f23v
Echt seide onse here dese dinc
kolom a
Ganc te gemoete den coninc
Moyses ende sech hem saen
Hi en late tvolc ute gaen
3805Ic sal saen dur egypten lant
Vliegen doen comen altehant
Sonder int lant van iessen allene
Dat sal daer af wesen rene
Dus gesciet sonder liegen
3810Dat lant wart versvaert van vliegen
So dat farao sprac altehant
Gaet offeren gode hier int lant
Si seiden wi en mogen niet
Sloege wi tegyptiene diet
3815Die beesten die si anebeden
Si souden ons stenen ter steden
∙I∙ stier alset bescreven is
In haers gods eren serapis
Ende ysis]] eeren hare godinnen
3820Plagen si al tlant binnen
Tanebedene ∙i∙ coe
In amons]] name haers gods daer toe
Ende daer toe oec ∙i∙ ram
Ende bedi so souden si gram
3825Hebben gesien hadsiit gesien
Dat si van israel van dien
Iet hadden geslegen doot
Farao sprac die here groot
So gaet ghi ende uwe man
3830Niet verre indie woistine dan
Ende doet over mi uwe bede
Moyses bad daer ter stede
Ende die vliegen die tegingen[1]
Nochtan wart na desen dingen
3835Verhardt die herte van pharaone
Daer hem af quam quaet te lone
Oec seget hier mede iosefus
Van desen ii plagen aldus
Datten lieden oec tesamen
3840Uten live lusen[2] quamen
So vele dat hem quam grote pine
Dat si met gereande medicine
Verdriven mochten no met rade
No met salven no bet bade
Doe sprac onse here na des
Toten goeden moyses
Sech den coninc pharao
kolom b
Eist dat hi onthout also
Morgen tvolc van israel
3850Ene sware plage ende fel
Sal ic up hem bringen tehant
Want in al egypten lant
Sellen die beesten bliven doot
Mar het en sal clene no groot
3855Scaden dien van israel
Nomin no meer dan diis gevel
Die dinc dus telt die ieeste
Want in al dlant sone bleef beeste
Sone starf die in huse stont
3860Want hier na alst u wart cont
Sloech onse here met gewelde
Aldie beesten upten velde
Iof bi avonturen die plage
Was gevorst[3] so lange dage
3865Die hier na tellet der beesten doot
Dat si mosten dur de noot
Els waer halen besten ghenoech
Die die hagel alle doot sloech
Van deser plage scriift iosefus
3870Als hier na staet verstaet aldus
Dat god vervulde tehant
Mit selsiene[4] beesten dlant
Sulke als noyt man ne sach
No eer no sident na den dach
3875Die die lieden beten te doot
Nochtan dor die plage groot
Den quaden coninc farao
Verharde dat herte also
Dat hie niet wilde ten haren
3880Die van isarel laten varen
Dies sende hem god in corten dagen
Als ghi sult horen sware plagen
Onse here sprac na des
An aaron ende an moyses
3885Nemet assche van den viere
Ende moyses die salse sciere
Sparsen[5] daert farao siet
In die lucht ende latens niet
Dan sellen puste ende roven[6] wesen
3890Onder al tvolc na desen
Ende oec onder die beesten mede
Dit gescide aldaer ter stede
