f27v
Staende binden pale daer
kolom a
Doe sprac god al openbaer
4515So dat si alle daer gemene
Die stemme horden groot ende clene
Dus gaf hi upten viiften dach
Die gebode daer die wet an lach
Met worden in lude ende in viere
4520Dat bediet die rechte maniere
Dat hi sende in selker wisen
∙I∙ daghe na siin verrisen
Dat was upten sinxten dach
Den heiligen geest daer vele an lach
4525Sine apostelen sende uut
In viere ontfingen sine ende in luut
Nu hort hier die ∙x∙ ghebode
Die tvolc daer ontfingen van gode
Dit es seithi dat eerste ghebod
4530Ne kies vor mi ne genen god
Ne mac geen gebeelde na mi
Ne genen afgod mac di
Noch anebeedse nembermere
Ic ben diin god ende diin here
4535Ende wreke des vader misdaet
Up dat kint dat daer na staet
Altote indat vierde let[1]
Die mi haten ende mine wet
Ende ic doe hem ontfarmichede
4540Die mi minnen ende houden mede
Miin gebod entie mi dienen
Dit es teerste gebod van den tienen
Diins gods name diins heren
Ne souen niet en spotte keren
4545Noch anevaen ydelike
Dat bediet recht valschelike
Ne saltu sweren nembermere
kolom b
Also dattu die gods ere
In di selven niet en breecs
4550Met dulre talen die du spreecs
Den saterdach saltu vieren
Ende heylighen in alre manieren
Dine kinder ende dine beesten
Ende dine knapen sellen inder feesten
4555Hem wachten van allen werke
Dese feeste daden die clerke[2]
Upten sondach verkeren
Om die verisenesse ons heren
Eren moeder ende vader
4560Met worden ende met altegader
Dattu heves in allen dingen
Die dit gebod niet volbringen
Si sellen quader dode sneven[3]
Diet doen sellen lange leven
Dune salt nieman slaen doot
Met handen met rade in gere noot
Den onnoselen doen geen quaet
Ne gener toe geven raet
Dat nieman ne wort gecranct siin liif
4570Mar daer du moges help den keitiif
Dune moets mit genen wive
Meenschap hebben metten live
Sonder met diere die di es geset
Ende gegeven ter wet
Ne stele nieman oec siin goet
Mar wes getrouwe in dinen moet
Ende roef niet en si diin
Mar laet elken hebben tsiin
Dune salt in genen stonde
4580Luden geven valsche orconde
Iegen iemene dit verbiet god
Ende alle logene ende al fel spot
Dune salt oec niemans goet
Begeren in dinen moet
4585No siin huus no siin erve
Om dien vrome[4] van diere bederve[5]
Du en salt oec niet te waren
Diins evenkerstiins[6] wiif begaren[7]
No siin ioncwiif no sinen knecht
4590No gene dinc die siin es echt
Hier gaen uut die ∙x∙ gebode
Die ons geset siin van gode
- ↑ vierde let: vierde generatie
- ↑ clerke: Geestelijke, meer bep.: persoon die de lage geestelijke wijding heeft ontvangen.
- ↑ quader dode sneven: een ellendige dood sterven, op een ellendige of rampzalige wijze om het leven of aan zijn eind komen.
- ↑ vrome: voordeel nut winst opbrengst inkomsten
- ↑ bederve: nut, voordeel, belang
- ↑ evenkerstiins: Medechristen bepaaldelijk medemens, naaste
- ↑ begaren: begeren, willen
