Pagina:Van Maerlant, Rijmbijbel (Hs 10B21, 1332).pdf/53

f19r

Futifars dochter tenen wive kolom a
Alsenes hiet soe van haren live
Hadde iosep kinder twee
³⁰⁰⁰Efraim ende manasse
Doe iosep sinen noet verwan
Was hi van xx iaren man
Iosep gaderde siin coren
Die vii iare als wiit horen
³⁰⁰⁵Daer na quamen die honger iaer
Israel sende ∙x∙ sonen aldaer
Uten lande van chanaan
Coren te copene den ouden man
Hi hilt thuus den ioncsten beniamin
³⁰¹⁰Ende si quamen tegypten in
Tharen broeder die tier stont
Hem allen sere was oncont^[1]
Si negen hem alle temale^[2]
Mar hi sprac tehem wrede tale
³⁰¹⁵Ende hi seide wanen^[3] comdi man
Si seiden here van chanaan
Dat wi copen souden coren
Iosep sprac men mach wel horen
Dat ghi alle spieres^[4] siit
³⁰²⁰Here segsi ocht ghiit ghebiet
Wi siin u knechte groot ende smal
Ende oec eens vader kinder al
Onse ioncste broeder es thuus bleven
Wet wel datter nemme^[5] leven
³⁰²⁵Ia sprac iosep nu wetic wel
Dat ghi spieres siit ende niet el
Soude ∙i∙ ongenatuert man ginder
So vele in u lant hebben kinder
Also scone ende so dor fier
³⁰³⁰Het ghebreect den coninc hier
Bider salicheit miins heren
Ghi en sult niet weder keren
Voer ic den ioncsten broeder sie
Ocht ghi wilt ontbieten mie
³⁰³⁵Hi hiltse iii dage gevaen
Ten vierden dage liet hise gaen
Ende hi hilt symone gebonden
Doe spraken si ten selven stonden
Met rechte doge wi dese scaden
³⁰⁴⁰Om dat wi onsen broeder daden
Sine wisten niet dat iosep verstont
Want sine spraken niet mont iegen mont
Mar mit ∙i∙ tale man^[6] kolom b
Iosep hiet sinen knechten dan
³⁰⁴⁵Dat si die sacke souden laden
Ende dat gelt daer in daden
Ende si van spisen haer gevoech^[7]
Ghaven ten weghe genoech
Mar hare broeder sonder waen
³⁰⁵⁰Symoen die bleef daer gevaen
Die ∙ix∙ broeder quamen ten vader
Ende telden hem die dinc algader
Mar alsi die sacke ontbonden
Ende dat ghelt int coren vonden
³⁰⁵⁵Wordsi vervaert allegader
Doe sprac israel hare vader
Ghi hebt mi ghemaect kindeloes
Iosep sie ic nembermeer altoes
Ende symoen die es gevaen
³⁰⁶⁰Nu moet beniamin wech saen
In mi comt al dit ongeval^[8]
Ruben sprac vor dandre al
Vader geeftene anders mi
Ne brincicken niet weder di
³⁰⁶⁵Ic late di ii kinder ontliven
Israel sprav hi moet hier bliven
Vaert in egypten omme coren
Wi en doens niet sprac iudas voren
Di ne leents ons beniamin
³⁰⁷⁰Ic segge dat icker af schuldich bin
Ic bringen wedere eeschen^[9] mi
Israhel antworde dat si
Het staet so het moet doch wesen
Dat ander gelt voert met desen
³⁰⁷⁵Dat ghi hier in desen zacken vont
Ende voert voer u nu ter stont
Prosente^[10] ende gicht^[11] mi den here
Ic kere mi des an onsen here
Dat hem die moet sal sinken neder
³⁰⁸⁰Ende mine kinder senden weder
Dus voeren si tegypten lant
Daerse ioseps knaep vant
Ende wel ontfinc tien stonden
Si seiden wi hebben tgelt vonden
³⁰⁸⁵In onse zacke dat bringe wi u
Ende ander penninge nu
Die knape sprac mine gebreect niet
Ic wane god dit u beriet

1. oncont: onbekend
2. alle temale: allemaal, allemaal tesamen
3. wanen: van welke plaats van welke afkomst waardoor waarvandaan
4. spieres: verspieders, spionnen
5. nemme: niet(s) meer, niet langer, nooit meer
6. Mar mit ∙i∙ tale man: maar allen door mekaar
7. gevoech: van gevoege: de juiste maat
8. ongeval: Ongelukkig lot, ongelukkige of treurige toestand waarin iemand verkeert, rampspoed, leed, ellende die iemand treft.
9. eeschen: eisen
10. prosenten: Begiftigen, een geschenk geven aan.
11. gicht: gift