Pagina:Van Maerlant, Rijmbijbel (Hs 10B21, 1332).pdf/61

f23r

Wilden dingel doden dor das kolom a
³⁷¹⁰Dat siin kint onbesneden was
Om dat waren siins vader zeden
Mar teerst dat was besneden
Lietse die ingel onghescaet
Moyses haest ende gaet
³⁷¹⁵{Te egypten waert daer ne gemoete
Aaron siin broeder diene groete
Moyses seide hem ons heren wort
Doe gingen si bede gader vort
Ende seident dien van israel
³⁷²⁰Ende daden die tekine also wel
Die hem onse here geboet
Doe geloefden siit clene ende groot
Ghemeenlike siin si gegaen
Ten coninc ende seident saen
³⁷²⁵Dat hem onse here daer hiet
Hi seide hine kennets niet
Om dese dinc dwanc farao
Tvolc van israel also
Dat si hem beclageden des
³⁷³⁰Up aaron ende up moyses
Ende si clagedent gode sere
Te moyses seide onse here
Sech faraone dat ic omboet^[1]
Dat ickene ontsie clene no groet
³⁷³⁵Ende du salt siin god in desen
Aaron sal diin vorsprake wesen
Toten coninc gincsi bede
Ende god allene was haer gelede
Moyses was out lxxx iaer
³⁷⁴⁰Ende aaron ∙iii∙ meer dats waer
Doe verwandelde daer dats bekent
Moyses roede in ∙i∙ sepent
Daert die coninc selve toe sach
Ende vele sire princen up genen dach
³⁷⁴⁵Doe dede die coninc farao
Sine toeverers^[2] doen also
Mar moyses roede swalchse in
Farao vervaerde den sin
Nochtan wildi altoes doen niet
³⁷⁵⁰Datmen hem van gode hiet
Te moyses sprac god ter spoet
Ganc in faraons gemoet
Ende sech aldus tehem
Merc hier an dat ic here ben
³⁷⁵⁵Ic sal in dese versche vloede kolom b
Aldus slaen met mine roede
Ende het sal al in bloede verkeren
Dus sal ic egypten onneren
Ende also gesciet sciere
³⁷⁶⁰Aaron sloech in die riviere
Ende twater wart bloet tehant
Ende aldat was in egypten lant
Sonder in gessen dat weet wel
Was om tvolc van israel
³⁷⁶⁵Doe daen die toveraers water bringen
Ende daden geliic desen dingen
ii ware ghelovers mi hier
Deen hiet ihannes dander manbier
Dese alreerste plage
³⁷⁷⁰Sont in egypten vii dage
Dat dien lieden swaer was
Dans gene saghe als ict las
Te moyses seide echt onse here
Ganc to farao ende kere
³⁷⁷⁵Laet hi miin volc niet rumen tlant
So doe aarone up heffen siin hant
Up marasche^[3] ende up riviere
Daer ute sellen comen puden^[4] sciere
Also daden si altehant
³⁷⁸⁰Doe waren si in egypten lant
So dattie huse ende sconincs zale
Daer vol waren altemale
Die toveraers daden mede
Dies gheliic daer ter stede
³⁷⁸⁵Farao sprac bid uwen here
Dat hi dese plage van mi kere
Ende ic sal tvolc laten gaen
Moyses bads het was gedaen
Farao looch ende wilde niet
³⁷⁹⁰Doen dat hi hem daer behiet
Onse here hiet moyses daer na
Seggen aarone dat hi dmul^[5] sla
Daer sellen bien ute comen
Die derde plaghe rau^[6] hem somen^[7]
3795Want sise straelden^[8] iamberlike
Die toevereers waenden doen gelike
Mar si en condent niet gedoen
Si seiden den coninc faraoen
Dits die mogentheit van gode
³⁸⁰⁰Si priisdene al dadent siit node

1. omboed: van ontbiede
2. toeverer: tovenaar
3. marasche: moeras
4. puut: kikker
5. mul: Stof, zand, losse en droge grond
6. rau: van rouwen: berouwen, spijten
7. somen: van som: sommige, enige, enkele
8. stralen: steken van insecten