Pagina:Van Maerlant, Rijmbijbel (Hs 10B21, 1332).pdf/72

f28v

⁴⁶⁸⁵Men mochte rechten ende breken kolom a
Ten oestende horic spreken
Was die dore daer men in ginc
Noit sach man diere dinc
Het was cusschen binnen
⁴⁶⁹⁰Int oestende wildiit bekinnen
Dat sancta sanctorum hiet
Stont ∙i∙ candelaer waert geen verdriet
Dien ic wel gerne prisen soude
Al gemaect van finen goude
⁴⁶⁹⁵Mar met ysere gestiit^[1] binnen
In elke side wildiit bekinnen
Gingen uut drie telgen van goude
In tmidden ∙i∙ daermen up woude
Up elke setten ∙i∙ goudiin vat
⁴⁷⁰⁰Ende olie van oliven in dat
Die vate daer men mede in goet
Waren algader goudiin roet
Entie tangen daerment mede vur dede
Dat lecht waren al goudiin mede
⁴⁷⁰⁵In vant oec noit gescreven das
Hoe hoghe die candelare was
Mar twerc was diere dan gout
Het was gemaect met gewout
Die candelare als wiit horen
⁴⁷¹⁰Stont in die tabernacle^[2] voren
An die sutside up gherecht
Andie nortside daer iegen echt
Stont ∙i∙ tafle van houte cetin^[3]
Daer ic wel seker ane bin
⁴⁷¹⁵Dat dlichtste hout is datmen vint
Ende verrot oec niet een twint
Ende die was lanc ∙ii∙ cubitus^[4]
Ende breet wi lesen dus
Ende al gecleet mit goude diere
⁴⁷²⁰Die tafle stont up voere viere
Alomme ginc ∙i∙ ranke^[5] scone
Van goude gemaect als ∙i∙ crone
∙ii∙ vingher boven der tafle hoech
Bescreef die gene die niet en looch
⁴⁷²⁵Daer up so lede men xii broet
Van tarwen uut te maten groet
Up elc ∙i∙ goudine patene^[6]
Te vollen breet ende rene
Daer up ∙i∙ hant vol wieroecs mede
⁴⁷³⁰Tlater dages lasic datment dede
Dat oude broot wech ende was der papen kolom b
Anders atent gene knapen
Ende berndent wieroec upten outaer
Dan leidemen versch broet weder daer
⁴⁷³⁵Up die tafle ende nuwen wierooc
Dat lagger al die weke oec
In midde vloere stont ∙i∙ outaer
Al fiin goudiin versch ende claer
Daermen gode up te diene plach
⁴⁷⁴⁰Als ic die wet bescreven sach
Dat vorderdeel dat sanctorius hiet
Was xx cubitus lanc el niet
Ende ∙x∙ hoech ende ∙x∙ wiit
Des willic dat ghi seket siit
{{sup|47⁴⁵Dat westerdeel heeten som
Die boeke sancta sanctorum^[7]
Dat was viercant an elke side^[8]
An lanc an hoech ende an wide
∙X∙ cubitus min no mee
⁴⁷⁵⁰Ende daer scieden dese twe
So hinc ∙i∙ bissine^[9] cortine
An iiii pilaerne goet ende fine
Van houte cetine ende van goude
Wel gecleet als god woude
⁴⁷⁵⁵Die blade daer af wit selveriin
Die capitele fiin goudiin
Daer gene cortine an hinc
Noit man sach diere dinc
Uptie cortine goet ende diere
⁴⁷⁶⁰Waren bloemen menigertiere
Genaiet die daer up stonde
Nu hort wat die boeke orconden
Wat in sancta sanctorum was
∙I∙ arke als ic bescreven las
⁴⁷⁶⁵Entie arke als ic bescrive
Was ghemaect als ∙i∙ rive^[10]
Van houte cetyn gehouwen
Die lanc was suldi getrouwen
ii slachelne^[11] ende een halve mede
⁴⁷⁷⁰Die wide daer af entie hoechede
Es ander half elve bescreven
Up gonen voet was soe verheven
Binnen ende buten goudiin scone
Boven gemaect met ere crone
⁴⁷⁷⁵Ente dragen wel gemaect
Daer in was wat help messaeet

1. gestiit: gestut
2. tabernacle: Woonplaats van God (Jahwe). Het heiligdom dat de Israëlieten in opdracht van Jahwe in de woestijn bouwden en dat Zijn aanwezigheid te midden van hen symboliseerde (vgl. Bijb.Enc., p. 680-681).
3. cetin: Van hebr. sittim, het hout van een acaciaboom, dat duurzaam en aan geen verrotting onderworpen is
4. cubitus: El, lengtemaat van ca. 70 cm.
5. ranke: hier bedoeld als opstaande rand.
6. patene: schotel
7. sancta sanctorum: heilige der heiligen
8. viercant an elke side: het was een kubus
9. bissin: Bissen, zekere fijne, witte linnen stof.
10. rive: schrijn
11. slachel: el (lengtemaat)