Pagina:Van Maerlant, Rijmbijbel (Hs 10B21, 1332).pdf/47

f16r

Ende was geheten lia kolom a
Echt diendi vii iaer daer na
Om rachelle dat hise gewan
Die lia droech bi haren man
²⁴⁸⁵Ruben levi ende symoene
Iudas ysacar ende sabuloene
vi sonen ende daer na
∙I∙ dochter hiet dyna
Rachel droegher vele min
²⁴⁹⁰Iosep ende beniamin
Lia bediet die oude wet
Die lelic was ende besmet
Ende min mit gode was vercoren
Rachel die niewe daer wi toe horen
²⁴⁹⁵Die scone es ende van gode gemint
Al eist datmen bescreven vint
Dat lia hadde vele kinder
Iosep allene al was hi minder
Was scoenre ende vele vroeder
²⁵⁰⁰Dan ieman onder sine broeder
Dus eist al heeft die oude wet
∙x∙ ghebode van gode geset
∙I∙ niewe ghebod dats karitate^[1]
Brinct mee volcs ter rechter strate
²⁵⁰⁵Dan die oude ∙x∙ ghebode
Ende lichteliker^[2] oec te gode
Sonder karitate dats minne
Niemen comt te hemele inne
Bi ∙ii∙ ioncwiven hire iiii gewan
²⁵¹⁰∙I∙ hiet neptalim ende ∙i∙ hiet dan
Azer ende ∙i∙ hiet gat
Dus heeft hire ∙x∙ gehat
Van desen xii weetmen wel
Quamen die xii gheslachte van israel
²⁵¹⁵In dien tiden dat dat ghesciede
So verdronken vele liede
Met ere lovie in achaya
Doe dentalion ende pira
Up ∙i∙ berch behilden dliif
²⁵²⁰Doe levede pallas starcste wiif
Die doot sloech ∙i∙ gygant
Ende dat wulle werc^[3] oec vant
Om die vroetscap van haren sinne
So maectmer sint of ∙i∙ godinne
Als ict vernam wet vor waer
So woende iacob ∙xx∙ iaer
Mit sinen oem den quaden laban kolom b
Daer hi groot goet onder wan
Ende dat was labans ondancs sere
²⁵³⁰Doe gheboet hem onse here
Dat hi te lande keren soude
Iacob diet ember doen woude
Nam siin wiif ende sine kinder
Ende al dat hi hadde ginder
²⁵³⁵Ende rachel die stal algader
Die afgode die hadde haer vader
Also rumde iacob die stat
Ende voer ten berghe van galaat^[4]
So dat die mare vernam laban
²⁵⁴⁰Ende volgede naer mit menigen man
Mar god hiet hem in sinen droem
Nu sie wel ende nems goem^[5]
Dattu iacoppe sachte spreecx an
Hier af wert vervaert^[6] laban
²⁵⁴⁵Laban vanten in galaat
Ende seide twi daetstu dat
Dattu ontvloes sonder bode
Ende mi staels mine gode
Dinen oem dinen sweer^[7] dinen weert^[8]
2550Iacob seide ic was verveert
Dattu nemen souds miin wiif
Vander dieften sonder blief^[9]
Soec dine gode onder mine alame^[10]
Ic wildemen hem dat leven name
²⁵⁵⁵Onder wien datmense vonde
Laban sochte lange stonde
Mar al onstacse^[11] hem rachel
Daer na swoeren si sonder fel
Elc andren hulde ende scieden
²⁵⁶⁰Laban keerde mit sinen lieden
Ende iacob voer te lande waert
Doe ghemoeti^[12] an die vaert^[13]
Ingle vele mit haren scaren
Die daer alle ghereet waren
²⁵⁶⁵Hem te helpen iegen esau
Van danen sende hi segic u
Boden ten broeder omme vrede
Die weder quamen daer ter stede
Ende seiden hi quame mit goeden moede^[14]
2570Mit cccc mannen sonder hoede
Ende iacob wart thant vervaert
Ende hi bad te gode waert

1. karitate: christelijke liefde liefdadigheid
2. lichteliker: allicht, wellicht
3. wulle werc: Het bewerken der wol, het spinnen of weven
4. galaat: Gilead (Vulg./Hist.Schol. Galaad), gebergte met het omringende gebied ten oosten van de Jordaan. bijbel: Gn 31-21, Hist.Schol. Lib.Jud. Cap.XII
5. goem: aandacht, zorg In de verbinding goom nemen 1. Waarnemen, opmerken, acht slaan (op).
6. vervaert: ontsteld, verschrikt, beangstigd, bevreesd
7. sweer: schoonvader
8. weert: Heer, gebieder, hoofdman, beschermer, verdediger, gastheer.
9. sonder blief: zonder uitstel, onverwijld
10. alame: Huisraad, alles wat tot de inrichting van hof, huis of schip behoort.
11. ontstac: Aan het oog onttrekken, wegsteken, verstoppen.
12. ghemoeten: Ontmoeten, tegenkomen, toevallig aantreffen.
13. an die vaert: Onderweg, op de reis.
14. goeden moede: goed gezind