer den eet altoes
²²⁴⁰Vaste te houdene sonder loes
Om die rode spise tetene som
Dies hietene die liede esau dom
Ende siin lantscap daer na
Wart oec gheheten ydumia
²²⁴⁵Nu merct die doe doutste was
Wat vordeel hi hadde das
Den oudsten was altoes ghereet
Tien tiden ∙i∙ sonderlinghe cleet
Dat plachi an te doene mede
²²⁵⁰Als hi sacrifitie dede
Ende plach tontfane algader
Tachterst die benedixie vanden vader
Daer oec werschap^[4] was ofte feeste
Benediedehi daer aldie meeste
²²⁵⁵Ende hadde hi mans deel
Oec so nam hi dat al geheel
Van svader goede na siin leven
ii kinder deel dus est bescreven
Sident gheviel ysaacke mee
²²⁶⁰Daer hi woende in bersabe
Dat here god daer openbaerde
Ende seide dat hi hem niet en vervaerde
Hi soudhem dat doen al gader kolom b
Dat hi te voren behiet den vader
²²⁶⁵Ginder maecte hi ∙i∙ outaer
Ende ane riep onsen here daer
Indien tiden was foroneus
Die de sone was van iaitus
Hi visierde eerst wet in grieke lant
²²⁷⁰Ende vaste curen^[5] die hi oec vant
Datmen den rechtre wildiit horen
Alle die zaken brochte te voren
Eorum noemde hij die stede
Daermen den liede recht updede
²²⁷⁵Yma was siin suster tewaren
Di in egypten quam gevaren
Ende visierde lettren daer
Oec leerde soe hem dats waer
Vele ackerneringhe mede
²²⁸⁰Doe soe doot was hort watmen dede
Si maecter af ∙i∙ godinne
Dur hare consten van groten sinne
Foroneus sone die apis hiet
Quam oec onde degyptische diet
²²⁸⁵Dien maecten si na sine doot
∙I∙ god weert ende groot
Serapis so hieten sine^[6]
Dus wolden die sarrasine^[7]
Nu hort van Ysaacs gheslachte
²²⁹⁰Dats daer ic nu meest up achte
Alse esau was van ∙xl∙ iaren
So nam hi ∙ii∙ wiif van chanaan te waren
Wel gheboren van chanaan
Dat was leer^[8] den goeden man
²²⁹⁵Ysaacke ende sire moeder mede
Dat hi sulc huwelic daer dede
Hi deet om mogende^[9] te sine
Onder die rike heidine
Isaac wart out hets recht
²³⁰⁰Sodat hi verloes siin lecht
Sine sone riep hi esau
Mac mi van diere iachte nu
Spise die ic wel^[10] eten mach
Dat di vor minen sterf dach
²³⁰⁵Mine siele mach bendien
Dit hore wi noch van easu lien^[11]
Dat hi nam boghe ende scichte
Ende voer iagen telt ghedichte

1. pulmenre: pulmentum in Historia Scolastica voedsel levensmiddellen.
2. moyt: last veroorzaken, kwellen.
3. moetheit: vermoeidheid
4. werscap: feestmaal
5. curen: keure, verordening, bepaling
6. sine: samentrekking van si hem
7. sarrasine: Sarraceen, Arabier ook als algemeene naam voor de Mohammedanen of Heidenen, ook voor alle ongeloovigen.
8. leer: les ??
9. mogende: sterk, krachtig, machtig.
10. die ic wel eten mach: die ik graag eet, die ik lust
11. lien: vertellen