Pagina:Van Maerlant, Rijmbijbel (Hs 10B21, 1332).pdf/78

f31v

Wet hevet verlore hare macht kolom a
Nu eist al coep^[1] ende cracht
Daer nam hi aaron ende sine kinder
⁵²²⁰Ende dwoechse^[2] met water ginder
Arone deedi die cleder ane
Daer ic u of in minen wane
Hier te voren dede verstaen
Hoe diere si waren ende hoe gedaen
⁵²²⁵Ende bestreec mit heiliger olie daer
Hande ende voete wet vor waer
Den kindren dedi liinwaet ane
Ende got dese cierlic dat ic wane
Mar hi en sette hem niet up thoeft
⁵²³⁰Haer hande bestreec hi des geloeft
Ende noch bestriicmen der papen hande
Ende der bisscoppe in kerstine lande
Die tabernacle bestreec hi mede
Metter olien in meniger stede
⁵²³⁵Entie vate daer toe doutare
Dit doet die biscop openbare
Als hi die heilige kerke wiet
Ende metten worden benediet
Doe aaron ende sine kinder
⁵²⁴⁰Dus waren gewiet ginder
Daden si hare offerande
Also alse moyses wel becande
Dat god wilde ende was wet
vii dage dus eist geset
⁵²⁴⁵Was vander sacrificien feeste
Ten actenden dage quamen die meeste
Die van israel altesamen
Aaron offerde in gods namen
∙I∙ calf daer vor sine sonden
⁵²⁵⁰Ende enen weder^[3] daer tien stonden
Over der ander liede misdaet
Offerde hi na ons heren raet
∙I∙ calf enen boc ende ∙i∙ ram
Ende ∙i∙ stier ende oec ∙i∙ lam
⁵²⁵⁵Tvleesch vanden beesten leidi daer
Sonder vier upten outaer
Aaron hief up die hande ginder
Ende benediede wiif man ende kinder
Ende daer so sende doe onse here
⁵²⁶⁰∙I∙ vier dat heet was sere
Ende verbrande die offerande
Dat vier van den heiligen lande
Dat en lietmen nembermeer uut gaen kolom b
Van dien dat daer was ontfaen
⁵²⁶⁵Tote datse dwanc ende vinc
Nabugodonosor die coninc
Mar men voerdet met hem altoes
Des selves dages dat men vercoes
Te desen dienste aarons kinder
⁵²⁷⁰Waren ∙ii∙ gebroedere ginder
Deen hiet nadap^[4] dander abiu^[5]
Aarons kinder dat segic u
Si namen daer ii wieroec vate
Ende vreemt vier bi hare onmate^[6]
5275Ende souden vier vor gode dragen
Daer quam gods vier daert vele sagen
Liede ende verberndse bede gader
Dies was droeve aaron haer vader
Moyses hiet den magen^[7]
5280Dat mense uut soude dragen
Daer groefmense metten gewaden
Daer si te voren den dienst mede daden
Hier omme pleget die heilige kerke
Datmen also graeft die clerke
⁵²⁸⁵Om desen dinc diemen sach hier
Ne dorste nieman anders vier
Leggen up ons heren outaer
Nembermeer wet vor waer
God verboet hem inder feesten
⁵²⁹⁰Tetene alrehande beesten
Die de voete hadden gheel
Si en waren gesplet twe deel
Alse den scape ende der coe
Oec moster edeken^[8] daer toe
⁵²⁹⁵Die niet ne edecken als dat swiin
Mosten hem georloft siin
Ne gene visch dus horic tellen
Hine hadde vinnen ofte scellen
Ne mosten si niet nutten mede
⁵³⁰⁰Vogele besciet hi daer ter stede
Die niet waren van iiii voeten
Dat si daer wel eten moeten
Aarone hiet hi dies gedinken
Dat si niet en souden drinken
⁵³⁰⁵Noch sine kinder gene zaken
Diese dronken mochten maken
No wiin no bier in genen dingen
Alsi in die tabernacle gingen

1. coep: Simonie, het door geld te betalen verkrijgen van een kerkelijk ambt, omkoping.
2. dwoechse: van dwaen: (ritueel) wassen.
3. weder: (Gesneden) ram, hamel.
4. nadap: Nadab (Vulg./Hist.Schol. Nadab), zoon van Aäron. bijbel: Ex 24:9, Hist.Schol. Lib.Ex. Cap.XLIV
5. abiu: Abihu (Vulg. Abiu Hist.Schol. Abiud, Abiu), zoon van Aäron. Bijbel: Ex 6:22, Hist.Schol. Lib.Ex. Cap.XLIV (Abiud), Hist.Schol. Lib.Lev. Cap.XVI (Abiu)
6. onmate: op een onrechtmatige of onrechtvaardige, wederrechtelijke wijze.
7. mage: van maech: bloedverwant verwant familielid familie iem. uit de vertrouwde kring
8. edeken: herkauwen