Pagina:Van Maerlant, Rijmbijbel (Hs 10B21, 1332).pdf/75

f30r

ii taflen die waren van stene kolom a
⁴⁹⁵⁰Daer in die wet bescreven rene
Metten vingheren ons heren
Also als ons die boeke leren
Doe die lieden beneden sagen
Dat moyses soude verdagen^[1]
4955Upten berch so lange
Spraken si mit alle bedwange^[2]
Tote aaron en seiden
Mac ons gode die ons leiden
Die voer ons gaen int woiste lant
⁴⁹⁶⁰Ons es oncont ende onbecant
Wat moyses es gesciet
Aaron ende hur wilden dat diet
Bestieren^[3] vander dulre vaert
Ende si haddent sere ontwaert^[4]
4965Ende spueden hur in sine ogen
So dicke hine const gedogen
Ende versmordene^[5] daer mede
Aaron sach datmen daer dede
Sinen swager ende was vervaert
⁴⁹⁷⁰Ende sprac aldus ten lieden waert
Ghi sult hare te mi werc sinden
Die horingge^[6] van uwen kinden
Ende van uwen wive mede
Dat was haer meeste dierhede
⁴⁹⁷⁵Doe pensdi dat si van den rade
Af souden staen dur hare scade
Doch brochten si de oringge
Nu hort hier wonderlike dinge
Aaron werpt goet in den viere
⁴⁹⁸⁰Daer maecte die duvel sciere
Bi sire list ∙i∙ calf daer of
Den calve gaven si groten lof
Doe riep daer menich duvels bode
Israel dit siin dine gode
⁴⁹⁸⁵Die di uut egypten brochten
Dese lisdaet si sere becochten
Aaron maectem ∙i∙ outaer
Ende geboet des margiins daer
∙I∙ vierdach^[7] sonder waen
⁴⁹⁹⁰Ende tvolc es tilic up gestaen
Si aten ende dronken ende maecten feeste
Ende anebeden dminste ende dmeeste
God sprac te moysese saen
Ganc neder diin volc heeft misdaen
⁴⁹⁹⁵Laetse mi bederven al kolom b
Ic beloefdi dat ic sal
Van groten volke di here maken
Moyses sprac te desen zaken
Laet dine grote gramschap vallen
⁵⁰⁰⁰Here des bidic di voer hem allen
Dat niet segge menich viant
Di es in egypten lant
God deedse heimelike hene varen
Om dat hise wilde te waren
⁵⁰⁰⁵Int gheberchte al verslaen
Hine hads gene macht sonder waen
Tegevene tharen doene
Dat lant van promissioene
Ghedinc dire vriende hier te voren
⁵⁰¹⁰Dien du selve heefs gesworen
Dattu souts dat lantscap geven
Haren gheslachte ende haren neven
Dus stilde moyses onsen here
Ende ginc af bedroevet sere
⁵⁰¹⁵Ende droech ii tafle tien tiden
Steniin an beden siden
Ghescreven metten vingher gods
Ende iosue die siins gebods
Wachte ende anden berch lach
⁵⁰²⁰Quam iegen hem als hine sach
Mar dat wet wel al sonder saghe
Hi en vaste niet die ∙xl∙ daghe
Ende seide tote moyses
In dat here beneden es
⁵⁰²⁵Als ochtmen vochte groot geclanc
Neen sprac moyses hets sanc
Mar doe hire naecte^[8] ende tcalf sach
Ende dat spel up genen dach
Wart hi gram ende warp ontvee
⁵⁰³⁰Die marberne tafle twe
Dat goudine calf verberndi mede
Ende wreeft te pulvere ter stede
In ∙i∙ water so warp hiit dan
Ende deder af drinken menigen man
⁵⁰³⁵Men leest so wie dat dranc vander fonteinen
Ende van gere misdaet was onreine
Dat hem tgout hinc anden baert
Moyses scalt taaroene waert
Dat hi des volcx wille dede
⁵⁰⁴⁰Mar om hare piinlichede

1. verdagen: Vertoeven, verblijven, zich ergens ophouden.
2. bedwange:dwang, noodzaak
3. bestieren: intomen
4. ontwaert: in onwerde hebben: verachten, minachten, geringschatten.
5. versmoren: door verstikking om het leven brengen vermoorden
6. horingge: oorringen
7. vierdach: feestdag
8. naecte: van naken: naderen.