Den leviten hiet hi mede
kolom a
6360Dat menne in die arke dede
Daer hi in lach menich iaer
Alse ghi horen sult hier naer
Doe seide moyses ic kenne u fel
Ende ic weet uwe meninge wel
6365Ghi wildt gode in miin leven
Dicke laten ende begeven
Wat seldi doen alse ic ben doot
Daer maecte die here groot
Andite celi que loquar
6370Daer ic wel of seggen dar
Dat tende was van sinen scriven
Onse here die hetene cliven[1]
Upten hogen berch nebo
Hi soude hem togen also
6375Dlant dat hi abrahame behiet
Moyses benediede dat diet
Ende ginc up nebo daer na
Up dupperste die hiet falga
God togede hem dat lant mettien
6380Miracle wast dat hiit besien
Algader mochte het was so groot
Aldaer so bleef moyses doot
Ende god groevene in den dale
Int lant van moab weetmen wale
6385Mar siin graf dats gene sage
Es onbekent tote desen dage
Alle den genen die ye waren
Moyses was oud te waren
∙C∙ iaer ende xx mede
6390Nie en besoef[2] hi demsterhede
In sine ogen ne en verloes
Noch noyt tant genen altoes
xxx dage weet men wel
Beweenden die van israel
6395Want siin gelike wet vor waer
Ne quam nembermeer daer naer
Dus nemen ende moyses boeke
Sonder enige valsche doeke
Of van rune[3]of van reden
6400God danc ic hebse over leden
Iosue heet dese boec bi namen
kolom b
Want hine maecte alte samen
Daer hi den name of hevet ontfaen
Ende dat suldi wel verstaen
6405Moyses ende iosue
Hertoge[4] waren dese tvee
Over tvolc van israel
Want si there leden wel
Bidi hiet mense hertogen
6410Nu swiget laet u gedogen
Doe moyses was bleven doot
Ende leden was die iammer groot
Sprac onse here an iosue
Moyses es doot wat sals mee
6415Stant up ende liit die iordane
Du ende altvolc daer ane
Als ic met moysese hebbe gewesen
Sal ic met di siin na desen
Doe hiet iosue te waren
6420Gereden iegen tovervaren
Daer na sendi te ierico
ii spiers die besagen do
Die stat ende hoe soe was gevest
Des avonts so dochte hem best
6425Te herbergen met ∙i∙ wive
Hiet raab die van haren live
Ghereet was tellet davonture
Haer huus stont vaste anden mure
An ∙i∙ porte vander stede
6430So datmen navonts weten dede
Den coninc daer hi sat ende at
Datter spiers waren in die stat
Hi sende daer dat hi woude
Datmense hem senden soude
- ↑ cliven: (Op)klimmen, stijgen, omhoog gaan.
- ↑ besoef: van bezoeven: Eig. doen smaken, doen proeven, en bij uitbreiding bezorgen, verschaffen.
- ↑ rune: van runen: in het geheim met iemand spreken met een bedoeling die het licht niet zien kan, hetzij om hem het een of ander in te blazen, om het een opzet, complot of samenspanning te beramen, hetzij om hem tegen een ander op te zetten, om iets kwaads te zeggen van of kwaad te spreken van een ander, soezemoezen, konkelen, oorblazen, een aanslag beramen of smeden, kwaad stoken, veziken.
- ↑ hertoge: Legeraanvoerder, legeropperhoofd
