Pagina:Van Maerlant, Rijmbijbel (Hs 10B21, 1332).pdf/69

f27r

Amalech noch metten sweerde kolom a
Ende siins vergeten doen up deerde
In sauls tiden es dit voldaen
Als ghi hier na sult verstaen
Ietro quam daer moyses sweer
I vroet heidiin een geheer^[1]
Ende doe hi sach den groten onvrede
Die moyses hem selven dede
Tvolc teberechtene^[2] allene
⁴⁴³⁰Dochthem ene pine niet clene
Hi seide du soude die pine niet ane vaen
Mar du salt uut kiesen saen
Mogende liede die gode ontsien
Waerheit minnen ende vrecheit^[3] vlie
⁴⁴³⁵Die dit volc van clenen saken
Berechten ende vrede maken
Die grote zake berecht allene
Aldus wart die pine clene
Moyses hi en scaemdem niet
⁴⁴⁴⁰Tedoene dat hem die heidin hiet
Ende hi deet doe altehant
Ietro voer weder in siin lant
Na pasche dach xlvii daghe
Na degyptie achterste plaghe
⁴⁴⁴⁵Dat si geoffert hadden tlant
Leesmen dat moyses quam tehant
Ende tvolc van israel quite^[4] ende vri
Ten berghe waert van synay
Ende moyses clam up te gode
⁴⁴⁵⁰God seide sech dese gebode
Ghi siet wat ic u hebbe gedaen
Nu sal ic u toe spreken saen
Houdi die ghebode miin
So suldi mine liede siin
⁴⁴⁵⁵Ende uut vercoren vor alle lide
Doe hem moyses dit bediede
Si seiden wat ons god heet
Dat wil wi doen gereet
Ende moyses die keerde weder
⁴⁴⁶⁰God sprac ic sal comen neder
Tote di in die demsterhede
Dat mi tvolc sal horen mede
Ganc ende mac mi dat volc rene
Heden ende margiin gemene
⁴⁴⁶⁵Doe hem hare cleder dwaen^[5]
Ende der wive oec anestaen
Dat si ten derden daghe siin kolom b
Ghereet ende segt hem termiin
Dat si an den bergen niet liden
⁴⁴⁷⁰Wie so den berch tast tesen tiden
Hi starfter omme dats de pant^[6]
Niemme doere an sine hant
Proeft of die viantscap was groot
Eer ihesus xristus smaecte die doot
⁴⁴⁷⁵Tusschen gode enter menschede
Mar siin bloet maecte den vrede
Hier na quam die derde dach
Ende eermen die sonne sach
Donret en blexemet mede
⁴⁴⁸⁰Ende tswer^[7] leet^[8] mit groter dichede^[9]
Decte den berch ende groot luut
Ende groot rooc gingher uut
Want god was comen inden viere
Daer toe ginct up in dere maniere
⁴⁴⁸⁵Alse tvier uten ovene doet
Tvolc was vervaert datter stoet
Ende waende dat moyses ware doot
Van ons heren gramschap groot
So dat sine sagen sonder vrucht
⁴⁴⁹⁰Comen in ene scone lucht
Hi seide doe hi hem quam tevoren
Heden so en suldi niet horen
Iacobets sone ende amram
Hort den genen die voer u quam
⁴⁴⁹⁵Entien van egypten dede wee
Enten wech makede indie zee
Ende u gaf hemelsche spise rene
Ende drinken van harde stene
Adame die vrucht gaf vander erde
⁴⁵⁰⁰Ende noe vander lovie bewaerde
Entie abrame gaf canaan
Ysaac van ∙i∙ ouden man
Ende van ∙i∙ ouden wive
Dede coemen tesen live
⁴⁵⁰⁵Die iacob maecte van kindre rike
Ende moyses verhief geweldelike
Mint des wort al u liif
Vor kindre ende vor wiif
Doe leedi tvolc ten berghe bi
⁴⁵¹⁰Allene aaron ende hi
Gingen bede over die pale^[10]
Dat ander volc bleef altemale

1. geheer: Aanzienlijk, voornaam ook uitstekend, roemrijk
2. berechten: besturen
3. vrecheit: Hardvochtigheid, wreedheid, hardheid, onmeedoogendheid.
4. quite: onbelast vereffend vervallen vrij
5. dwaen: wassen
6. pant: onderpand hier in de betekenis van last, kwelling, onaangenaamheid, leed.
7. tswer: moet ‘tswerc’ (het zwerk)
8. leet: onaangenaam, droevig
9. dichede: dichtheid
10. pale: paal grenspaal grens territorium