f35v
Marien die ihesumme droech
kolom a
Daer menighe ziele omme loech
Van salmana quam al dat diet
Ter rivieren die sareth hiet
Daer leden si droge min no mere
Dan hem gesciede ter roder zee
Ende si quamen te harnon gevaren
5930Daer se die viande met haren scaren
Onder die roetse[1] hadden belaget
Als der ebreusche ystorie saget
Daer dede god die roche[2] vallen
Uptie viande voer hem allen
5935Ende leden dor tlant met vreden
Ende alsi al waren leden
So dat si int lant van moab quamen
Danne senden si boden te samen
Toten coninc seon van amorree
5940Die hem orlof nembermee
Te lidene gave dor siin lant
Hi ontseit hem altehant
Ende quam met here hem iegene
In die woistine gheslegene
5945Ende vachter up tvolc van israel
Daer bleef hi doot also wel
Tmere deel dat met hem quam
Tvolc van israel dat nam
Alsiin lant entie steden
5950Ende logierden met vreden
Up moabs lant uptie iordane
In ∙i∙ marsch als ic wane
Ierico stont andander side
∙I∙ starke stat ende ene wide
5955Mar daer si lagen ter stede
Quam die coninc iegen hem mede
∙I∙ gygant ∙i∙ vreselic man
Die coninc was van basan
Dien sloegen si gemeenlike
5960Ende behilden siin conincrike
Nochtan wast dat landscap niet
Dat hem onse heer behiet
Balech die coninc van moab
Die omboet siin heerschap
5965Want hi hem ontsach der scaden
Dien si ∙ii∙ coninghe daden
Van amorre ende van basan
Hi omboet die van madian
Sine vrient die daer bi lagen
kolom b
5970Ende seide dit volc sal ons veriagen
Ende verteren ic vruchte das
Alse die osse doet dat gras
Doch dat hi den raet vernam
Dat hi sende om balaam
5975Ende vermalediede die liede
Hi horde dat also gesciede
Dien vloecte dat hem misvel
Ende dien hi seinde dat hi voer wel
Oec hadhi vernomen daer mede
5980Dat volc van israel inder stede
Meer dan met wapine verwan
Dus docht hem goet ende sine man
Datmen met vloeken weder vochte
Des coninx bode voer ende brochte
5985Met hem die vorbaerste liede
Balaame te belovene grote miede[3]
Si seiden wat si daer daden
Balaam sprac laet mi beraden
Met onsen here ende bliift te nacht
5990Hi was gods prophete gheacht
Metten lieden daer was niet an
Het was een wikelere[4] ∙i∙ quat man
Nachts seide god ne vare niet
Te vloekene tysraelsche diet
5995Want hets ghebenediit van mi
Des anders daghes so seide hi
Hets mi verboden openbare
Dat ic met u niet en vare
Ander warf sende hi te balaam
6000Boden daer mee lach an
Ende giften oec vele mere
Balaam sprac wilde mi u here
Siin huus vol gouds geven mit eren
Hoe mochtic keren twort ons heren
6005Mar blivet te nacht met mi hare
Ic sal margiin met u varen
Tote hem ende doe metten lieden
Dat ic hem sal bedieden
Doe sadelde hi sine eselinne
6010Ende voer wech mit vasten sinne
Doe stont die ingel in die vaert
Voer balaame ende hadde ∙i∙ swaert
Balaam ne mochten niet sien
Die eselinne saghene mettien
