Hare ne geen diet sach mede
kolom a
5660Wat ic in egypten dede
Die boven xx iare es out
Ende mi getorent hebben ∙x∙ vout
En comt inden lande niet
Dat ic haren vorders[1] behiet
5665Sonder calef ende iosue
Aleenlike dese tve
Ende om dat volc van chanaan
Ende amalech die man
Hier bi siin gekeert ter vaert
5670Weder ter woistine waert
Dat si oec u niet bestaen
Ende wet oec wel sonder waen
Ghelic dat si binnen ∙xl∙ dagen
Bespiet hebben slands lagen
5675Seldi becopen wet vor waer
Uwe mesdaet ∙xl∙ iaer
Dis seyde den volke moyses
Ende si weenden alle om des
Tylic si up sin gestaen
5680Ende seiden wi hebben mesdaen
Dat wi in wanhope waren
Wis sellen harde garne varen
Int lant dat ons god behiet
Moyses sprac en vaerter niet
5685God en es niet met u dan
Mar si en hilden niet daer an
Ende waenden sonder gode verwinnen
Mar doe si dat souden beginnen
Quam dat volc van canaan
5690Ende van amalech daer an
Ende sloegense ende daden hem pine
Ende iaghendese in die woistine
Alst here in die woistine lach
Vondsi up enen saterdach
5695I man die hout daer las[2]
Dat iegen die viere was
Moyses bevraghets gode
God sprac ic willemen dode
Ende men buten tenten stene
5700Dat ginc volc al gemene
Marcte tien tiden choros vernam
Dat die kinder die amram
Hadde gewonnen waren heren
Aaron bisscop met groten eren
5705Ende moyses des volcx here algader
kolom b
Omdat ysvar siin vader
Ende amram gebrodere waren
So quam hi met ere scaren
Wel met ccc leviten
5710Die horden te sire viten[3]
Up dat hi bisscop wilde wesen
Oec so was met hem indesen
Abyron[4] enden dathan
Die waren die machtichste man
5715Van ruben gheboren echt
Ende seiden het ware haer recht
Die heerscappne van den scaren
Om dat si geboren waren
Van ruben iacobs oudste sone
5720Moyses sprac omme dat gone
Elc neme morgiin ∙i∙ wierroecvat
Ende doe des heilichs viers indat
Ende siit coer heren ende u scare
Ic wille dat aaron oec si dare
5725Dien got verkiest si goet man
Moyses sende om dathan
Ende aaron dat sire quamen
Si ontseident[5] alte samen
Voer al tvolc seide openbare
5730Moyses totte choros scare
Neemt uwe wieroc vate saen
Ende gaet hier voer gode staen
Si dadent ende moyses ginc dan
Omme abyron ende dathan
5735Mar si stonden ghereet ter were
Met haren magen ieghen there
Ende niet te sine onderdaen
Moyses die bad gode saen
Die aerde benede ende ondede
5740Ende verswalsche daer ter stede
Abyron ende dathan
Hare goet ende hare man
Dat vier dat sloech so utermaten
Ute choros wieroecvaten
5745Dat die blexeme waren so groot
Ende verbernedse alle te doot
Die waren in sine scare
Ende aaron hadde genen vare
Sanders daghes wert tvolc gemene
Gram ende brochten gedragen stene
- ↑ vorders: Voorouders, voorvaderen.
- ↑ las: van lezen hier in de betekenis van verzamelen, plukken.
- ↑ horden te sire viten: pasten bij zijn levenswijze
- ↑ Abyron: Abiram (Vulg./Hist.Schol. Abiron), zoon van Eliab, lid van de stam Ruben. Tijdens de tocht naar het Beloofde Land kwam hij o.a. samen met zijn broer Datan in opstand tegen Mozes. Bijbel: Nu 16:1-50, Hist.Schol. Lib.Num. Cap.XX
- ↑ ontseident: van ontsecghen: Ontzeggen, niet willen inwilligen.
