Dan penitentie die sere es swaer
kolom a
4250De soete wart daer naer
Alsmen om dat cruce dinct
Wet wel dat al vernoye sinct
Datmen draget dor onsen here
Datmen pensen wille hoe sere
4255God dor ons gepinet was
Daer na quamen als ict las
Moyses ende volc mit him
In ene stede ende hiet elim
Daer xii fonteinen in waren
4260Ende lxxii palmen te waren
Die xii fonteynen bedieden
Die xii apostele die den lieden
Soete leringe scone ende claer
Orconden lude ende openbaer
4265Die palmen die bedieden mere
Die lxxii ionghers die onse here
Na sinen apostelen ute sande
Die pais boedscapten achter lande
Ten dertienden daghe alsi scieden
4270Ute egypten mit haren lieden
Doe ghebrac hem altehant
Die spise ute egypten lant
Si seiden hadde god gegeven
Dat wi verloren hadden dleven
4275In egypten daer wi saten
Ende vleesch ende broots te vollen aten
Moyses bad gode in dien dage
Ende god ghehorde sine clage
Moyses seide god hevet gehort
4280Uwe meninge ende uwe wort
Ende sal u avonts geven vleesch
Ende tilike[1] broot na uwen eesch
Navonts quamen quackelen[2] daer
kolom b
In hare tenten dat was waer
4285Diere nam elc siin gevoech
Ende na sinen wille genoech
Ende tilike na moyses bede
Quam ∙i∙ dau aldaer ter stede
Ende maecte sine hande nat
4290Over reyn so hilt hi dat[3]
Mar doe hiit dede an sinen mont
Smaket alse hoenich ter stont
Doe verstoet hiit over broot
Dat hem god behiet ter noot
4295Ghene dau die lach op tvelt
Alomme ende omme haer getelt[4]
Dat was clene coren ende wit
Ghelic den reine[5] ende onbesmit
Manna hiet tvolc van israel
4300Doe seide moyses merct wel
Dat es broot dat u god geeft
Elc neems dat hem orbaer[6] heeft
Daer gaderden si haer gewim
Som mee ende som min
4305Ende alsment dan ter maten dede
Proeft hier an wonderlichede
Dies minste hadde ofte meest
Dat dede al gods volleest
Vondens even vele ter maten
4310Borgghet[7] god moeti verwaten[8]
Proef hier an al openbare
Ic sal di leren nu com hare
Ihesus dats hemelsche broot
Ende beter dan manna ter noot
4315Die es bi manna bediet
Inden outaer daer menne siet
Indie figure van den broede
Gheloef hier an al doestuut node
Almaectemen dusent deel
4320Van ∙i∙ broede alst es gheel
Elc ware ihesus altemale
Gheloef hier an so doestu wale
Dat minste deel ende dat meeste
Es even groot gheloef dit beeste
4325Dit was die figure die si vonden
An manna tien stonden
Manna most men tilike lesen[9]
Want en mochte niet genesen
- ↑ tilike: ‘s morgends
- ↑ quackele: kwartel
- ↑ Over reyn so hilt hi dat: hij dacht dat het regen was
- ↑ getelt: Tent, legertent
- ↑ reine: regen
- ↑ orbaer: hetgeen nodig is
- ↑ borghen: beschermen borg staan voor op grond van een borgstelling vrijlaten op krediet geven
- ↑ verwaten: te gronde richten excommuniceren vervloeken verafschuwen
- ↑ lesen: Zamelen, verzamelen, bijeenbrengen, oprapen, opzamelen, lezen, plukken. Vooral van voortbrengselen der natuur.
