Pagina:Van Maerlant, Rijmbijbel (Hs 10B21, 1332).pdf/64

f24v

Onder die egyptiene kolom a
Waren nemmee^[1] plagen dan tiene
Dat merct wel gene was so swaer
Alse die tiende wet vor waer
xxiiii daghe fier^[2]
3990So houter of die calendier^[3]
Dier siin twee in elke maent
Daermen gelike af waent
Dat up ene wile vanden dage
Vreselic siin die ader slage^[4]
3995Mar lettel wanic leiter an
In egypten waren vele man
Die dlant rumden indien dagen
Om die vreselike plagen
Alse cycrops die in grieken vloe
⁴⁰⁰⁰Ende atenen maecten doe
Ende dyonisus bachus
Daer wi af lesen aldus
Die den grieken wingaert brochten
Eerst ende in tessalien bewrochten
⁴⁰⁰⁵Tien tiden dede hi ∙i∙ lovie wonder
Want lantscap ginc al onder
In moyses tiden verbaerde mede
Die sonne menigherhande stede
In ferons tiden van desen dage
⁴⁰¹⁰Van deser twierhande plage
Dese favele leert ons ovidius
Tien tiden so was anthius
Van ercules geslegen doot
Die sere starc was ende groot
Onse here wilde die plaghe enden
Ende dlant van egypten scenden
Hi seide ic sal in egypten gaen
Ende alle die oudste kinder doot slaen
Van faraons sone diere in es here
⁴⁰²⁰Tote haren sonen tenen kere
Die ter molen es ioncwiif^[5]
Oec salic mede nemen dliif
Den oudsten calven vanden dieren
En sal in gere manieren
⁴⁰²⁵∙I∙ hont hulen inder straten
Dan suldi lenen diere^[6] vaten
Van uwen geburen int lant
Ende si sellent oec doen te hant
Moysesse hiet god aldaer
⁴⁰³⁰Dat hi soude beginnen tiaer^[7]
Indien tiden dat was aprille kolom b
Mar nader mane eist dat ic dille^[8]
Noch houde wi paschen na die mane
Dat hiet hem god dus quamt hem ane
⁴⁰³⁵Si namen eens rams lam
Sonder smette als ic vernam
Dat hiet hi offren dur sine ere
Dat lam bediet onse here
Die dor ons upten paesch dach
⁴⁰⁴⁰Offerande was daert menich sach
Sonder smette ende sonder sonde
Hi hiet bestriken oec tier stonde
Hare post^[9] ende hare overduren^[10]
Metten bloede dat si besuren
⁴⁰⁴⁵Niet en souden so sware plage
Snachts vor die pasche dage
Te midnacht sloech god doot
Doudste kinder clene ende groot
Ende doudste calver mede
⁴⁰⁵⁰Van egypten in elke stede
Calver hetic die beesten ionge
Ghemeenlic in ene tonge
Van alrehande beesten int lant
Sodat men geen huus vant
⁴⁰⁵⁵In egypten clene no groot
Die oudste ne blever doot
Mettien so gheboet farao
Met sinen boden sere onvro
Moysesse ende sinen lieden
⁴⁰⁶⁰Dat si alle dane scieden
Dat ander volc bads hem vele
Doe droegen si wech hare mele
Ende leende cleder ende vaten
Vanden volke vele utermaten
⁴⁰⁶⁵Diis roefden si egypten lant
iiii hondert dusent als ic vernamt
Waren der mans in gene scare
Sonder knapen diemen dare
Ende ioncwiif mochte scouwen
⁴⁰⁷⁰Met kindren ende met vrouwen
Enten beesten daer geen getal
Geen boec oec gescriven sal
Nilus die dor egypten loept
Hadde dlant almeest besoept^[11]
4075∙I∙ graf daer iosep in lach
Moyses screef daer uptien dach

1. nemmee: niet meer
2. fier: vier (telwoord)
3. Onder die egyptiene. Waren mee plaghen danne tiene. Dat merct wel niet also suaer. Alse die .x. wet voor waer. .xxiiij. daghe tfier. Houter of die kalendier. Dat es eene (l. tve) in elke maent. Dar men al ghelike af waent. Dat vp eene wile van den daghe. Vreselijc sijn die ader slaghe. (Onder de Egyptenaren woedden meer dan tien plagen maar let wel: niet even erg als die tien. Nota bene: de kalender vermeldt er 24 dagen van, twee aan twee - dat is eenmaal (tweemaal) in elke maand - , waar men zonder uitzondering van denkt, dat op enig moment van de dag aderlatingen gevaarlijk zijn.)
4. ader slaghe: aderlating De zgn. Dies Aegyptiaci waar Maerlant over spreekt werden beschouwd als ongeluksdagen in sommige kalenders werd zelfs aangegeven tijdens welk uur men de meeste risico's zou lopen b.v. bij het reizen of bij het aderlaten.
5. ioncwiif: meid, dienstmaagd
6. diere: dure, kostbare.
7. tiaer: het jaar
8. dillen: snappen, praten
9. post: deurpost
10. overdure: boven dorpel
11. besoept: van besopen : overstromen