Ysaackar die hadde dat seste
kolom a
Zabulon tsevende ende niet tbeste
6885Azers kinder quamen daer naer
Ende neptaliims dat es waer
Dans gheslachte hadde tiende lot
Ende dat merct wel dat god
Rubens geslachte entat van gat
6890Over die iordane gaf al dat
Dat dat volc te voren wan
Up ogh den coninc van basan
Ende up seon van amorre
Met hem was half manasse
6895Leviis kinder ne hadden geen erve
Want si hadden gods bederve[1]
Ende onder die xii niet getelt
Ioseps kinder hadden tgewelt
So groot dat si geheslachten twe
6900Maecten effraim ende manasse
Dus ware xii merct hier bi
Alsonder tvolc van levi
Alenkelikke dese tvee
Calef ende iosue
6905Hadden dongecavelde lant
Calef hadde ebron in die hant
Iosue tmarassara met him
Iosue was van effraim
Ende calef van iudas comen
6910Iusue hebben wi vernomen
Gaf den leviten xlviii steden
Gode in te dienen met vreden
X over die iordane
Ende xxxviii als ic wane
6915Int lant van promissione
Daer si in hadden tharen done
Haer rente ende haere tienden
Daer si gode mede dienden
Calef voer met sinen neven
6920In ebron dat hem was geven
Ende sloegh die vier gygante doot
Enachors kinder die waren so groot
Ende belagen tabir[2] die stede
Die gaf hi in huwelike mede
6925Met sire dochter sinen broeder
Niet van den vader mar vander moeder
Hier binnen was dat xiiii iaer
Leden dat si quamen daer
Dat si tlant hadden gehat
kolom b
6930Iosue seide ten volke van gat
Ende half den volke van manasse
Ehde half van ruben wat sals mee
Ghi hebt gedaen gi moget keren
Daer hiet hi die vriende ons heren
6935Moyses god hevet gegeven
Pais ende ruste uwen neven
Keert in u lant ende uwe man
Dat og die conink van basan
Ende seon[3] hadde van amoreen
6940Mar gods wet hout al in een
Scuwet afgode dats mine bede
Arke ende tabernacle mede
Hebdi niet in uwe gerechte
Wi siin gebroedere ende gods knechte
6945Tuschen ons loept die iordane
Ghi vaert met groten goede der ane
Delet wen broeders ginder
Entie wiif wacht entie kinder
Aldus voeren si wech mit crachte
6950Ghene dardehalf[4] gheslachte
Ende alsi te iordane quamen
Maecten si daer alle tesamen
∙I∙ outaer die groot was sere
In orconde dat god was haer here
6955Mar doe iosue wiste die mare
Waendi dat in quade ware
Ende si die wet laten wilden
Si gereden hem met scilden
Ende met wapene te wrekene gint
6960Mar fines was voren gesint
Te hem ende ∙x∙ hoge man
Die seiden wat gripti an
Lati gode openbaer
Enfe maect ∙i∙ losen outaer
6965Si seiden god moet ons verbieden
Ende trecht sceden tusschen ons lieden
Mar wi ontsagen dat uwe kinder
Die int heilige lant siin ginder
Ons lieden hierna seggen mochten
6970Wat wi ten tabernacle sochten
An gode van israel
Want hi ons heeft versceden wel
Met hare strome die iordane
Dies rechte wi ∙i∙ tekiin ane
- ↑ bederve: levensonderhoud voordeel inkomsten
- ↑ tabir: Dabir (Vulg./Hist.Schol. Dabir), Kanaänitische stad ten zuidwesten van Hebron. Bijbel: Joz 10:38, Hist.Schol. Lib.Jos. Cap.IX
- ↑ seon: Sichon (Vulg./Hist.Schol. Seon), koning van de Amorieten. Hij werd verslagen door Mozes. Bijbel: Nu 21:21, Hist.Schol. Lib.Num. Cap.XXXI
- ↑ dardehalf: Derdehalf, twee en een half
