Alle drie vasten ∙xl∙ daghe
kolom a
Ende ∙xl∙ nachte sonder saghe
5135Doe hiet moyses daer maken
Die tabernacle die diere zaken
Arke taflen ende candelaren
Die vate oec metten outaeren
In die weke hiet hi vieren
5140Den saterdach in allen manieren
Al tvolc quam daer ter steden
Ende offerde hem al haer dierheden
So getrouwelike dor gode
Datmen uut gaf met gebobe
5145Datter niemen offerde mee
Meesters ware af si twee
Diemen hier voeren noemde wel
Corab ende besehel
Alle die van xx iaren
5150Entie daer boven waren
Daden daer toe haer offerande
Int dander iaer als ict becande
Dat si egypten hadden gerumt
Daer menich omme wert gerumt
5155Ten eersten dage van apprille
Doe rechten na sinen wille
Moyses die tabernacle ons heren
∙I∙ groet swerc met groter eren
Dat nieman mochte dor sien
5160Bedecte alden dach mettien
Nachts was tswerc leesmen hier
Root ende claer alse dat vier
Dat si mochten openbare
Verstaen datter got in ware
5165Vort meer rumden si tvelt
Ende braken up hare getelt
So weltiit dat swerc hief dane
Ende daert hem sette te stane
Gingen si weder logieren[1]
5170Dus plagen si dere manieren
Exodus neemt ende aldus
kolom b
Hier gaet an leviticus
Dats moyses derde boec
Mar wet wel datmi en roec[2]
5175Die sacrifitie te bescrivene
Het ware mi piinlic te bedrivene
Ende leec volc sout qualike verstaen
Ter ystorien willic gaen
God verboet hem tetene bloet
5180Ende alle beesten quaet ende goet
Die verdronken waren oft versmoert
Dat verstaet wel an dese woert
Om dats die van egypten plagen
Ende andre heidine indien dagen
5185Verboet hiit want hi wilde mede
Dat si lieten hare andre zede
Niet datter enighe sonde an lach
Dan tgebod gods uptien dach
Doe seide onse here dat hi woude
5190Datmen aaron wien soude
Te sinen dienste ende sine kinder
Dat si papen waren ginder
Marct die daer toe was bekint
Sine mosten siin doef ne blint
5195Noch crepel no bechus[3]
No manc nochte caurus[4]
No gerehande lette[5] mede
Van boven totte beneden
Mar van lichame al gesont
5200Also souden si nu ter stont
Met rechte die papen wesen
Alst gescreven es van desen
Moyses na tgebod ons heren
Nam aaron met groter eren
5205Ende daer toe sine kinder mede
Hi versamede daer ter stede
Ter tabernaclen vor die dore
Al tvolc gemene dor[6] en tore
Ende seide hem dat si mochten horen
5210Dat god daer toe hadde vercoren
Aaron haer pape te sine
Ende daer toe al die kinder sine
Si loefdent alle ionge ende oude
Noch waert recht alsmen kiesen soude
5215Datmens hadde der liede wille
Mar symon makets een gestille[7]
