Pagina:Van Maerlant, Rijmbijbel (Hs 10B21, 1332).pdf/46

f15v

Up tvelt lach hi ende niet allene kolom a
²³⁹⁰Siin hoeft leidi up ∙i∙ stene
In sinen slaep dat hi versach
∙I∙ langhe ledre daer hi lach
Vander erden toten hemele slaen
Ende ingle up ende neder gaen
Die ledre als ic vroet bin
Es die dochter ioachim^[1]
Die so droech die salighe anne
Troest alre wive ende manne
Die soete edele maget marie
²⁴⁰⁰Daer ic up hope ende altoes lie
Die ∙ii∙ lederbome^[2] siin oec mede
Oetmoede ende suverhede
Die vander erden ten hemele gingen
Ende gode in haren lichame ontfingen
²⁴⁰⁵Also menich stap als daer toe horde
Ne mochtic mit genen worde
Gheseggen miin sin es so cranc
Die lederbome waren so lanc
Also ne mochtic ingere wiis
²⁴¹⁰Marien doget ende haren priis
Noch hare genaden niet bescriven
Up dese lederbome moetwi cliven^[3]
Al dat ye quam van wiven
Os al gader verloren bliven
²⁴¹⁵En ware oft soet selve dede
Mit ghereande behendichede
Ne quame wi in hemelrike
Soe es onse troest vast ende rike
Wine clemmen^[4] met soene doet
²⁴²⁰Van hare sal ons comen die spoet
Ende eist dat wi up hare ghien^[5]
God diere up was ghesien
Sal ons die hant bieden mede
Ende helpen bi haren gebede
²⁴²⁵Hi sach gode up die ledre
Die seide tehem ic bin diin ledre
Abrahams god ende isaac
Dits lant daer ic ane sprac
Dat diin sal siin ende diere
²⁴³⁰Iacob wart ontwaken sciere
Ende hi sprac in dese stede
Es ons heren godlichede
Alne wistict min no mere
Dese stede es ontsienlic^[6] sere
²⁴³⁵Dits gods huus ende hemelsche porte kolom b
Hier voerseidi gods gheborte
Die tempel gods ende die wet
Die sint int lant was geset
Want die wet es ontsienlic sere
²⁴⁴⁰Thuus gods es des tempels ere
Die hemel port bediet tgat wiede
Dat was ane ons heren side
Dien steen rechti upten dach
Daer hi up siin slapen lach
²⁴⁴⁵Tebetekene^[7] die heilige stede
Ende goeter oloie oec up mede
Gode beloefdi daer ten kere^[8]
Te doene offerande mere
Die stede die daer stont na
²⁴⁵⁰Die te voren hiet lusa^[9]
Hietmen bi namen betel
Dats gods huus ende niet el
So lange ginc hi dat hi quam
Toter stede van carram
²⁴⁵⁵Daer ne siin oem wel ontfinc
Doe hi hadde verstaen die dinc
Seidi hier mogestu seker wesen
Vorwaerde maecte hi na desen
Dat hem iacob soude wel
²⁴⁶⁰Vii iaer dienen omme rachel
Die siin ioncste dochter was
So dat iacob ghehingede^[10] das
Rachel was ∙i∙ scone kint
So sere hevetse iacob gemint
²⁴⁶⁵Dat hem die iare dochten onlanc^[11]
Naden vii iaren omme ganc
Alse iacob waende hebben siin lief
Brochten laban als ∙i∙ dief
Heimelic mit groten liste
²⁴⁷⁰So dat iacob niene wiste
Doudste dochter te bedde geleet
Dat was iacoppe harde leet
Des margiins als hiit vernam
Ende seide ten oem erre^[12] ende gram
²⁴⁷⁵Waer omme heefstu dit gedaen
Laban seide sonder waen
Men pliet hier al sulker dingen
Datmen douste eerst te manne bringen
Iacob moste dit ghedogen
²⁴⁸⁰Soe was lelic mit sepelende^[13] ogen

1. ioachim: vader van Maria
2. lederbome: ladder stijlen
3. cliven: opklimmen
4. clemmen: klimmen
5. gien: verklaren ??
6. ontsienlic: Ontzag of eerbied inboezemend, ontzaglijk.
7. betekene: betekenen, symboliseren
8. ten kere: ter dier gelegenheid
9. lusa: Luz (Vulg. Luza Hist.Schol. Luzam (acc.)), plaats in Palestina, later Betel genoemd. bijbel: Gn 28:19, Hist.Schol. Lib.Gen. Cap.LXXIII
10. ghehingede: van ghehinghen: Toestaan, gedogen goedvinden
11. onlanc: niet lang, kort
12. erre: boos, op een wijze die op woede duidt In de verbinding erre ende gram Zeer boos, woedend.
13. sepelende: druipende