f32v
Leviticus neemt aldus ende kolom a
Numeri na dat ict kende
Beginnet hier verstaet dit wale
Dat meent die boec van getale
Want die ieesten ons bedieden
5400Dat ghetal van alden liede
Al dat was van xx iaren
Ende daer boven oec te waren
Tote ∙l∙ iaren dat telden si
Sonder tgeslachte van levi
5405Die ten wapiine niet en dochten
Ende bloet waren ende niet en mochten
Geduren[1] in enigen stride
Ne teldemen daer niet tien tiden
vim ende viftich man
5410Ende iii dusent daer an
Ware die wapine dragen mochten
Liede die met hem vochten
Daer hiet god datmen stelt wachte
Om die tabernacle bi nachte
5415Soude doen waer so si waren
Hort hoe die manieren waren
Dat van zabulon comen was
Van ysaackar ende van iudas
Lach an die oest side gelogiert
5420Van ruben dus wast gevisiert
Van symoene ende van gaad
Hadden die sutside ghehad
Effraim ende manasse
Maecten geslachte dese twe
5425Ende waren van ioseppe geboren
Also wi inder ieesten horen
An die westside so leide men hin
Metten geslachte van beniamin
Asers geslachte ende van dan
5430Van nepraliin die lagen daer an
Ghelogier an die nort side
Binnen dien lach ∙i∙ platse wide
Daer in stont indie midwaerde
Die tabernacle up die aerde
5435Leviis geslachte laggher omme
Ghelogiert na hare somme[2]
Ende oec mede gescaert in vieren
Die diender in na hare manieren
Dat here entie pauwelioene
5440Lagen recht in sulken doene
Als ocht ware ∙i∙ geveste stede
kolom b
Ende daer toe groot ende scone mede
Moyses telde levis kinder
Dier vant hi ccc ghinder
5445Ende xxx dusent mede
Die hi vant daer ter stede
Die leviten die ∙L∙ iaer
Ofte meer hadden wet vor waer
En dienden niet metten covente
5450Mar si hadden die ornamente
Die papen dienst dede daer
Hadde van ouden xxxv iaer
Eer men oec wiede daer toe
Mar nu so wardsi vele te vroe
5455Papen in die nuwe wet
Ic wane siit somme lieten bet
Nieman moste die hant slaen
An tabernacle sonder waen
Noch an arke no an vaten
5460Alsise droegen achter straten
Dan die van levi was geboren
Entie zaken wildiit horen
Die waren in sancta sanctorum binnen
Dectemen dat mense bekinnen
5465Niet en mochte no besien
Alsmen henen soude tien
Onsen here moyses entie sine
Maecten frii selveriin busine
Datmer mede blasen soude
5470Als dat here porten woude
Doesi omtrent wel ∙i∙ iaer
Ten berge hadden gelegen daer
Diemen heet sinay
Met haren ogen sagen si
5475Tswerc dattie tabernacle decte
Dat het up hief ende henen trecte
Dat was in meys xx dage
Aldatter in was vrient ende mage
Traken[3] doe up haer getelt
5480Ende traken na tfier daer thelt
Enen langen wech ende enen onsachten
Want binnen iii dagen ende iii nachten
Sone ruste dat swerc no ne gelach[4]
Dies was int here groet geclach
5458Onder wiif ende onder man
Indie stede van fathan
