f21v
3445Gheliker wiis dat dat ghevel
kolom a
Dat dat volc van israel
Van moysesse was verloest
Ende van bedwange vertroest
Also heeft hi ons gheleet
3450Updat ons siin die sonden leet
Vanden helschen pharao
Die ons hadde gevangen also
Soe hiet bringen van daert lach
Ende teerst dat soe kint gesach
3455Dit kint seit soe weetic wel
Es vanden volke van israel
Haer ontfarmes want so scone
Hadt gemaect god van den trone
Dat sine viande siins ontfarmede
3460Ende haer herte daer omme carmede[1]
Die egyptische wive boden hem die borste
Mar al sout sterven van dorste
Henne wilder zugen altoes gene
Marie die suster wacht allene
3465Ende seide ghebiet diit ioncvrouwe
Ic hale ∙i∙ ebreusche vrouwe
Het sel wanic bi avonturen
Zugen bi rechter naturen
Enige van sinen gheslachte
3470So doet seit soe ic sta ende wachte
Die moeder halet soe met desen
Als ocht ∙i∙ vreemde hadde gewesen
Dat kint soech die moeder saen
Ende soe hevet daer ontfaen
3475Van termit diet haer lonen soude
Onthiet ende ment spanen[2] soude
Endoe soe kint hadde gespent
Hevet soe tehove gesent
Die ioncvrouwe maecter af mede
3480Nader wet ende nader zede
Van den lande haren sone
Moyses hiet soene om tgone
Dat sone uten water hief
So scone wast elcman hadt lief
3485Tenen tiden heeft soet brocht
Haren vader ende heeft versocht
Oft hiit iet wilde horen
Dat soet te kinde hadde vercoren
Sere wonderets faraone
3490Sine volmaectheit was so scone
Hi sette hem sine crone up thovet
kolom b
Daer an gemaect was des gelovet
Ene ymage van iupiterre
Tkint nam die crone ende was erre[3]
3495Ende werpse ontwe tegen die vloer
Mettien ∙i∙ vroet man up voer
Ende seide dit kint sla wi doot
So si wi quite van alre noot
Mar farao behilt hem tleven
3500∙I∙ ander vroet was daer beneven
Ende seide dat hem kintscheit dede
Doe provediit daer ter stede
Hi brochte hete colen tier stont
Daer warpt ene in sinen mont
3505Het hadder af sulc ongemac
Dat nembermeer scone en sprac
So scone wast hine was so fel
Sachiit hine was gesedet[4] wel
Om hem tesiene was menich dromen[5]
3510In straten daer menne sach comen
Doe moyses gewassen was
Doe gesciede als ic las
Dat dat volc van etyopen
Dlant dor ronden[6] ende dor cropen[7]
3515Van egypten al wel naer
Doe seyde haer afgod over waer
Dat siit gewreken[8] souden dan
Bi enen ebreuschen man
Doch dat cume alle die gone
3520Termit gebaden haren sone
Moyses tenen leedsman[9]
Ende bi dieren ede nochtan
Hem gene misquame[10] te doene
Moyses was starc ende coene
3525Ende van orloghe wiis ende vroet
There[11] leedi tors[12] ende te voet
Mids die woistine sonder sparen
Die alle vol serpenten waren
Met hem voerdi odevaren[13]
3530In husekine die besiin[14] waren
Dat siin voghele die haten[15]
Worme[16] ende serpente utermaten
Ende daer si lagen liet sise gaen
Ende si verdorven die worme saen
3535Ende waren in etyopen comen
Eer mens twint hadde vernomen
- ↑ carmede: van kermen
- ↑ spanen: Van de borst nemen of van de moedermelk afwennen, spenen.
- ↑ erre: boos
- ↑ gesedet: Een goede (slechte, betere) aard of karakter hebbend, braaf ook fatsoenlijk, welgemanierd, beschaafd, een (zodanig) karakter hebbende, als door een bep. wordt aangewezen.
- ↑ dromen: gedrang
- ↑ ronden: van ronnen, lopen, gaan.
- ↑ cropen: evan crupen: Zich ergens verbergen, zich ergens nestelen, ergens in, uit, door of onder kruipn
- ↑ gewreken: Wraak nemen over iets, voldoening nemen voor ondervonden kwaad.
- ↑ leedsman: leider, aanvoerder
- ↑ misquame: leed, kwaad
- ↑ there: het here: het leger
- ↑ tors: te ors: te paard
- ↑ odevaren: ooievaar geluksaanbrenger
- ↑ besiin waren: Zich bevonden in de buurt van.
- ↑ haten: haten, een hekel hebben aan
- ↑ worme: (giftig) ongedierte insect worm nietig wezen spin reptiel amfibie
